Read Chokri Naga MHATHOKO 2 Bible Online

MHATHOKO 2 - Chokri Naga bible

MHATHOKO 2

¹Pentacost kevori nhasü, uko metü thethi pülü kezü lüpü thi ba.

²Tüyo mhafüpü tükhra khrade fübi, tavo celü uko keba thilü chu yita.

³Meli thüma meyi bi ngota, tavo uko mipüpü yo bata.

⁴Uko metü Kemesa Rüpü uchu yita, de jü kekrekre ti pota, Rüpü jükepo kha uko ketsü bi.

⁵Jerusalem lü, Jews kemathomiko, tükhro shuye metülü,

⁶Füphra hio kesece uko ngota, makro mipüpü jü kekrekre tilü po mu seta.

⁷Uko ungo mu umhata, de hunehu cepoti, Hihe, uko metü Galilaean mizo mome?

⁸Dipü bide uko jü umeyi kekrekre tilü uko rethi bata?

⁹Parthians, Medes, Elamites, mu Mesopotamia lü kehüko jüri, Judea, Cappadocia, Pontus, Asia lü.

¹⁰Phrygia, Pamphylia, Egypt, Libya lü hu, Cyrene, Rome lü sekemoko, Jews mu Judakemoko Judah nani zü ketako,

¹¹Cretes, Arabians, uko seti utho ujülü urethita Jihova mhatho ungoti meyi thi süte.

¹²Uko metü ungota side seyisu ketala uko poti hihi kedipü cota?

¹³Kekremiko uko krünyüde poti thüma hiko hezo kesa kra mezü bale.

¹⁴Vele Peter uko mikeripüko zü thayi de se meto ukoce poti Ne Judea thümako mu Jerusalem lü kehüko neko hihi setüyite, de ajü reni süte.

¹⁵Kekrelamori hiko mezü thamozo, neko lü kebabi, tsühi bavüdo sü zolu.

¹⁶Vele hihi thajü Joel saju keseo popü metatizo.

¹⁷Pütü thelaco mha hiziti vorito Jihova pokesü, I a Rüpü rüpü nuhü metüyo süto, thepu nuko mu nenethenomiko saju poto, nene khresamiko zümho ngoto, mu ketsamiko umho mato.

¹⁸Athekümiko mu atheküpüko yo a Rüpü rü süto pütü süce mu uko saju poto.

¹⁹I tüyo zasi ungotiko thi mengo süto, cejülü sheri zasiko thi süto, thüza mu me, kemhü mekho.

²⁰Nace zü tato, khri thüza meve tato, Niepo kevori tüsozho kezho mhüjü.

²¹Süsa somino Niepoo za cüyi sheri sümi kelayito,

²²Ne Israel miko jü hiko reni yite, Nazarethmi Jisu Jihova medolü nekola zasi, keku, ungo mhatho, neko dolü Jihova püzü thi mu nekori se mu ngo süte.

²³Pü tüpü neko tsüsü süculü mharhü mu mejü sekeba Jihova medola, neko püpü Cross yo guve thüma kesuko belü pü dokhri ve.

²⁴Vele Jihova pü phü merhü süte, kesalü pü phrü süte, kekrelamori kesa kekupo pü tüpü bata ti thiyi ve motila.

²⁵David sheri püla popü meta, I Niepoo amhüjülü mejümera ngo süyo, kekrelamori pü azaco ta mu I mhapüri thathi taho.

²⁶Süla amelü rethu bate, ameyi sheri unü bate, sizomori athi apho sheri püyo kemerilü relü yito.

²⁷Kekrelamori no apho khapü mezalü sü vaho, mori no n Kemesao khapü kekalü sü vaho.

²⁸No kerhü cho thapü ameka kesü I seyite, nkebara apo anü tsüyi yo.

²⁹Ne Israelites aramiko, apono nekoce potü süte uko potsa David sü sate mu pü khrü riva, pü mhakhre sheri tsühi azü bazo tha ketso.

³⁰Püno saju kepo mipü, Jihova reshu de püce po kesü, nshuyelü (nsünralü) mipü uthiupho kethi pü nkedebalü ba yito.

³¹Pü mejümera sede po kesü Khrista rhüla kesü ju po, püpho khapü mezalü süva kemo, mori pümo sheri reta kemo.

³²Jisu hio Jihova phü merhü süte, süo hako metü kese kengo zhopo kozo.

³³Püthi kerekrüpü Jihova zaco sü kevabi, u Po pü püyi ketabi jükhapü kemeta (reshu) Kemesa Rüpü lapü süte neko se mu ngo keba hio.

³⁴Kekrelamori David tükoyo sütamo zori poti, “Niepoo a Niepoo cepoti, no azaco ba yite.

³⁵I nngomuko pü nphezho thiva kemothe.”

³⁶Süla ne Israel thümako metü se kemesa yite, Jihova Jisu thipü Niepoo mu Messiah thi süte, neko püpü gu kevao.

³⁷Süsa tsühi hio uko sesü, uko melü rhüsü, uko Peter mu apostleko cepoti, azüneko hakopo kedipü bize veta?

³⁸Süsa Peter ukoce pode, neko metü thelü redeyite, side Jisu Khrista zalü kephoma va keyi jülo pü yite, size neko Kemesa Rüpü mhaphrü ngo yito.

³⁹Popü kemeta jü neko la mu neko nuneko lazo, mu kemecuco keta miri la, Niepoo uko Rüo cü keyiko metü la.

⁴⁰Mu pü jü kekro posasü mu uko tarho risü, nushunuye kesuko dolü neko kela yite.

⁴¹Süsa püjü unüde khikeyiko jülo püyi, tüso sünha uko sa keyiko thüma piphi nye sü.

⁴²Uko ukhapü apostleko kemetha jüzü thi mu kemekro siba zota, tsükhri cephro ti mu kecho thi sizi bata.

⁴³Kemelü miko pepü merethita, ungo mhatho mu zasiko apostleko thi tata.

⁴⁴Melü keyiko kezü kengu bata, mu mhako pü zhürhü thita.

⁴⁵Uko mha uzhüko zhuyi, side kezapü thüma metüko tsü, mipüpü khimo kesu dü.

⁴⁶Uko kereshücelü tüsonha kezü lüpü thi de tsükhri cephroti, kecho thi, de hunehu celü mhati mu ulü kenü lebi po chupü bata.

⁴⁷Jihova chu, thüma metü po ukongo unü. Niepoo thüma khapü kehu sa mekro sü, tüsonha kelayi mo kesu dü.