Read Chokri Naga CORINTHMIKO KÜRAO 1 Bible Online

CORINTHMIKO KÜRAO 1 - Chokri Naga bible

CORINTHMIKO KÜRAO 1

¹Paul cüpü Jisu Khrista sajimi (apostle) Jihova medolü, mu Sosthenes uko züo.

²Corinth lü Jihova kehuko cekesü, Khrista Jisu yo thi kemesa keyiko mu cükeyiko, mu kekreko sheri kesa Jisu Khrista za lü cükeyiko, uko Niepoo mu hako sheri sa.

³Phikemezhe mu kezükeve Jihova uko po mu Niepo Jisu Khrista celü kevori po neko züba yite.

⁴I pütü metülü kethezü khapü Jihova tsüsü bayo, kekrelamori Jihova ngokemezhe khapü neko tsüsü ketala Jisu Khrista zalü.

⁵Kekrelamori mhakeho pülü sheri neko püyo nethi mene süte, ne jüpolü mu mhaselü metülü.

⁶Neko dolü Khrista zhopo thi kemetü süte,

⁷Süla neko Rüpü mhaphrüko tsakhu mo te, uko Niepoo Jisu Khrista mengo sü keto fü keba bi.

⁸Pü sheri thela ketso neko thi kemetü vo zoto, side nekopo thece kedi thivo Niepo Jisu Khrista tüsozho ketso bayi keto la.

⁹Jihova sü jüthozo, pula neko cüpü Nuo krotholü süyi, Jisu Khrista uko niepoo.

¹⁰Tsühi, I nekoce melo süyo, sazü jürako mu lipü neko, Niepo Jisu Khrista yolü püthi ketako, neko dolü kezü püthi lükerhü ti

¹¹Kekrelamori Chloe thümako tavori ace mhapoti, kemeliti neko dolü baketa, asazüko mu alipü neko.

¹²Akepoco, neko mipüpü ti, I Apollo ceco, mori I Paul ceco, mori I Cephas ceco, mori I Khrista ceco.

¹³Khrista kezaphro vateme? Paul nekola cross yo sa süme? Mori Paul neko khapü jülopü süme?

¹⁴I Niepoo meza ba I neko mipüri kha jülo mpü sümo Crispus mu Gaius nilebi sasü.

¹⁵Molize neko azalü jülopü tele zita ketola,

¹⁶Süsa sheri I jülo khapü Stephanas cekroko tsüsü, süpi kezü I jülo khakesü semo I jülo khasasü me mo sheri.

¹⁷Kekrelamori Khrista apo jülo khasü ketola aketsü sümo, vele jüyikeve po ketola zo, mhapokese mhase fümo, siziti Khrista cross keku thimedi kevapü.

¹⁸Kekrelamori cross jüyikevesü kata ketoko la kenyo jüzo, vele uko kelayi ketako la Jihova keku lü.

¹⁹Süo ju hiziti thopü meta, “I mhakeseko mhase thimedi vato,” mu mhakeve kesu lü keseko thi kethathi süto

²⁰Mhakeseko mhase dipüce vota? Lesi keseko dipüce tata? Tsükehülü thezho khipü kemeli ketako dipüce vota? Jihova mhase kemoko thipü cejülü mhakeseko thisü ta mome?

²¹Kekrelamori Jihova mhaselü, cejüopo Jihova seyi mote uko mhaselü, Jihova kelülü, uko mhasekemo zhopo lü somi melüyi sheri sükopo kelakeyi ngoyi ketala.

²²Kekrelamori Jew miko sazi menyü yo, Greek miko mhase jü phu yo.

²³Vele uko Khrista pü cross yo gu keva zhopo kethi Jew miko la uphe kemesü püzo, mu Jew kemoko la kenyo jü.

²⁴Vele cüyi ketako, Jew miko sheri mu Greek miko sheri kenani Khrista hi Jihova kekuo zo, mu Jihova mhaselü jü.

²⁵Kekrelamori Jihova kenyo zori thüma mhase ce veku, mu Jihova kemeza (kethathi) zori thüma keku ce kuku.

²⁶Nekecü lü süte, asazüjürako mu alipü neko, neko thüma zhorele lü mhakese phimi zomo, kekumi zo rimo, cekro kerekrülü menu keyimi ri zomo.

²⁷Vele Jihova kerenuko kedapü kerekrüko nga thi süte, mhase kemoko kedapü mhakeseko po thenga thiyi, kukemoko kedapü kekuko po thenga thiva.

²⁸Jihova cejülü kerenuko mu khakevako keda yite, mhapüri kemoko khipü mhapüri thi süte.

²⁹Süla mipüpori Jihova mhüjülü kemeko kemeha ta mo ketola,

³⁰Pü nekola kerhü boo (bodü) (jüri) zo, Khrista Jisu yo, kemezi, thi kemesa keyi, mu rhakeyi.

³¹Süsüla thopü kemeta, “sopü kemeko yo sheri püpo Niepoo yo kemeko yite.”