Read Chokri Naga MHATHOKO 9 Bible Online

MHATHOKO 9 - Chokri Naga bible

MHATHOKO 9

¹Sütüce Saul thedüfü phra mu kedokhri thita, Niepoo saji mikoyo, ta thevo kezhoo ce vode;

²Pücelü lesi pü Damascus lü ki Synagogues (kereshüce) kolü mhace thüma humi Choo lü keta ngoyi lize, thenomi sheri mori thepumi sheri pü süko tüzü Jerusalem lü vori ketola.

³Pü revü Damascus kemenoce vori, rekri tüyo kevepü tatsü pükhü metü va vekrüta;

⁴Pü retu cejü kita, pü mhafüpü püce kepo se, Saul, Saul, no ditole ameshu ta?

⁵Mu pü poti, Niepoo no sopü? Niepoo puce poti, I Jisu no meshu ketao, no phechopü tsahu mesü keti nla rüshü zoto?

⁶Pü reshü zode mpe püngo thi bata, Niepoo no apo kedipü thita? Niepoo puce poti, Tasüte, de ta nadelü kite, mu npo kedipü thino sheri nce po süto.

⁷Püzü revü keta thümako mhapüri poyisu bata, thefü-o se, vele mipüri ngomo.

⁸Saul cejü retu kezülü tasüri, pü mhürho süri, pü mhapüri ngo mota; vele uko pübe süsayi, side püzü Damascus lü ki.

⁹Pü zhosü mhangomo bata, mhari timo, jüri kramo.

¹⁰Damascus lü kemelümipü ba, püza Ananias, Niepoo zümholü pücepo, Ananias side pücü, pü I hiceba, (we sisü) Niepoo.

¹¹Niepoo püce po, Tasüte, ta chopü Straight (chokemezi) lü kite, Judas cekromi mipü püza Saul, Tarsus lü kevori mipü, ketso vote, kekrelamori pü kecho thi bate.

¹²Pü zümholü mipü Ananias leno tavo pübe chopü püyosü, püpo mhangoyi tate sitha tingo.

¹³Süsa Ananias püfü kelasü, Niepoo I thüma kekro celü thüma hio ju seti pü Jerusalem lü kemesakoyo mhakesüshu thipü süti se;

¹⁴Thüma hiceko la pü thevoko celü keku choyi de nza kecüko metü tüyi ketola.

¹⁵Vele Niepoo püce pode tavote, kekrelamori I pükedapü amhabü thitole ba, aza khipü Jewmi kemokoce, kedekoce, mu Israel nunekoce posü ketola.

¹⁶Kekrelamori I püpo ala kemezhe ketoko thapü püka süto.

¹⁷Süla Ananias tavo de ta pücelü lü, pübe chopü püyosü, Asazüo, Saul, Niepoo Jisu cholü no tavori kezüce nmengo kesüo, aketsüsüle, npo nmhü mhangoyi ketola, Kemesa Rüpü po nchu yite.

¹⁸Sisü metha pümhülü mhakra retu keta thide pü mhango yita, tasü de jülo püyi.

¹⁹Pü mhati keyisa püthi kemetüyi. Süsa pütühu Damascus lü kemelü miko züde kemekroba.

²⁰Pü mezi Khrista zhopo thita Synagogues (kereshüce) kolü, pü Jihova nuzole sita.

²¹Vele püfü keseko uko ngo bata, Jerusalem lü püza kecükoyo mhathi mesu uko methimeni keta thüma hio zo mome? Süo thi keto kelüla mu uko tüpü thevoko ce vo ketola mome?

²²Vele Saul pü keku neku prata, mu Jews miko zü kemetsu ta Damascus lü kehüko, hiohi Khrista zoleti pota.

²³Tüsozho kekro saco Jews miko pü dokhri va keto rhü bata.

²⁴Vele uko Saul re de rizo thi keba se vorita, uko tüso tüzü pü dokhri va ketola kharü kolü püfü re bata.

²⁵Süla sajiko tüzülü püpü merhalü khasüde kharücelü metsa süva.

²⁶Pü Jerusalem lü vokeyice sajiko züde bata, vele uko metü pü methi bata; uko kemelü mipü thi keta uko melü mota.

²⁷Vele Barnabas tavo püzü sajiko dolü vori, side pü cholü Niepoo zü kesüti ukoceposü. Side pü kedipü bide Damascus lü thepu shude Jisu ju po kesü kori sa posü.

²⁸Pü Jerusalem lü ukozü tapra talü thi ba. Pü Jisu Niepoo zole ti thepu shude püza po bata,

²⁹Side Greek miko (Hellenist) zü ketü bata, vele uko pü dokhri va keto rhüta.

³⁰Kemelüko süo se keyice püzü Caesarea lü vota, side pü ketsüpü Tarsus lü süva.

³¹Sübide kehuko Judea, Galilee mu Samaria kolü tarho thi kethepu sü, ukopo Niepoo mpe de pü chothalü hü, Kemesa Rüpü thelü tho melu ketilü uko kro prata.

³²Peter hitüce kemelüko dolü tapra talü thi bayo, pü ta Lydda lü kehüko kemelü kocevo.

³³Sülü mipüza Aeneas siti ba, püzilü tütse tütha zütata, lasa kethi thide.

³⁴Peter pücepode, Aeneas! Jisu Khrista nthi nve sütaho, Tasütate, de nzi püyite. Sizi sü metha pü tasüta.

³⁵Lydda mu Sharon lü kehüko sü ngode Niepoo melüyita.

³⁶Tabitha, kemelü mipü Joppa lü hüyo, püzaco Dorcas; theno hipü mhakeve thi shuyo mu mhakha mitsü shuyo.

³⁷Sizi tavo mhathita, de sata; uko jüpü pükhrüva de khapü cemesoyo kha mezü.

³⁸Lydda Joppa kemenoce ba, kemelüko seketi Peter sülü bale sesü, uko mikena ketsüpü pücesü, püpo tamhai ukoce vorino posü.

³⁹Süsa Peter tasüde uko züvota. Pü ta ukoce vori mu uko püzüde cemesolü ku, samepüko metü pükri kraba, bola mu fümene püthi kesüko kha pü mekaba, pü rhü kebace kethiko.

⁴⁰Vele Peter uko metüpo chozu prata, chütüyi de kecho thisü; Pü kesamo ce taphe de pü cüsü, Tabitha! Tasürite. Pü mhürho sürita, tasü Peter ngoyi, de bayita.

⁴¹Pübepü pücesüthasü, kemelü miko mu samepüko cüsü de pü merhüpü uko tsüsü.

⁴²Joppa lü kehüko metü süo sede Niepoo melüyi.

⁴³Pü tüsozho kekro Joppa lü bata, Simon thiyi kethi mipü celü.