Read Chokri Naga MHATHOKO 24 Bible Online

MHATHOKO 24 - Chokri Naga bible

MHATHOKO 24

¹Tüsozho püngu sa Anania takiri, mehi miko ri sa, mu jüpo kese mipü Tertullus uko Paul kemejo jüko khi posü.

²Pücü kesüce Tertullus pü kemejo po shüdüta, pü poti, Keveo, nla hako pütü kecho kezükevelü vori, nkebala mhatho keve thipü rüna kolü sü.

³Hako mhatho süko hakonü de züvori, thethi metülü, nmeza shu zode.

⁴Vele ntü kha mecho mo ketola, hako phi mezhe zode holini ta mode hako jü kedopü reni sü tome siti choyo.

⁵Kekrelamori thüma hio mha kebu keta tüsa therü khopü, Jews miko dophro kekre kesü, cejü metülü Jews miko kebalü, kebü keti krüta Nazarene mi kro ketsüpü.

⁶Pü kereshüce sheri thi merho, mu hako pü tüpü hako zholü keti nyüba.

⁷Vele Lysia lü thipahe krapi kezho ta hako ce vori, hako kemu thi hako belü pü tüzü tate

⁸Pükemejoko po nce vori tano po, no ntho sheri mha hiko seyito, dipüla hako pü mejo ta sheri.

⁹Jews miko kebako metü süsü kethozo sita.

¹⁰Angh pübepü püpo jüpo süno thasü, Paul süsa po kesü, I sekeba no pütü kecho shuye hiola sheco thita te, I anü shude mhapopü kela süto.

¹¹No sebata metse, I zho kerikena vo ketace, Jerusalem lü kho kereshü thi ketola.

¹²Kereshücelü I mipüri züde kemeliri ba uko ngomo, mori mipüri hüpü mha kebüri bamo, synagogue lü sheri mori nadelü sheri.

¹³Tsühi amejo keba uko mhapüri seli ngomo.

¹⁴Vele uko po keba I nani khakeva pü amejo, I apotsaneko reshü keta Jihova reshütazo, mhametü thopü kemetako melü mu thezho saju kepoko thopü kemetako.

¹⁵Jihova celü akemeri ta, uko sheri süko khamo, kesami rhülakesü ba, kemezimi sheri mu matho kemoko sheri.

¹⁶A kehülü Jihova sheri mu thüma sheri nümo thimo keto la mhalü tayo.

¹⁷Tsühi süze, tütse kekro sa mhakhapü ashuye tsüsü ketola mhakengupü I tavo rizü.

¹⁸Jews miko humi Asia lü tavori kereshücelü athi kemesa keba ngoyi, makro sheri bamo mori mhakebu keti sheri azü bamo.

¹⁹Uko nmhüjülü hice vori ti mesü, uko mhace mhahu amejo keti ba tisa.

²⁰Mori hiko kedipü I thikekri ba ngo sheri I kehu mhüjülü kebace.

²¹Kesami rhüla kesü kepola zokemosa I tha nmhüjülü tha de ane kepo kebahi.

²²Felix süko se kemesa kesüsa pü poti, pü uko khapü thela thiva, de poti, Lysia krapi kezhoo takiri süze I pücelü nju se kemesa yito.

²³Pü kefümipü cepoti, püpo pümedo thiyi keve pü pütsü süte, vele püzümiko püce kevoriko kha hite.

²⁴Pütü husa Felix pücemi Drusilla zü vori, theno süpü Jewmi, pü Paul cüsü, side Khrista kemelü reniyi.

²⁵Pü kematho, ukethükerü keti, mu hisa jünyo keti keto püco po kesüce, Felix mpeta de püce poti, Ta tate, Tsühila, I pütü uzhoti ngoyi süze ncü süto.

²⁶Pü kemerice Paul presa khapü pütsüsü keto lüba, size pü khasü ketola; süla tsükenu pü miketsüpü pü rethi bayo.

²⁷Tütse kena vota, Felix vale Porcius Festus tavo rita, Jews miko nü thi ketola Felix Paul khapü thejü thi mezüta.