Read Chokri Naga ROMEMIKO 12 Bible Online

ROMEMIKO 12 - Chokri Naga bible

ROMEMIKO 12

¹Süla akhrüko, Jihova phikemezhe zalü nekoce choyo; nethi nepho khapü merhü rütho, kemesa, Therüopo yikeshü kethi, süosü neyitholü rüpü kereshü thite.

²Cejülü zhorüleko züta hite, sitimole nekehü redepü nelüri kesa salayite; vekethoti mipo nengote: yikeshükethi, m vetsüketi Jihova medo bide.

³Kekrelamori ngokemezhe kha aketsübi I nekoce kepo kehopüri ulüpü utho uce rekrüku ta hite, vele mhalü metsü Jihova kemelü medepü kha kesü dü.

⁴Kekrelamori umoyo zatho kekreti kekro kebabi, zatho metü mhatho kemha phrümo.

⁵Sübi uko metü Khristayo zatho kekroba, zathopüpü ti themopüyo ba.

⁶Ngokemezhelü mhaphrü kekre keti kha uko tsüsü, saju kepo sheri ukemelü didüpü ba sheri südü poyi khe.

⁷Mori yitho kethi sheri, kemetha kethilü mimetha ti sheri.

⁸Mori ketarholü mitarhoti sheri, kha miketsülü püpo jükemelulü khasüte; pü mikekha ketimipo menu keti, miphimezhe ketipo unüsayi de kha kesü.

⁹Kekhrüpo kethüra kemo, kesu keretsü, mhakeve chotsükeyi.

¹⁰Sazüjüra hunehu kekhrü khi hunehu khrüyite, hunehu rho kekayite.

¹¹Nelü thathi tahi, rüpülü lümü thinyü hühü bayi; Niepoo choyi thiba zote.

¹²Kemerilü rechü bazote, kemezhe zori sügüsühe bazoyi; kecho thimetü vahi.

¹³Mhakhapü kemesako khimo kesüko tsüba zoyi, mi meso ba zote.

¹⁴Jopü nekemeshuko tsüte, reliphri tsüte, reshuhi.

¹⁵Somi rechü tasheli sümüzü rechüte, somi krata sheri sümizüde krayite.

¹⁶Hunehu züde lüdo kerhüyite, ulü rekrü tahi de mizü kemhayite; renuki ketsakhumi zü hüyite. Nthonlü nve tahi.

¹⁷Mhakesu khi mhakesu khüpo thihi, mimhüjülü mhakeve thipü mi mengo süte.

¹⁸Mhace thiyi ve toze no thüma metü zü kezüve hüte.

¹⁹Akhrüko, nekhüpo thihi zote; vele khapü Jihova meri süte: kekrelamori thopü metati, “Khüpo sü azhü, I shusüto,” Niepoo side poyo.

²⁰Siti moli, mhace nengomumi khü meri talize mhapü püpo tiyite, theri ta süze jüpü pü mekra süte; süsü no keto meyikrapü hipü püpiyo kesü bi zoto.

²¹Mhakesupo nce kuketamoli, mhakeve po mhakesukopi kuyi moze su.