Read Chokri Naga MHATHOKO 23 Bible Online

MHATHOKO 23 - Chokri Naga bible

MHATHOKO 23

¹Paul Council thümako pe türü sü de poti, thümako mu sazüjürako, I tha ketso kematho mu kemezilü hü tazo Jihova mhüjülü.

²Anania, thevo kezho-opükhüce kebakoce po, püta vüsüno posü.

³Süsa Paul poti, Jihova po nvüsüte, no sazho kemegao; kekrelamori no asheco thiketola bala, thezho kemolü avüsüno no pobale?

⁴Pükhüce kethako poti, no Therü thevo kezhoo meli tome?

⁵Süsa Paul pode, asazüjürako, pü thevo kezhoo leti I sebamo; kekrelamori thopü meta ti nethüma kekhayo timiyo jü kesu pohi.

⁶Vele Paul Saducees kori püco ba mu Pharisees kori kekreco bati lüyi, süla pü füphra meto de kehulü poti, Thümako mu sazüjürako, I Pharisee mipü, mu apo sheri Pharisee mipü; kesami rhüla kesü kemeri keba hiola tha ashe kepoba.

⁷Pü süpo kesüce Sadduceeko mu Phariseeko dolü kelakre sürita, side makro keza kena thita.

⁸Kekrelamori Sadduceeko kelü kesami rhüla kesü bamo, mori tüyo choyimi sheri, mori rüpü zo sheri, vele Phariseeko süko melüyo.

⁹Uko dolü kebu metota, Pharisees lesikeseko kropü süthade poti, Hako thüma hioyo mha kesu ngoyimo, vele rüpü mori tüyo choyimi püce mhapo lize uko Therümi zü kezhe bahi khe.

¹⁰Uko dolü kelakre shu ketala, thipahe kezhoo mpeta, Paul cethüphapha va ri sehomo, süla thipaheko ketsüsü de kemuthi uko dolü Paul züyi tano posü, de püzü kezho micelü khotano posü.

¹¹Süzi tüzülü Niepoo püce thade poti, Nnü yite, Paul, kekrelamori no Jerusalem lü azhopo thisü, sübi Rome lü sheri azhopo thisü mozesu.

¹²Tüso kebace, Jews miko humi kezü kropü thiyi de rephri reshu keti thipü bata, Paul dokhri va kemothe uko mhati mhakra hole zide.

¹³Uko thüma heda kezü mekhrü mhatho hihi thipü bata.

¹⁴Uko ta thevo kezhoo ce vo poti, hako reshu thipü bate Paul dokhri va kemothe hako mhapüri tiho.

¹⁵Tsühi, neko Council lü thipahe krapi kezhoo ce mhahu ketso menu sasü moze kesula leno sodo püzü kirite, pü cholü ta kiri tice hako pü dokhri va tomo.

¹⁶Paul lipü thepu mipü süko püfüla ba keta sesü, pü ta kezhomi celü khode süopü posü.

¹⁷Paul süo sekeyice, thejü fükebao cüpü püce süyi de poti, natsimi hio züpüvo thipahe krapi kezhoo ce süte, kekrelamori pü püce mhahu posü keto ba tila.

¹⁸Süla püzü tavo krapi kezhoo cesü, Paul acüsü de apo natsi hio züpüvo nce mhahupo süno bale.

¹⁹Süsa kezhoo pübe ceyi, de züpü thüma kedira vota, püce poti, mhakedipü ace posü keto bala?

²⁰Püpoti, sodo Jews miko npo Paul züde kehulü vono ziti uko medo bale, uko püce mha ketso kemesa va ketola.

²¹Vele no uko medo zü hite, kekrelamori uko mi heda kelepü rizo thiba, uko reshu tipü bate, uko pü dokhri va kemothe mhati mhakra hole zino, uko dojüpü fü bate, uko nmedo ketso ketolü bate.

²²Süsa kezhoo püpo tata, no azü kesü keti mha hiko pü mipü ceri po hite, sizi posü.

²³Kefümi mikena cüsü de poti, thipahemi kra kena mu gura pahe mi hethüna, mu rengu kepümi kra kena, tüzülükeba thecüce (sü) ta Caesarea lü khoto la dojü yite.

²⁴Khonuko khapü Paul po ta ketola kesü yiye, side püpo tavo Felix Angh zü kesü ketola.

²⁵Pü lesipü hibide thosü.

²⁶Claudius Lysias lesi thopü Felix Angh kevethoo kelu kesü.

²⁷Thüma hio Jews miko celü khiyi, uko pü dokhri vato kezüce, I thipaheko züvo pü kelayi, pü Roman miti se keyila.

²⁸I püco dipüla sizi bata sheri seyi ketola püzü kehulü vo.

²⁹I sekeyi püco oko zhoko la, vele mhapü lüri pü mejo keva mori sata keshü ngomo.

³⁰Jews miko thümao riba keta seyi, rekri I pü ketsüpü nce süzüho, pümejo kebako pori ta nce vori de kedipü la bashi ti nmhüjülü posü ketola. Vebate.

³¹Thipahe ketsü kesüko tüzülü Paul züde tavo Antipatris tsoyi.

³²Süsanha gura paheko po püzü vota, vele kekreko sala uko thilü (thipahe kebathi) vota.

³³Uko ta Caesarea lü kevorice lesi thopü ketao khapü Angh tsüsü, mu Paul sheri khapü pü mhüjülü sü.

³⁴Angh lesio phrisü, mu pü State dipülü vori sheri ketso. Pü sekeyi Cilicia mile zi.

³⁵N mejo kebako vori keyi sa I nfü reni süto. Side pü khapü Herod jünyo keti keto celü meba.