Read Chokri Naga ROMEMIKO 7 Bible Online

ROMEMIKO 7 - Chokri Naga bible

ROMEMIKO 7

¹Neko semome, (I thezho kesekoce kepo) thezho khi mipü kehüthe pü kekhapü taya?

²Kekrelamori thenomipü pünopu rhükebathe thezhopo pü kekhapü tayo, vele pünopu sataze; thezhopo pü kekhapü ketao pünopu ceco phrüve.

³Süla mhace, pünopu rhüba zori thepu kekrepüce nhita lize sükhapü thepukezüpü ziyo; vele pünopu sata lize thezho pü phati ba mote: süla pü thepukezüpü mo, pü thepu kekrece nezori.

⁴Sübide akhreazüko, nekori Khrista moyola thezholü sate; neko mikekrepüce nhi ceyo ri vete, süsü kesalü rhüla keyio, Jihova yo use zhüyi ketola.

⁵Kekrelamori uko uthiumo medolü hü ketace thezhoko uthipü kephoma reyo ketila umoyo zathoko khi kesa mhathoko thi tayo.

⁶Vele tsühi uko thezhoo mhüjü uko süphrayite, uko tüphapü keta-olü sa tayo; thezho kevü thopü kemeta yo mori kehü kesa rüpülü hü keti mesü.

⁷Süsa uko kedipü pota? Thezhoo kephoma me? Motozo, I kephoma sü semo, vele thezho ace süo po süyo: uthi upho kemenyüsü I kedipü sheri semo, vele thezholü süsü po kesü, “No mha meho menyü ho” sisü.

⁸Vele thezho süsü kesela pütü keve süpü apo mhakemeho kemenyü metü thi süyo. Thezhoo zo kemosa kephoma sü kesa zo.

⁹Kekrelamori I vapü thezho sa mode hü, vele thezho kha kesü vorita, sizi kephoma sü ayo rhü vorita, sizi I sata.

¹⁰Thezho khakesü mipo hüyi ketola zo vele ala süsü kesa thita.

¹¹Kekrelamori kephoma thezho khakesüo khipü akedova de adokhri va.

¹²Thezho sü mesazo, thezho thinzü no khakesü ri mesazo; mezi m ve zo.

¹³Mhakeve thinode khakesü athi mesa vame? Simozo, vele kephoma sü kephoma hü mengo süyo; mhakevelü kesa mhatho ayo mesü süyo: thinzüno thezho kha kesülü kephoma umha keti kekro vori tayo.

¹⁴Kekrelamori u sekeba thezho sü rüpü zhüzo, vele Ino themo (uthiumo) pü kephomalü zhu keva.

¹⁵Süla I thinyü kemoko thi tayo, kekrelamori I thi kenyüko thi yo mo; I ngo kemetsüko anü de thi tayo.

¹⁶Mhace I thinyü kemoko thita yosüze, I thezho keve se m anü keti ba.

¹⁷Tsü süsa, thi kebakosü I thiba mote; vele kephoma ayo hü ketao tho thi tate.

¹⁸Kekrelamori I se keba athi amoyo mha keve hüta mozo, kemezi sü I thinyüzo vele I süsü thiyi hota yole.

¹⁹Kekrelamori mhakeve sü I menyüzo vele I süko thiyi yomo, vele mhakesuko thinyümo zori I süko thi tayo.

²⁰Tsühi mhace I thinyü kemo thita yo ze, süosü I thi ba motazo; vele kephoma ayo hü ketao tho thi tate.

²¹Mhakeve thi kenyü süsü ala thezho püzo, mhakesu-o akemenoce ta süyo.

²²Kekrelamori I Jihova zho anü alü keta thümao samejide.

²³Vele ayo zathoko la thezhopü tati ngoyi, ayo zathoko thezho metsuta akelüce; de süko atüpü thejü thiva kephoma thezholü ayo zathoko yo.

²⁴I thüma hesheherü, sopüno kesamo hi-olü asüphra süta?

²⁵I Jisu Khrista yono Jihova meza thorile. Süla I akelüpü Jihova zho choyi thiyo, vele athi amo khi kephoma zholü thejü thiyo.