Read Chokri Naga MHATHOKO 28 Bible Online

MHATHOKO 28 - Chokri Naga bible

MHATHOKO 28

¹Hako tapra tso keyisa sekeyi cejü rethi tsokemo süo Malta le ziti seyi.

²Sülü kehüko hakoyo merhe dapü thimo. Türü vorita mu meko phita vele uko me thipü jükhü metülü hako meso shusü.

³Paul methi ketola süpa kevoce tenhi nhibüpü melü vori mu süo pübe mereyita.

⁴Thüma sülü kehüko süo ngode uko dolü kepo keba thüma hio mikedokhri pütazo metse pütho jülü taprari tazo sheri, khüpo sazho sü pü merhü süho.

⁵Pü khonu süo keshüpü melü süva mu mhapüri pü methi mota.

⁶Kehothi sheri reme vori metse siziba, mori saretu ta keto lüba; vele uko pütü kecho peba sheri püyo mhapüri thi mo ketala uko kelü redeta, side püpü therü mipü le sizita.

⁷Thethi süce kehü mipü thüma kemele mipü püza Publius hako mesoyi mu hako thekü shusü, tüso zho sü merhe shude.

⁸Publius po mhathi shu mu thüza bü de püzilü zü, Paul pücelü de kecho thisü, pübe chopü püyosü, side püthi kesürho sü.

⁹Sü thi kesüla thüma sülü kehümiko mhathi kebako tavori de uko thi kesürhoyi.

¹⁰Uko hakoyo therho mhathoko thi shupü hako tsüsü, hako rulü tata ketoce hakola khimo kesuko metü khapü hako tsüsü.

¹¹Hako tekhri sü sa tavo cejü rethi tsokemo pülü voyi Alexandria ru nube za Castor mu Pollux thopü meta.

¹²Tavo Syracus lü zho sü relüyi.

¹³Sülü mede tipü mhanyo (compass) püyi de tavo Rhegium tsoyi, zhopü sülü ba de sülü mekhroco tükhra vorita, süsanha tavo Puteoli tsoyi.

¹⁴Hako tavo sülü kemelümiko ba ngoyi, de zho thüna sülü banota, süsa ta Rome kevaco tavota.

¹⁵Kemelü miko hako tavo kezü sesü, de uko Appius ketso Resoce sülü ta vori hako züyi, Paul süko ngokesüce Jihova meza ti posü, mu thepuyi.

¹⁶Hako tavo Rome tsokeyice kefüo thejüko khapü sülü kefüko tsüva, vele Paul khapü thipahe mipüpo uni bata.

¹⁷Zhosü sa Paul Jews krüta sülü kebako cüsü, uko tavori ti salü Paul uko cepoti, thümako mu sazüjürako, I thümako nümo thimo mori upotsaneko zho sheri varhümo, sizo sheri Jerusalem lü atüyi de akhapü Roman miko belü süvele.

¹⁸Uko aju keti kevoce ayo kejo sa keshü ngoyi mo tila uko akhasüva nyüsü.

¹⁹Vele Jews miko süo metsude jüpo ketala apo Caesar ce cho sala moze suta. I ashuye zü kenyo nyümo zo sheri.

²⁰Kekrelamori mha hiohila I neko cüsü, neko zü kesüsü mu neko ceposü kenyüla; kekrelamori Israel miko kemerila thegi ropü aphapü tatele.

²¹Hako njula Judea lü lesipüri ngomo zolu, mori sazüjüra celü mipüri vori de mhapopü nmetsu ti bamo.

²²Vele hako nju senyüba no dipü lü ba sheri, hako kese thethi metülü kro hio metsu ti se süte.

²³Tüso zhopü chepü pü tsüsü, thüma kekro ta pü keba thethilü vobayo; pü süko ce Jihova kede kethi zhopo thi bayo, Jisu ju pü uko ce po, Moses thezhoko sheri, mu saju kepoko sheri sa de keshulü vo theva ketso po bayo.

²⁴Humi po kesüko melüyi vele humi melü mota.

²⁵Uko dolü umedo kemetha mo ketala kekhota, süsalü Paul jüpü poti, Kemesa Rüpü Isaiah saju kepoo talü po meve shu pü upotsa neko ce süzo.

²⁶Pokesü, Ta thüma hikoce vote, de posüte, kereni sü neko renito, vele seyiho; kepesü neko peto vele mhalü yiho.

²⁷Thüma hiko melü revote, mu uko ni sheri kenibite; uko mhüma tate mhangomo ketola, mu unipü reni mo ketola. Uko melüpü mhalüyi mu redeyi lize I uko thi kesürho süto vele.

²⁸Neko hihi seyite, Jihova kelakeyi kha kesü khipü Gentiles miko tsü vato, size uko melü yito.

²⁹Pü jü hiko po kevasa Jews miko tata, uko dolü mha kepo shuta.

³⁰Paul cepü nyepü hü kebalü tütse kena photü sülü ba, püce kevoriko metü zü kesü.

³¹Jihova kede kethi zhopothi mu Niepo Jisu Khrista jupü mi metha, kemelü kene mu mipüri pü kha kemo thi.