Read Chokri Naga ROMEMIKO 6 Bible Online

ROMEMIKO 6 - Chokri Naga bible

ROMEMIKO 6

¹Süsa ukedipü pota? Uko kephomalü basa tome, ngokemezhe po kroyi ketola?

²Suto, (kenitho) u kephomalü sate, u dipüthide sülü hüsa bata?

³Jülopükeyikhü u Jisu Khrista kesalü jülopüyi tati neko semo zome?

⁴Süla upüzüde pükesalü ukhrüve, Khrista kesalü rhüla sü püpo zapozale thisü, sübide uri kehükesalü ta keyi mesü.

⁵Kekrelamori usheri pükesazü upü lü kevala püzüde rhülari zoto.

⁶Usekeba, uma kevüo kha püsa cross yo guve, kephomala umo satazoto, hilano ukephoma choyi thi hote.

⁷Kekrelamori mipü saketasü kephoma thisahote.

⁸Tsühi mhace u Khrista züde sata lize, umelüketi püzüde rhüri zoto.

⁹Sekeba Khrista kesalü rhüla süketala sala sahote, kesa püpi de sa hote.

¹⁰Kekrelamori pü saketi kephomala vapü sa, vele pü kerhüsü Jihova la rhüyi.

¹¹Hibide nekori kephomala sato, vele Therüola rhüyito Jisu Khrista uko Niepoo lano.

¹²Kephomapo nthinmoyo kede thihite, n menyüko jüzümo ketola.

¹³N moyo zatho kehopüri pü mezikemo thi kephomalü vota hite, vele kesalü rhüla kesü kehüpü hüte Therüola, nmo zathoko khi kemezilü Jihova mhanyo thite.

¹⁴Kekrelamori kephoma npi de saho, no thezho khrikhro bamo ketala; vele ngokemezhe khrikhro bate.

¹⁵Süsa dipü? Kephoma thi tome, kekrelamori u thezho khrikhro bamote, vele ngokemezhe khro baketala?

¹⁶Neko semo zome? No sopü füzüthi yoshi no pü thekümi tazo; kephomathi kesalü kevo tome mori kemezi jüzüthi de kerhülü voto sheli?

¹⁷Vele Jihova meza, vapü no kephoma jüthi, vele nmelüpü nmetha kesüko jüzü thi vori takezüla.

¹⁸Sizide kephomalü süphra püprari ketala no kematho cetami thite.

¹⁹I thüma zhorelelü poba, kekrelamori nthinmo kethathila; kekrelamori hiju vapü no nmozathoko pü kerholü mesakemo thi m thila ketabi; tsüo nmozathoko khi kemezilü sü keta kemesa cetami thi tate.

²⁰Kekrelamori no kephoma ceta thi ketace, kemezi nkekha bamo.

²¹Süla no süce kemeve kedipü ngoya? Tsü sükola menga tate; mhasüko püthülalü kesa zo.

²²Vele tsühi, kephomalü nsüphra prarite; Jihova cetami thite, kemesase zhüyi, püthülaze kechothe kehü ngoyi.

²³Kekrelamori kephoma zhokhro sü kesazo; vele Jihova khakesü no kechothe kehü, Jisu Khrista u Niepoo yo ngoyi.