Read Chokri Naga MHATHOKO 15 Bible Online

MHATHOKO 15 - Chokri Naga bible

MHATHOKO 15

¹Judea lü sazüjürako thümahu voride kemethathi poti, neko Moses zho züde yirü kemosa kelakeyi ngoyiho.

²Paul mu Barnabas ni süko zü kekre phita mu uko zü kemelita, sülü kepo keyi Paul, Barnabas mu sazüjürako humi ta Jerusalem lü kho de sülü apostleko, mu mehiko zü jü hiola kepono sisü.

³Süla kehuko uko ketsü kesüce uko ta Phoenicia mu Samaria kolü püthü vo, Gentileko thelü redeba keta popü ukoce sü, süla kemelü miko metü unü shuta.

⁴Uko ta Jerusalem lü vori tice, kehuko uko mesoyi, apostleko mu mehiko ri, uko Jihova mhathoko metü popü uko kasü.

⁵Vele sülü Pharisees kropü kemelülü vori keta ba, Yikerü sü thimo suzo zita, ukopo Moses thezho kha kesüko zümoze su.

⁶Apostleko, mehiko vori kezüde mha hio keti moze suta.

⁷Sülü ketü shuta, sizi kebace Peter süthayi de ukoce poti, “Thümako mu sazüjürako, pütühu vo ketace nekori seba, Jihova uko dolü keda kesü, Gentiles kopo atalü jüyikeve seyi mu melüyi no posü.

⁸Jihova mimelüko keseo süo zhopo zo, Kemesa Rüpü khapü uko tsüsü ukoyo thi kesü bide.

⁹Uko mu uko zide kelakre keti bamo, kemelü khipü uko melü thi kemesa sü.

¹⁰Tsühi, dipüla neko Niepoo medephi bata, voce khapü sajiko volü dusü to züme, upotsaneko mu uko sheri thi mu züyi ho ketako?

¹¹Vele Niepoo Jisu Khrista ngokemezhe yono uko kela yito mu uko sheri.”

¹²Süsa thüma metüko kemekre zü zi bata, mu Barnabas mu Paul nipo jüpo, Jihova ungo mhathoko mu zasiko uniyo thipü Gentileko dolü kesüko posü.

¹³Uko metü kemekre züzi batari, James tasü jü poti, “asazüjürako, afü reni süte,”

¹⁴Simeon (Peter) Jihova therace dipü bide Gentileko pesü sheri posüte, thüma süko khiphrapü püzalü süyi ketola.

¹⁵Hihi saju kepoko jüko zü kekhüba, hibi thopü meta:

¹⁶Hisalü I tavorito, tavo David kereshüce thi sala süto, retuzü ketao, nrhü ketao ketso sala yito, side pü metha süto.

¹⁷Thüma mehapü ketakopo Niepoo phu vorito, mu Gentileko metü, aza cükeyiko metü, Niepoo sizi posü, pütho hiko metü thisü.

¹⁸Jihova pümhathoko metü cejü thikeyi theralü se bazo.

¹⁹Süla akelüce uko Gentiles mi Jihova ce vori kezüko kebü hize veto.

²⁰Vele uko lesi thopü uko tsüsü ketoko, ukopo marhe kereshüko, kekhrükezü, keropü khonu gukhri, mu thüza hikolü ukethü yi moze su.

²¹Kekrelamori thajü zori Moses ju phripü nade metülü sütazo, deoba nha synagogue kolü.

²²Süsa apostleko, mehiko, mu kehu metü umedo unüta, side uko dolü thüma kedapü Paul mu Barnabas ni zü Antioch lü vo ketola Judas, püza thopü Barsabas thi ketao, mu Silas uko sazüjürako dolü krüta kemeleko.

²³Uko lesi hibi thosü, “Apostleko, mehiko, kemelükroko, kelü kesü pü sazüjüra thi keta Gentileko Antioch, Syria, mu Cilicia lü kebako ce süzüho.

²⁴Sekeyi thümahu hako celü ta nekoce kevoko jükopü neko kebü sü keta sesüte, ukopo jü süko posüte zimo; nekopo yirüte, mu thezhoko züte sizi sümo: mhapo kesüko la neko lü relümo mu neko kebü bate.

²⁵Kepokeyi hako metü lüpü thide thümahu hako dolü kedapü kekhrü Paul mu Barnabas ni sa ketsüpü nekoce sü züho.

²⁶Thüma hiko Niepoo la kemeche lü upho kha kesüko, Niepo Jisu Khrista zala.

²⁷Hako süla Judas mu Silas ni ketsü süzüho, unitalü jükopü nekoce posüto.

²⁸Kekrelamori hako kelü mu Kemesa Rüpü medo kevelü mha kemele hiko kezüpü neko pü thimeshi sü moze veketo kepoyi.

²⁹Sükosü, nekopo themu khapü marhe reshü kevako tiho, thüza mu khonu keropü rokhri ketiko tiho, mu regürezhü ho. Mhace neko mha hiko züyi süze verizo. Vebayite.”

³⁰Süla uko ketsü süva, mu uko ta Antioch lü vota. Uko vori keyice thüma kekro vo kenguyi, uko lesio khapü uko tsüsü.

³¹Uko lesi süo phrisü mu uko rechüta side uko lüluyi.

³²Judas mu Silas ni sheri saju kepomi zo süla uni jüko popü kemelü miko tarhosü mu thelü tho melu shusü.

³³Pütühu uko sülü bata, side kemelü miko uko ketsü salapü apostleko koce süva.

³⁴Vele sizosheri Silas sülü basa nyü de bata. (Version hulü hio bamo)

³⁵Paul mu Barnabas ni Antioch lü basata thüma kekro sa, zhopothi mu mimetha Niepoo jüpü.

³⁶Tüsozho husa Paul Barnabas cepo, Khe, ami sala nadekolü vode thajü avu Niepoo jüpü zhopo thi kemetakolü ukromiko dipübiba sheri pesükhe.

³⁷Barnabas no John, püza thopü Mark thi ketao züta tole sizita.

³⁸Vele Paul no püzü tati vemole sita, pü Pamphylia lü uni khava de mhatho kolü uni zü tamo ketala.

³⁹Uni sülü ketü shuta, mu uni hunehu zü tamuta kekhota; süla Barnabas no Mark züde ta Cyprus lü rutho khi vota.

⁴⁰Paul Sila kedayi de tata, kemelükro Niepoo ngokemezhe lü uni ketsüsüva.

⁴¹Pü ta Syria mu Cilicia kolü kehuko pe vota.