Read Chokri Naga MHATHOKO 14 Bible Online

MHATHOKO 14 - Chokri Naga bible

MHATHOKO 14

¹Sübide Paul mu Barnabasni ta Iconium lü kevoce uni ta Jews kereshücelü lü, de jü posü side Jews kori mu Greek kori kekro melüyi.

²Vele Jews melükemoko Gentiles kemelüko lü thimesu püsü usazüjürako metsusüta.

³Uni pütü kecho sülü bata thepu shude Niepoo jüpo mu ngokemezhe zhopo thi sü, ubepü zasiko mu ungo mhathoko thisü.

⁴Vele nadelü thümako kezata: humi Jews kro züta mu humi kemelü krolü vorita.

⁵Jews miko, Gentiles mu rüna kekha yo tikori kesa de uniyo mhatho kesu thi keto rhüta, uni meshu mu ketsü khipü va keto thita.

⁶Apostleko süko seyi ketala ta nadekolü vota, Lystra, Derbe, mu Lycaonia kolü mu sükhükolü vota.

⁷Uni sükolü Jüyikeve zhopo thi zo vota.

⁸Lystra lü mipü püzu valü pheyho zode menu keyi mipü, vapüri chode tayo kemopü.

⁹Paul jüpo keba reni püpe zoba ta, Paul püpe türü kesüce pükemelü sürhoyi keto baketi ngoyi.

¹⁰Pü füphra meto de, “npheyo tosütha süte.” Siri pü rehü süthayi de chota yita.

¹¹Thümako Paul mhatho thi kesü ngo, uko Lycaonia mifü phra meto de poti, “therümiko thüma hü thipü udolü vori bate” sita.

¹²Paul pü Mercurius rüo thi mu Barnabas pü Jupiter rüo thita. Kekrelamori Paul no jükepo-o thi tila.

¹³Süsa Jupiter kereshü thevoo uko mhüjü nadelü bayori thodoko mu menyepüko khipü kharülü vorita, side thümako zü kereshü thipü uni reshü to süta.

¹⁴Barnabas mu Paul apostleni süse kesüce uni füneko cekhrota, de tasü thümako dolü se vota.

¹⁵Uni poti, ne kezhomiko dito hibiti thita? Hani sheri neko bi thümazo uthi upho kebamizo, jüyikeve pü neko cekepo nekopo kemethu hikolü redeyi, de rhüketa Jihova tü mu cejü, jükezho, mu sükolü ketako metü thi kesüo ce vori tate.

¹⁶Voketa tükolü shuyeko khapü utho umedo chokolü ta vori zo.

¹⁷Sizizori zhopo kedithi pütho pü khavamo zo, mhakeve kethilü, tüyo tümerüpü uketsü, pütülü raseko mehü kesü, umelü thipü unü ketiko mu keticoko sheri kha uketsüko.

¹⁸Jü hiko posü zo sheri uko kethüyi mozota, de kereshü thipü uni reshü tole zota.

¹⁹Jews miko Antioch mu Iconium lü kevoriko thümako hüpü ukopo ketsüpü Paul vata, ketsüpü püzhe kevasa uko pü süsapü chozu vota, uko kelüce Paul satele lüba.

²⁰Vele kemelü miko tavo pü hutuyi, süce pü tasüri de ta nadelü lüta; mu süsanha pü Barnabas züde ta Derbe lü vota.

²¹Uni nade sülü zhopo thi kesüsa thüma kekro methasü, uni tala Lystra, Iconium mu Antioch lü vota.

²²Süsa uni tavo sajiko thi kemetü mu thi kethepu sü, de ukopo kemelülü tha metü ba zono sü, kemezhe keti kekrolü ta Jihova kede kethilü vo ketola.

²³Uni ta kevolü kehu pethi mehi kedasü, kechothi mu mevode, Niepoo zalü khapü uko melüsü.

²⁴Uni ta Pisidia metülü püthüvo de ta Pamphylia lü vori.

²⁵Uni Perga lü jü zhopo thi kesüsa ta Attalia lü kita.

²⁶Sülü uni ru thopü ta Antioch lü kho salata, Niepoo kekhrülü mhathoko thikhrü keyi kola.

²⁷Uni ta vori keyice kehuko vori kenguyi, sükoce Jihova uni züde mhatho kethiko popü mekasü, dipü bide kemelü cekha khripü Gentileko tsü sü sheri.

²⁸Sülü uni pütü kecho sajiko zü bata.