Read Chokri Naga ROMEMIKO 3 Bible Online

ROMEMIKO 3 - Chokri Naga bible

ROMEMIKO 3

¹Size Judahmi la kemeve kedipü ba? Yikerü la kedipü kepra ba?

²Mha bashu metükolü, theralü Jihova talü kepopü Judahmi melüsü.

³Kekrelamori mhace humi melümo tali mhame? Uko melükemo sü Jihova kemelü mhathi yiho tatome?

⁴Suto, (kenitho) “thüma metü kemedami, veli Jihova jütho side thometa,” süla njülü no meziti ngoyito, nne keti ketsülü no meziyito.

⁵Vele uko mezikemo sheco pü Jihova kemezice kedipü poyi veta?

⁶(I thüma thi jüpoba). Suto, Kekrelamori Jihova tsüsa kedipü bide cejüo ne keti ta?

⁷Mhace akemedalü Jihova kejütho pü zapozale thiyi veta ketosa, kedipüla akhipü kephomami leno amejo yi veta?

⁸(Humi umejode upoyole side poyo). Mhakesu thikhe, side mhakevepo vori ketola? Thüma sizi ketakosü mejova züzo.

⁹Sizitaze dipü? Uko ukoce veku teme? Sizi mozo, Judahmi sheri m Judah kemomi sheri kephoma khro tazo.

¹⁰Hizi thopü meta, “Kematho kemezi püri dide, mipüri ta mote.”

¹¹Mhase mhalu keto püri dite, mipüri Jihova kephu ta mote.

¹²Uko metü chokhü prate, uko kesade mevekemolü vote; mhakeve kethi tamote: mote mipüri dite.

¹³Uko mezhoroko mhakhre kecebi, uko meyikhi kecejüpo; uko mülü tenhi therü ta.

¹⁴Uko talü reshu chupü, m jükekhuko.

¹⁵Uko phezi chorhürhü mi kedokhrilü,

¹⁶Uko chokolü mhakemeka m kemezhe keti zo.

¹⁷Uko chokolü kezükeve semo;

¹⁸Uko mhüyo Jihova khri kemeprü bamo.

¹⁹Tsü usekeyi thezhoko dipüpo sü sheri thezho khro ketakola po, cejülü kehü metüpo kemekre bakeyi; Jihova mhüjülü keve kesu hazo ketola.

²⁰Thüma kehopüri thezhokhi pümhüjülü utho upo kemeziyiho, thezhola kephoma mhase vori.

²¹Vele tsüno thezho sa mode Jihova kemezi mese mengo süte, thezhoko m saju keseko hijü zhopo thi meta.

²²Jihova kemezi Jisu Khrista kemelü yono khapü pükemelü metü tsüsüve. Thüma metü kela kekre ho.

²³Kekrelamori thüma metü phomate, Jihova zapo zale tso mote.

²⁴Jisu Khrista urhakeyiyono pü kelakeyi ngokemezhepü methuzode upo kemeziyi.

²⁵Jihova pü khapü uphosü thide püza mekrüsü, kemelümi sü seyiyo.

²⁶Tsüdo I hihi poyo, pükemezi m pükejüthola somi Jisu kemelümi sheri sümi thi kematho vayo.

²⁷Kedipüla u kemekota? Sü saphri mote. Thezho dipülü? Mhatholame? Movele, thezholü melü keyila.

²⁸Süla ukepo thümapü kemelüla püthi kemathoyite, thezholü mhathoko la zomo.

²⁹Pü Judahmiko lebi la zome? Judahmi kemoko lari zo mome? Ile, Israelmi kemoko larizo.

³⁰Kese kengo Jihova sü pü lebizo, Kemelüla yikerümiko thikemezi yito, yirü kemoko ri kemelüla mezi yito.

³¹Süsa kemelülü uthezhoko kha kemechü thiva tome? Sizi mozo, uthezhoko thi süyo.