Read Chokri Naga MHATHOKO 3 Bible Online

MHATHOKO 3 - Chokri Naga bible

MHATHOKO 3

¹Pünha Peter mu John ni ta kereshücelü khozü kecho kethi tülü, theva ba süce.

²Thümapü uzu valü lahe ketapü püvo sülü ba de mhakhrü ti bayo, tüsonha kereshü ceta ceprace, kharü za Züverizo, sitilü, mi kereshüce sülü kevoko ce mha cho bayo.

³Thüma süo Peter mu John ni kereshücelü tavo kezü ngode unice mhacho ta.

⁴Peter pümhüpü thüma süo pe türü sü John sade, side poti, Hani pe türü süte.

⁵Sübi püri uni petüsü, mhahu uni celü ngoyi keto meride,

⁶Süsa Peter pode, rakathi mu suna I pü tamo, vele I pü ketao khapü ntsü süto; Jisu Khrista Nazareth mi zalü sütha süte, de ta süte.

⁷Pübe püzaco tüsüsa sü, de cemesüsü, sisü metha püro pü kerüko metü vorita.

⁸Pü prüsüde thayita, chota yita, mu uni züde ta kereshücelü lüta; chota, prü rehü, mu Jihova chu zita.

⁹Mu thüma metüko pü chota de Jihova chu keta ngo.

¹⁰Mu uko se mu ngo keba thüma süo Kereshüce cepra Kezüve lü ba de mha khrüti kebao zo; uko püpe de uko ngo mu umha bata, püyo kedipü thi süta sheri.

¹¹Laheo Peter mu John ni sameji ta, thüma metü Solomon cehükhro ta kehuzü, ungo shu mu ungodapü thimo tha.

¹²Peter süo ngosü de thümako ce poti, ne Israel thümako neko dito mha hiola neko ngo bata? Mori kedipüla hako pesü bata? Hako kekulü mori hako kemesalü thüma hio thipü chotayi tele bame?

¹³Abraham, Isaac, mu Jacob ko Rüo, mu uko potsako Rüo, pünu Jisu pü thechu therho zapo zale thisü; neko pü tüpü Pilate-e mhüjülü pü melava, Pilate-e no pü khasüva keto lüzo ta sheri.

¹⁴Vele neko Kemesao mu kejüthoo melave, mu kedokhrimi yinyü kute khapü neko tsüvano site.

¹⁵Side Kehü kepoo dokhri ve, Jihova pü sa ketalü püphü merhüyi; süo hako kengo zhopo kozo.

¹⁶Pü zalü kemelülü püza melü keyilü thüma hio thipü meco süte, neko se mu ngobate, kemelü khapü püyo ba keyila püthipü neko metü mhüjülü vetsütso süte.

¹⁷Tsühi, azüneko, neko kemelolü mhatho hiko thi kesü I seba, mu nekopi kezhoko sheri.

¹⁸Vele mha hiko Jihova saju kepoko talü thaka metazo, Khrista kemezhe keto, pü süko thitsü süte.

¹⁹Neko süla thelü rede yite, neko tala vorite, size neko kephomako vayi ketola, relü thsizi keti tüpü Niepoo celü vori ketola.

²⁰Jisu Khrista ketsüpü neko ce sü keto po metha (se) süzo.

²¹Mhako uthilü vori tsoyi kemothe püpo tüyo bazo, Jihova saju kepo kemesako talü popü meta mha hiko metü cejü thiyi culü.

²²Kekrelamori Moses sheri ukrü utsüpumiko cepoti, neko sazü jüra dolü Niepoo neko Rüo saju kepopü khapü neko tsüto, abi ketipü. Neko püfü metüko reni yite pü neko ce kedipü poto sheli.

²³Thüma sopüno saju kepo süofü renimu ta sheli süo thümako dolü pa cele vato.

²⁴Saju kepoko metü, Samuel celü vo süsaco ketso tsüdo tühi po tazo.

²⁵Neko saju kepo süko nuneko zo, mu Jihova züde kejütsü kejükho keyi uko poneko zo, Abraham, I nshuyeyo thejo khapü cejülü shuyekoyo keye süto.

²⁶Jihova pü theküo phü merhü kesüsa, pü ketsüpü neko ce sü keratho thisü, jopü neko tsüsü ketola, neko mha kesukolü neko rede keyiko metü.