Read Chokri Naga JOHN 8 Bible Online

JOHN 8 - Chokri Naga bible

JOHN 8

²Keshu rena pü ta kereshücelü vori, thüma kro ta püce vori; pü bayi de uko metha.

³Thezho keseko mu Pharisee miko theno mipü thepu khrü bade pütüpü Jisu cevori, uko süpü khapü metsulü süsü.

⁴Kemethao, theno hipü mha kesu thizo kebalü pü tü yite.

⁵Moses thezho khapü hako ketsü ketsüpü sübi ketako vakhri vate zisü; vele no kedipü pota?

⁶Uko jü hio kepo pü kejo tüyi ketola zo, side pü mejo ketola. Vele Jisu neküki pü becüne khipü cejü (renyoyo) tho de pü uko fü se kemo bi bata.

⁷Süla uko pü ketso sasa bata, sizi kebace pü tha medü süri de ukoce poti, Neko dolü kephoma kediopo ketsü pü püva mera süte.

⁸Süsari pü nekü salaki renyoyo lesikho tho bata.

⁹Uko süo sekesüce utho ulü mejo ketala, mipüpü redüta, pethithoo celü shudü de natsitho ketso taprüta; Jisu lebi keba zota thenopü uko dolü metsulü thazori.

¹⁰Jisu tha medü süri tice mipüri dita, Jisu mu thenopü ni lebita; Jisu püce poti, thenopü nmejo ketako dipüce vota? Mipüri nmejo moteme?

¹¹Thenopü poti, Niepoo mipüri mote. Jisu püce pode, I sheri nmejo ho, tavo tate, mu kephoma thi sahite.

¹²Süsa Jisu ukoce poti, I cejü keveo zo, kehopüri asa kemejimi mhapü ceri kezülü taho, vele kehü kevelü tato.

¹³Pharisee miko püce poti, Ntho nzhopo thiyo, mu nzhopo kethomo.

¹⁴Jisu uko fü kela kesü, Atho azhopo thizo sheri azhopo kethozo; kekrelamori I dirapü vori sheri mu dipüce vota to sheri seba tele; vele neko I dipüce vori mu dirapü vota to ba sheri poyiho.

¹⁵Neko uthi upho relelü sheco thiyo, I mipüri mejo yomo.

¹⁶I mhace mi sheco thizo sheri asheco sü kethozo, I alebi tamo, vele a Po aketsü kesüo hani ta.

¹⁷Neko thezholü sheri thopü meta, mikena zhopo sü kethozo leno.

¹⁸Atho azhopo kethi mu a Po aketsü kesüo azhopo thi tazo.

¹⁹Süsa uko püce poti, n Po dipüce ba? Jisu pola kesü, neko asemo mu a Po sheri semo; neko ase süze a Po sheri sete vele.

²⁰Jü hiko kepo Jisu uko fü kela kesü, pü kereshücelü mi metha kebace; mipüri ube chopü püyo sümo, kekrelamori pütü tso molu tila.

²¹Süsa Jisu ukoce posala kesü, neko aphuto vele ango yiho, mu neko kephomalü sa tato; I dipüce vota to sheri neko akevolü voriyi kehola.

²²Süsa Jews miko poti, Pütho pü dokhri va to bame? Kekrelamori pü poti, I dipüce vota to sheri neko tavori yiho.

²³Pü ukoce poti, neko mekhroco kevorimi, I mesoyo kevorimi, neko cejü hiolü thüma, I cejü hiolü thümamo.

²⁴Süla I nekoce kepo neko nekephomalü sa tato; kekrelamori mhace I nekoce kepo I zo, sizisü zori neko melümo ketala; nekephomalü sa tato.

²⁵Süsa uko püce poti, No sopü lezibata? Mu Jisu ukoce poti, therathoce I neko ce kepoo zo.

²⁶I mhakekro nekola po keto mu mejo keto ba, vele I ketsü kesüo sü kethozo, I mha süko pü cejüo ce po süte, I pücelü se keyiko.

²⁷Uko Poo ju se yimote pü ukoce posü zori.

²⁸Jisu ukoce poti, neko thüma Nuo phumesü kesüce seyito, I süo zoleti, atho ala I mhapüri thita mozo, vele Poo a ketsü kesüo ametha kesüko lebi, I süko pü poyo.

²⁹Pü aketsü kesüo azü tazo, a Po akhava mozo, kekrelamori I pünü pümedo lebi thi süta zo tila.

³⁰Pü jü hiko kepola thüma kekro pü melüyi.

³¹Süsa Jisu Jews miko pümelü ketakoce poti, Mhace neko ajü melüyi ta lizo neko asaji miko tazo.

³²Mu neko kethoo seyito, mu ketho-osü neko phrü vato.

³³Uko püfü kelade, hako Abraham shuyemi mu mhapü nhari mijü thimozo, no dipüla neko phrü vato siti poba?

³⁴Jisu ukoce poti, I nekoce Ketho potü süto, Kehopüri kephoma thi ketami kephoma jü thi tazo.

³⁵Mijümi kechothe micelü basü yomo, vele Nuo kechothe basü tayo.

³⁶Mhace Nuo neko phrüsü ta lize, neko phrü süva kethozo.

³⁷I seba, neko Abraham shuye zo, vele neko adokhri tole rhü bayo, kekrelamori ajüko nekolü bayi mo ketala.

³⁸Apo I ngo kesüko pü nekoce hala süyo, neko a Po celü se keyiko thiti mesü.

³⁹Uko püfü kelade püce pokesü, Abraham hako Potsa. Jisu ukoce pokesü, Mhace neko Abraham nuneko lize Abraham mhathoko thiti mesü.

⁴⁰Vele neko adokhri vanyü bate, thümapü nekoce ketho I a Po celü sekeyiko püposü; Abraham sizimo.

⁴¹Neko neponeko mhatho thiyo. Uko püce po sala kesü, Hako kephoma mhatho kesulü menu yimo; ha Po püba mu süo Jihova zo.

⁴²Jisu ukoce poti, Mhace neko Jihova neko Po lize, neko akhrüto; kekrelamori I Jihova celü tavo rizo; atho amedolü tavo rimo, vele pü aketsü süzo.

⁴³Ditono neko afü seyi mota? Neko sheri akepo seyi mozo.

⁴⁴Neko po sü therü kesuo zo, nekopo kemengu (kecülu) ko thi tayo. Pü shüculü mi kedokhrimi, ketho-olü bayi yomo, kekrelamori ketho püyo kedila. Pü kemeda po süyo mu pütho püyo kevela poyo, pü kemedami, mu pü süo po-ozo.

⁴⁵Kekrelamori I ketho kepola neko melü mote.

⁴⁶Neko sopü apü kephomami le ziti poyi ve? Mhace I ketho po lize neko dipüla amelü mota?

⁴⁷Somi Jihova füse sheri Jihova jüzüyo, neko süko se yomo kekrelamori neko Jihova Ma motila.

⁴⁸Süsa Jews miko püce poti, Hako pomeve shu süzo, no Samaritan mipü therü kesu n yo ba?

⁴⁹Jisu po kesü, therü kesu ayo bamo, vele I apo rhoyo, neko arho yomo.

⁵⁰I atho atherho phu yomo, mipü süo phuyo mu mi mejoyo.

⁵¹I nekoce potü süto, mhace humi ajüko khipü bayi lize pü mhapü ceri sa taho.

⁵²Jews miko püce poti, hako se bate, therü kesu nzüta. Abraham sate, mu saju kepoko ri sate; mu no poti, mhace neko akepoko züyi lize thüma süo mhapü ceri sa taho.

⁵³No hako potsa Abraham ce zho kume? Pü sate, saju kepoko sheri sate, no sopüle po bata?

⁵⁴Jisu ukoce polakesü, Mhace I atho azhopo thita lize süo kethomo, a Po azhopo thiyo de arhoyo, neko pükhapü neko Rüo le kebao.

⁵⁵Sizosheri neko pü semo I püseba, mhace akepo I püsemo zita lize neko biti I kemedami thi tato, vele I pü seba mu pükepoko thitazo.

⁵⁶Neko potsa Abraham atüsozhoko ngode pü rechü tazo, pü süo ngotila I anü we.

⁵⁷Süsa Jews miko püce poti, No tütse hepüngu ri molu zori no Abraham ngola?

⁵⁸Jisu ukoce poti, I nekoce potü süto, Abraham mhüjü I tazo.

⁵⁹Süsa uko ketsü khipü püva toli süta, vele Jisu resüta, mu kereshücelü pü taprata; uko dolü tapra de pü tata.