Read Chokri Naga MHATHOKO 1 Bible Online

MHATHOKO 1 - Chokri Naga bible

MHATHOKO 1

¹Hei, Theophilus I vakerao lesi tho kesü Jisu therace mhatho kethi mu mi metha keti ju thosü.

²Püzü tüyo khota kemothe, süsa pü Kemesa Rüpü lü jü khapü kedakeyi Pü methakeyiko tsüsü.

³Pü kemezhe kevasa pümerhüpü mipo püngosü püco kekre ketilü, tüsozho hedapü mimhüngo thi, Jihova kede kethi juko pü po.

⁴Mu süko züvo kengusü de ukoce poti Jerusalem lü tata hite sisü, vele u Po püjü kha kesüo fübate, Hihe, neko acelü seyite.

⁵Kekrelamori John zono jülü nekopü jülopü sü vele neko lano hisa zho choba kemolü Kemesa Rüpü lü jülopü tato.

⁶Uko vo kengu keyice uko pü ketsoti “Niepoo no Israelmi kede khasü tatome”?

⁷Pü ukoce poti, neko lazono pütü mu kedi kethice to sheri seyiho, Pootho pü kekulü süko khiba.

⁸Vele neko keku ngoyito, Kemesa Rüpü neko yo vori keyisa; neko azhopo thi Jerusalem, Judea, Samaria mu cejü vala ketso voto.

⁹Pü mha hiko po kevasa uko püpe kebalü püzü tüyo khota, kemhüpü voride uko mhüngolü püzü tata.

¹⁰Püzü kho ketala uko tüyope mhüdemo bari, Hihe, mikena fü kemega süde uko khüce thade ngoyi.

¹¹Uni ukoce poti, Ne Galilee thümako, dipüla neko tüyo pezo bata? Jisu hio neko dolü zü tüyo kho ketabi hihi bide pü lavorito.

¹²Süsa uko Olivet cejütuyo ta sala Jerusalem lü vorita, Sabbath nha revu chotalü.

¹³Uko tavo kengu keyice celü kerekrüo (mesoyo) bayi, sülü Peter, James, John, Andrew, Philip, Thomas, Bartholomew, Matthew, James Alphaeus, Simon Zealot, mu Judas, James hiko metü ba.

¹⁴Uko metü lüpü thide kechothi mu umezhe melo, thenomiko riba mu Mary Jisu zu risa mu Jisu sazüko ri saba.

¹⁵Hitüce Peter kemelümiko dolü sütha bayo, metükesa thüma krapü mecü kezüba.

¹⁶Akhreko ketholesi jüko thitso ketola, thajü David talü Kemesa Rüpü popü kemetako Judas (Iscariot) michotha süde mipo Jisu tüzü taketa.

¹⁷Kekrelamori püpü uko saphriyi de yitho lü ukozü keza.

¹⁸Tsühi yipü thüma hio mesakemolü khripü metate, püpi meso de retute, pü kesü phrepha va, pübü püsü püra metü kesüla ve.

¹⁹Theju süo Jerusalem lü kehüko metü se bate, yi süo cüpü Aceldama püco “Thüza yi.”

²⁰Kekrelamori Süo ju ketholesi Cheleko thopü meta, “Pü kehüthi po mechü tate, mipü pori sülü hü hitate, mi kekre püpo püsülü yitho thi tate.”

²¹Süla mipü Jisu uko dolü tapra talü ketace uko zü tatipü.

²²John mipü jülompü ketilü shudü de tavo uko dolü püzü khoketa nha ketso, mipü züpü uko züde rhüla kesü zhopo thita moze su.

²³Mu uko mikena kethayi Joseph cüpü Barnabas leziyo, mori cüpü Justus le sizi riyo, mu Matthias ni.

²⁴Uko kecho thisü, “Niepoo no thüma lüdo metü se, hini dolü sopüpo n medolü kedasü to sheri thatü süte.”

²⁵Püpo apostle yitholü mhathi to sheri, Judas retu vajo keta sülü, süo thethilü.

²⁶Uko heve hesu (chethikhele) thisü, sülü Matthias khiyi ta, mu uko pü phripü apostleko mi keripü sa phri yita.