Read Chokri Naga MHATHOKO 11 Bible Online

MHATHOKO 11 - Chokri Naga bible

MHATHOKO 11

¹Apostleko mu kemelümi Judea lü kebako Gentiles kori Jihova jü thimzüyi keta sesü.

²Peter ta Jerusalem lü khori, süce yikerüko püzü kemelita.

³Uko poti, no yirükemoko ce vo ukozü mhati.

⁴Vele Peter ukoce theralü dipü thita sheri pozovo tsosü.

⁵I tavo Joppa nadelü kecho thiba, siri zümholü I mhapü ngo; mhabüpü kiri, tüyo mhabü kezhopü küda thi kiri, süo ta ace kirita.

⁶I süo amhüpü pe türü kebace cejülü uphe kepü pheda khonu, gu ketako ri mu türako ri ngo.

⁷Thefüpü ace kepo se, Peter tasüte, de khonuko dokhri pü tite.

⁸Vele I püfü kelasü, Hole, Niepoo, mhakeho mesakemo püri atalü süyo mo zole.

⁹Mhafü süo tüyo kiri ace posalasü, Mhakedipü Jihova thi kemesa sü sheri no süo po merho hite.

¹⁰Mha süo vasü thipü amengosü, süsa süko pü tüyo lakhota.

¹¹Hihe, siziba metha, Caesarea lü misü ketsüpü akeba celü aphu vorita.

¹²Rüpü apo süko zü tavono sita, mhapüri kelüdu hino zi. Kemelümi hiko mi shurü azüde tavo, hako ta thümao celü vo.

¹³Pü hakoce tüyo choyimipü ngo, pücelü, tha de püce poti, thüma ketsüpü Joppalü süte, Simon püza thopü Peter thi ketao cü süte sizi püce po sülezi.

¹⁴Pü nce jüko po süto, no mu ncekroko kelayi ketola.

¹⁵I jüpo shudü kebalü Kemesa Rüpü ukoyo kuta, therace ukoyo vo ti bide.

¹⁶Süsa I Niepoo jü dipü posü sheri rekra vorita, ‘John jüpü jülo khasü, vele neko Rüpülü jülo khasüto.’

¹⁷Mhace Jihova ukoyo sheri mhaphrü kemhati uko Jisu Khrista melü keyice bide ngoyi ta lize, I sü sopüle zide, Jihova mhathoko khava yiveta?

¹⁸Süko se keyice uko kemekreta, side Jihova chuta, side poti, Süsa Jihova thelü rede keyi mu kerhü ngo keyi khapü Gentiles kori tsü süte-ese.

¹⁹Hitüce kehu kemethila uko phopü preta Stephen yolü, uko ta Phoenicia, Cypres, mu Antioch ketso vota, zhopo thi Jews mi dolü sasü kekremi ce sümolu.

²⁰Süko dolü humi Cypresmi, mu Cerenemi ta, uko ta Antioch lü vori, side Greek (Hellenists) koce Niepoo Jisu zhopo thisü.

²¹Niepoo be uko züta, thüma kekro melüyi de Niepoo ce vorita.

²²Theju hiko sevo Jerusalem lü kehuko nilü tsota, uko Barnabas ketsüsü, de tazo Antioch ketso vo.

²³Pü tavo Niepoo ngokemezhe ngode pünü phita, side uko tarho thi kethepu sü, ukopo umelü pü Niepoo yo tha kemetü yino posü.

²⁴Kekrelamori pü thüma kevepü, kemelü kemetü, mu Kemesa Rüpü püchupü ta tila, thüma kekro sapü Niepoo cesü.

²⁵Süsa Barnabas ta Tarsus lü Saul phu vota.

²⁶Tavo püngoyi de zü Antioch lü vorita. Tütsepü metü kehuko zü bata sülü, kehuko metha shusü. Sajiko cüpü Christian miko zikeyi Antioch lü cü theratho thiyi.

²⁷Pütü hitüce sajukepoko Jerusalem lü ta Antioch lü vori.

²⁸Uko dolü mipü püza Agabus, Rüpü lü zasi tha kesü cejü metülü kemekre vori ta keto posü; Claudius Caesar tüce vorita.

²⁹Süsa kemelü sajiko mipüpü thiyi kevedü kekhrühi ketsüpü usazüjürako Judea lü hükebako tsüsü keto rhüyi.

³⁰Uko süo thipü ketsüsü, Saul mu Barnabas ni belü ketsüsü.