Read Chokri Naga MHATHOKO 12 Bible Online

MHATHOKO 12 - Chokri Naga bible

MHATHOKO 12

¹Pütü süce Herod kedeo pübe kemethi chopü thüma humi kehulü ketako yo süta.

²Zechopü James John jürao dokhriva.

³Jews miko süola uko nü keta pü ngo, side pü Peter ri tüyita. Hitüce khre khasü kemo tsükhri nye thiba.

⁴Peter tüpü thejü celü khapü mezüva, cebü hadalü thipahemi po fü bata, pükelü cukevo nye nha püpüvo thümako mhüjülü sü keto lüba.

⁵Sülano Peter khapü thejü celü kha mezü, vele kehuko tümozode pula Jihova ce kecho thi zoba.

⁶Herod püzü prari ketonha, süzi tüzülü Peter thipahemi kena dolü zü kebalü, thegi ropha kenapü pha mezü, thejü kefüko cekha kolü fütha.

⁷Rekri tüyo choyi mipü ta püce lüri de thejüce va vekrüta, side Peter kekhusü, pükhüco, de püce poti, Tamha süte! Pü bekhani pübeyo rezüta.

⁸Tüyo choyio püce pode, nchepha yite, mu npheku pü yite. Pü sübi thiyi. Nfü be yite de asa meji yite.

⁹Pü tapra de püsa meji vota, tüyo choyio dipü thisü sheri pü mhapüri lü vorimozo, pü kelüce zümhopü makeba bizo.

¹⁰Uni ta cepra kenalü cuprata, side ta nadelü thegi kharü lü vota; cekha süo pütho khripü uni tsüsüta: sizi ketasa tüyo choyio pü khava.

¹¹Süsa Peter püsa lüvorita, tsüsahi asa setüyite, Niepoo pü choyimi ketsü atsü süte, Herod belü akela süte, Jews miko kemerilü ri akela süte.

¹²Pü chota kezhu mha süko lü kebalü ta John zu Mary celü vorita, John püza thopü Mark thi ketao, thüma kekro sülü kecho thiba.

¹³Peter tavo cekha ketusü. Reli mipü püza Rhoda tavo püfü renisü.

¹⁴Theno süpü Peter fü sesü, reli süpü pükenüpü cekha khrisü mota, vele ta rekri ukocevo, Peter cekha ce tha keba posü.

¹⁵Uko püpü no nyo bate sita. Vele relipü poti sizo kethozole zita, uko puce pode, pükhri zole sita.

¹⁶Vele Peter cekha kedü zo bata, uko tavo cekha khri kesüce püngoyi de uko ngo phita.

¹⁷Vele pübe chopü ukoce pode füphra hino posü, Niepoo kedipü bide püü thejü celü prasü shi tiko posü. Pü ukoce poti, “mha hiko pü James ce mu usazüjürako ceri posüte.” Pü redekhi thethi kekrelü vota.

¹⁸Tüso prari ta metha thipaheko dolü mha kebu shuta, Peter yo dipü thita sheri.

¹⁹Herod püphu medi kevasa püfü kebako pü dokhri vano posü. Pü Judea lü tasü Caesarea lü vo bata.

²⁰Tyre mu Sidon koyo Herod pü nümo shuta, uko füpü thide ta püce vori; kedeo cene kekhio Blastus zü khretho thiyi, side püzü vethori thiyita; kekrelamori uko kedeo rünalü cene khipü uko rüna khrühi yo tila.

²¹Tüso khimekre keti pünha Herod kede füne khipü keretsoyi, de kedebayo bayi, thüma koce pü jüposü.

²²Thümako semeto de püchu keti, “süsü therümi füphra zole, thüma fü mole” sisü.

²³Rekri Niepoo tüyo choyimi püvüva, kekrelamori pü zapozale pü Jihova tsü kemola; sathi po pütiva de sata.

²⁴Vele Niepoo jü ma keye mu kroku ta.

²⁵Barnabas mu Saul nit a sala Jerusalem lü vorita, uni zhopo thi ketoko tso kevasa, uni John püza thopü Mark thi ketao zü tavori.