Read Chokri Naga JOHN 7 Bible Online

JOHN 7 - Chokri Naga bible

JOHN 7

¹Hizi kevasa Jisu ta Galilee lü tavota, Judea lü tasa mota, kekrelamori Jews miko pü dokhri va keto rhü ba ketala.

²Jews miko kereshüce nye vori meno bata.

³Pü sazü jürako püce poti, hice takhi Judea lü kho tate, n sajiko pori nmhathoko ngo ketola.

⁴Kekrelamori mipüri kemekhrülü mhathi yomo, mipo nse nyüsa ba lize. Mhace no mhathi kebako pü cejülü mesesü nyü ba tisa.

⁵Kekrelamori pü sazü jürako ri pü melü kemola.

⁶Jisu ukoce pode, Atü tso vori molu vele neko tü tsosü bayo.

⁷Cejüo neko ngometsü taho, vele ango metsüte, kekrelamori I zhopo thipü süo metsu kesüla, süo mhathoko kesu zo tila.

⁸Neko ta thenyelü khote, I thenye sülü khohote, kekrelamori atü tsotü vori molu tila.

⁹Pü jü hiko po kevasa Galilee lü basata.

¹⁰Vele püsazü jürako takho ketasa püri thenyelü khota, melemelu zode khomo vele kemekhrü pübi.

¹¹Süce Jews miko thenyelü püphu de, pü dipüce vota?

¹²Thümako pü ketso de mebü bata, kekrelamori humi poti, pü thüma kevele; kekreko poti, Mole, pü thüma shüketse ta tele.

¹³Kehothi sheri mipüri Jews miko mpe tila chozu jüpo zomo.

¹⁴Thünye metsu hice pü ta kereshücelü vo de mi metha bata.

¹⁵Jews miko ungo shuta de poti, thüma hio dipübi mhase phita, pü lesiphri mo zo sheri?

¹⁶Jisu ukoce poti, akemetha jüko azhümo vele aketsü kesüo.

¹⁷Thüma kehopüri Jihova medo thiyo süze akepo jüko se yito, Jihova celü vori me, mode atho amedo jüpo ba sheri.

¹⁸Somi pütho püju poba sheri pü thechu therho phu bayo, vele pü ketsü kesüo la thechu therho phuyo lize süo zhopo kethozo, matho mezi kemo püri püyo tamo.

¹⁹Moses thezho khapü neko tsüsü mome, siri neko mipüri thezho züta mote? Neko dipüla adokhri keta lüba?

²⁰Thümako püfü kela kesü, mipüri ndokhri keto rhü bamozo, therü kesu n yo keba la zotho?

²¹Jisu ukoce pode, I mhathopü thisü mu neko ngophite.

²²Moses yikerü khapü neko tsü, süo Moses mori neko potsa neko khasü; neko Sabbath tüsozho nha yirüyo.

²³Mhace mipü Sabbath nha Moses zho varhü mo ketola yirü lizo I Sabbath nha mipü thi kesürho tso kesüla dito amejo ayo neko nü moya?

²⁴Umhüpü kengola sheco thi hite, vele sheco kemezilü thite.

²⁵Jerusalem lü kevori thüma humi poti, uko pü dokhri vanyü phu keta thüma hio zo mome?

²⁶Hice pü mimhüngoce thepu shude zhopo thi sefü bate, vele mipüri mhapo mote. Kezhomiko hiohi Messiah zole ti seba teme?

²⁷Kehothisheri uko thüma hio dipüce vori sheri seba; vele Khrista vori ketosü mipüri dipüce vori to sheri seho.

²⁸Jisu kereshücelü jüpo meto shude poti, neko I dipüce vori sheri seba mu ase riba, I amedolü vorimo, vele aketsü kesüo lazo ketho, neko süo semo.

²⁹I püseba kekrelamori I pücelü vori zo tila, pü aketsü süzo.

³⁰Sizi kebace uko pü tüyi keto lüta, vele mipüri ube cho püyo sümo, kekrelamori pütü tso molu tila.

³¹Thüma kekro pü melüyi, de poti, Messiah kevorice zasi ungo mhathoko kethi thüma hioceri thi mekroku sü tome?

³²Pharisees miko thümako kepo keba sesü, mu Pharisees miko ri mu thevo kezhoko ri kesa de kezhoko ketsüpü pütü tole sü.

³³Sütüce Jisu poti, pütü kedopü I neko züba tolu, mu süsa I ta aketsü kesüo ce votato.

³⁴Neko aphuto vele ango yiho, I dipüce bata sheri neko sülü vori yiho.

³⁵Jews miko kepode, pü dipüce vota tole bata, uko püngo mota ketosü? Pü ta Jews kemoko (Gentile) koce vota tole bame, side süko metha ta tome?

³⁶Pü keposü dipüco po bata, neko aphuto vele ango yiho, akebara neko vori yiho?

³⁷Thenye thelatho nha, Jisu thade po kebace, thüma kehopüri theri ketako ace vori de krayite.

³⁸Amelü keyimi ketholesi popü kemeta püvalü kerhü jüri rela prarito.

³⁹Vele pü kepo hiohi Kemesa Rüpü poba, pü kemelüko ngoyi keto, Kemesa Rüpü hitüce khasü molu, kekrelamori Jisu zapozale thiyi molu tila.

⁴⁰Jü hiko se keyice thüma kekro pode, Hihi saju kepomi ta zo kethole.

⁴¹Kekreko poti, Hiohi Khrista tazo. Vele humi poti, Khrista Galilee lü voriyi veme?

⁴²Ketholesilü kepo Khrista David shuyelü vori tole siba. Mu Bethlehem rünalü, David kevori lü.

⁴³Süla thümako dolü kejükre salata pü lano.

⁴⁴Humi pü tükeyi lüsü vele mipüri ube chopü püyo sümo.

⁴⁵Kezho miko ta Phariseeko mu thevo miko ce vo, de ukoce poti, neko ditono pütüzü pü vorima?

⁴⁶Kezho miko po kesü, Mipüri pübide jükepo dile.

⁴⁷Pharisees miko po kesü, nekori püpo neko kedo valume?

⁴⁸Mikekha yo tiko mu Pharisee miko mipüri pü melü ta motho?

⁴⁹Vele thüma hiko thezho se kemoko reshu ve.

⁵⁰Nicodemus ukoce poti, (theva Jisu ce kevoo), püri uko mipü.

⁵¹Uko thezho mipü reni mozo de mejo keva thezho ba motho, pü dipü thita sheri reni ketso ti mhüjü.

⁵²Uko sü püce posala de, nori Galilee mipü zome? Phu (pe) te ketho lesilü, saju kepomi mipüri Galilee lü vori mozole.

⁵³Uko metü ta utho ucelü vota.