Read Chokri Naga MHATHOKO 16 Bible Online

MHATHOKO 16 - Chokri Naga bible

MHATHOKO 16

¹Pü ta Derbe mu Lystra lü vori, süce, Hihe, sajimipü püza Timothy püzu Jews kemelümi mu püpo Greek mi.

²Lystra mu Iconium lü keba kemelüko püpo mveshu kebapü.

³Paul püzü tanyüta, püzüvo püyirüyi, kekrelamori Jews miko süce kebakola, kekrelamori uko kese püpo Greek mi tila.

⁴Uni ta nadekolü kevoce Jerusalem lü apostleko mu mehiko kehu kepo keyifü züyi node pü ukoce po vosü.

⁵Süla kehuko thi kemetü, mu kemelü thüma kro mama prarita.

⁶Uni ta Phrygia mu Galatia khükolü vo kezüce Kemesa Rüpü unipo Asia lü jü zhopo thihino khata.

⁷Uni ta Mysia lü vori de ta Bithynia lü ru thovo keto lüba, vele Kemesa Rüpü unipo vo muta.

⁸Uni Mysia vathü ta Troas lü kita.

⁹Tüzülü zümhopü khapü Paul mengosü, thümapü thade püce choti, ta Macedonia lü kiri de hako khrühi süthaze.

¹⁰Zümho süo ngo kesüsa hani rekri ta Macedonia lü ki keto rhüyi, Niepoo hani cüpü ukoce jüyikeve posüketo melü tüte.

¹¹Hani Troas lü rutho mezi Samothrace lü vo, süsanha Neapolis lü,

¹²Sülü ta Philippi lü vo, rüna süo Macedonia bülü kemelepü, Roman mipo kekhapü kebapü. Rüna sülü hani pütühu relü bata.

¹³Deoba nha hani nade sülü kerükhü tavozü, kecho kethi la süce bayi, thenomiko süce kebakoce jüposü.

¹⁴Thenomipü püza Lydia, kelo shüha loropü zhu bayo, Thryatira nadelü; pü Jihova kereshümipü, pü hani fü sesü Niepoo pülü khrisü, Paul jüpo kesüko reni menuyi.

¹⁵Theno süpü mu pücekroko jülo püyi, püpoti, mhace neni halüpü Niepoo kemelümi kethole zize tavori acelü bate. Thenopü sizide hani redata.

¹⁶Tüso pünha hani kecho kethilü ta vozü, relimi miceta püpü, therüzü kemedu tayo tipü zü kesüyi, urükeve kepo thenyümi kethila presa kekro krapü pü niepoko tsüsüyo.

¹⁷Süpü Paul hani sa mejizo tata, mu sefü poti, thüma hini Therü kerekrü thoo choyimi ho! Uni kelakeyi cho thapü uko meka sü toho.

¹⁸Thenopü tüsozho kekro sizita. Süsü Paul keyhu phita, süla Paul relesü rüpü kesuo cepode Jisu Khrista zalü thenopüyo tapra tate. Pütü bavüdo sülü taprata.

¹⁹Thenopü cepoko süo ngo side uko kepra kemeveko thiyi su keta la Paul mu Silas ni tüpü kezhoko kehu keba thethilü vota.

²⁰Uni tüpü shecoko mhüjülü vota, thüma hini Jews mi, unade hio kebü shute.

²¹Thezho kropü uko züyi keho thezho püpozüte, mori u Roman mi thajü züyo kemo.

²²Makro tasü uni metsuta, shecoko ufüne cekhro de poti, thegi sürüpü uni vüsüte.

²³Uni vü meshüshu kevasa, uni tüpü thejü celü süva de thejüce kefüopo pe menu bayino posü.

²⁴Jü kerü puce kepo sükola, uni khapü thejüce kerelütholü süva, side uni phekhüpü thegiro yo sü meta.

²⁵Meso tülu Paul mu Silas ni kecho thisü, tsale thipü Jihova chusü, süko metü thejü kethiko metü se.

²⁶Sizisü mu metha cece süshu vorita, thejüce mejuko metü kena shuta; mu thejüce cekhako khri yita, thejü miko phekhako rezüta.

²⁷Thejüce kefüo kezülü kesü mecova, thejüce cekhako khripü keba ngosü, pü zechopü pütho pü dokhri va tozüta, pü kelüce thejüko metü tata lizu ketala.

²⁸Vele Paul semeto de poti, ntho nmethi va hite, hako metü hice bazo.

²⁹Süsa pü mekeve chosü, de kegüpü vasü, mpe reshü zode Paul mu Silas ni mhüjülü chütü tsüta.

³⁰Uni züpra chozu uni ketsoti, Kezhoni! Apo kelakeyi ngoyi ketola dipü thita?

³¹Uni püce poti, Niepoo Jisu Khrista melüyite, size no mu ncekro sheri kela yito.

³²Uni püce Niepoo jüko püposü, mu pücelü kebako metü.

³³Pü bavüdo sülü tüzülü uni züvo kevükuko khrü kemesa va; side rekri uko jülo püyi, pü mu pücekro metü.

³⁴Uni zü pücelü vode ketico khapü uni tsüsü, rechüta, pücekro metü zü Niepoo melü yita.

³⁵Tüso vori ketasa, thejüce kefü kezhoo poti, thüma hiko khasü vate.

³⁶Thejü kefüo Paul ce süopü posü, shecomi nenipo tata ri ve sizi bale, süla neni tatate, neni nüde.

³⁷Vele Paul ukoce poti, uko hani vü shusü hani mejo keva thimo zo sheri, hani Roman mizo sheri hani khapü thejücelü sü; tsühino kemekhrülü hani khala süva tola? Sizi hozo! Ukopo tavori de hani züpra süte.

³⁸Jü süko thejü kefü kezhoo khivo shecokoce posü, süsa uko sekeyi uni Roman milezi keti meprü shuta.

³⁹Uko tavori de unipo pratano sita, ta nade saco votano zita.

⁴⁰Uni thejücelü taprari de ta Lydiapü celü vota; uni tavo ukroko ngokeyice uko thi kethepu mu lütho melu shusü de tata.