Read Chokri Naga CORINTHMIKO KÜRAO 10 Bible Online

CORINTHMIKO KÜRAO 10 - Chokri Naga bible

CORINTHMIKO KÜRAO 10

¹Sülebi zo mori, azüneko, I nekopo semo melo banyümo, dipü bide uponeko kemhü khrolü ta vo sheli, mu jükezho lü cuvo sheli.

²Mu uko metü Moses belü jülopü kemhülü mu jükezholü.

³Mu uko metü rüpülü themuti.

⁴Mu uko metü rüpülü jükra, rüpülü tsüro uko sameji ketao yo jükra, süo Khrista tsüro.

⁵Vele uko kekro Jihova po pünüyi mote, kekrelamori uko kha nhatsalü kelhu kevala.

⁶Tsüdo mhahiko khi uko la thaka pü thiba, mhakesuzhüko meho menyü mo ketola, uko kemenyü zhüko.

⁷Mori nekopo therümarheko reshü moketo, süko humibi, theju thopü kemeta, thümako mhati mhakra keyisa tosü rezhü ta.

⁸Mori uko keregükerezhü thimo lekhe, uko humi thi ketabi, mu uko tüsozho pü nha thüma nye mecüsü retuta (nye sü Ex. 32; 28).

⁹Mori humi Khrista medophi keta bi uko sizi mo lekhe, mu tenhi po uko medokhri kevabi.

¹⁰Mori humi panyo paro ketala neko panyo paro ta, mu kekalü uko mekava.

¹¹Tsüdo mhahiko thaka thi tate, uko yo kethiko mu mha süko thopü ukola tarho kesüko la cejü pü thüla thi keta vori te.

¹²Süla mhakelümiko thayi te mo lize retu tari semo tila.

¹³Medo kephi neko yo khasümo, thüma metü zho zo kemosa, vele Jihova jüthozo, pü nepo hüyikeve kezüpü neko medophi süho, vele hüyikeveko lebi zoto, mu medokephi vori tice sheri chode phupü therü therayi keve thi süto, mu neko hüyikeve thi sü to.

¹⁴Süla akekhrü miko, marhe kereshülü tazo tate.

¹⁵I mhakese m ketsümi ce kepobi po süho, neko I dipüposü sheri lü medo bate.

¹⁶Tehe khapü uko kechothi kesü (jokesü) ce Khrista za la kehu ba mome? Tsükhri yo jo kesüce uko cephro kesü Khrista thi püpho la kehu ba mome?

¹⁷Uko thüma kekro tsükhri pü yozo, mu phopü zo, kekrelamori uko tsükhri pü keza ti kebala.

¹⁸Isreal uthiupho laco vo keta pesü te, uko themu ketiko rütho kethilü reshüba zü kerhü mome?

¹⁹Süsa I dipü po bata? Therü marhe sü mhapü zome? Mori reshü thipü therü marhe ce kesü mhapü zome?

²⁰Vele a kepo therüna (judakemoko) rütho thikesüko thipü therükesuko ce süyo; mu thipü Jihova ce sü yomo; mu I nekopo therü kesuo zü ketekhre nyü mo.

²¹Neko Niepoo he kra mu therükesuko he sheri kra yi su; neko Niepoo zü kemekro (lütilüle) thi pü miz püyo mu therükesuko miz sheri püzü kemekro sizi yiho.

²²Uko Niepoo lüda valapü püpo uro kene thisü tome? Neko püce ku meco ku teme?

²³Mha metü ala thezho zo; vele metü ala khimo kesu zomo; mhametü ala thezho tsüzo, vele metü mhathi kezüve sü yomo.

²⁴Thümapü pori pütho pü zhozhü lü hite, vele thüma kekrepü cene lü sü te.

²⁵Mha kehopüri ketukeholü zhu kesüko, mhaketila, pülü pütü püzho me moshi ketso zo mori ve.

²⁶Kekrelamori cejüsü Niepoo zhüzo, mu sülü chupü keta metü sheri.

²⁷Mhace uko humi melüyi kemomi nzü tavo npo tehü tehülü hino ncüta lize mu no tavota, lize mhakehopü sheri kha n mhüjülü kesüo tite, pütü püzho nlü ketsakhu ketsozo mori ve.

²⁸Vele humi nce poti, mha hiohi rütho thipü therü marhe reshü ti zhüle zita lize, süo tihite po mese kevala, nlükelü ketsode n medo mo ketala; kekrelamori cejü sü Niepoo zhü mu sülü chupü keta metü.

²⁹Kelü a kepo nla zomo, vele kekremila, atho amedo kethila kekremi lü kelü ketso bazota?

³⁰Kekrelamori I ngokemezhelü kezüpü thita lize, I dipü la mhakesu poba ta pü kemeza kha sü keva kola?

³¹Neko mhati sheri, mori kra sheri, mori mhakehopü nekotho thizo sheri, metü Niepoo zapozale thi zote.

³²Mipü sheri mejo nümo thiva hite; Jewsmiko yo sheri mori Gentilemi yo sheri; mori Jihova kehuce yo sheri.

³³I sheri thüma metüko nüthi ta mhametülü, sübi I atho ala kemeve lü tamo, vele metüla kemeve, side uko po kelakeyi ngoyi ketola.