Read Chokri Naga CORINTHMIKO KÜRAO 12 Bible Online

CORINTHMIKO KÜRAO 12 - Chokri Naga bible

CORINTHMIKO KÜRAO 12

¹Hice tsüdo Rüpü mhaphrüko la, a sazüjürako, I neko po melo de semo ba nyümo.

²Neko Gentilemiko thajü therü marheko po neko tüzü püta, neko chotha zü vote.

³I neko po semu lüyi keto, mipüri Jihova Rüpü kenemi Jisu po reshu kepüo thite sizi yomo, mori mipüri Jisu sü Niepoo zo ziti po yomo, vele Kemesa Rüpü thozo.

⁴Tsüdo mhaphrü kekrekre tiba, vele Rüpü püzo.

⁵Mhaketso kekrekre ba, vele Niepo pü lebi zo.

⁶Uko mhathoko ri kekrekre, vele Therü püzo pütho mhametü lü mhathothi.

⁷Vele Rüpü mhatho mesekesü, sülü thüma kehopü pori meve rüyi ketola.

⁸Rüpü süo mhapü mipü tsü kesü ketsü kekremipü mhase mhalü, Rüpü süo zo.

⁹Kekremipü kemelü, Rüpü süo zo, kekre mipü mhaphrü mithi kesürhorüpü süo zo.

¹⁰Kekremipü ungo mhathoko kethi, kekremipü saju kepo; kekremipü kevekesu se kekre keyi; kekremipü jü suko kekro kepo; mu kekremipü jü süko co kepo.

¹¹Vele mhatho süko kethi metülü Rüpü pütho thi, pü tho pü medolü mha kezapü tsü, mipü püla.

¹²Kekrelamori uphosü püzo, uzatho kekroba; uzatho metü uphoyoba, zatho kekro vele upho pü lebi zo, süosü Khrista.

¹³Rüpü püyo uko metü jülopü, phopüyo; uko tho Jewmi sheri, mori Gentilemi sheri, mori thejümi sheri mori ukepha kedimi sheri, metü Rüpü pü jükra.

¹⁴Upho püyo zatho pü lebimo, vele kekroba.

¹⁵Mhace uphe poti, I ubemo süla I uthi upho hio mo, sizi taze pü umoyo bamo teme?

¹⁶Mu mhace unipoti, I uni kemola I umoyo bamo, pü sizi ketala uphoyo bamo teme?

¹⁷Mhace umo metü umhü thita lize, dipüce mhafü seta? Mhace umo metü mhafü kese thita lize, dipüce mharü seyi veta?

¹⁸Vele tsühi Jihova zatho kekre tiko metü khapü umoyo sü meta, pünü pü medolü.

¹⁹Mu mhace zathoko metü mhapü lebi ta lize, umo dipü bi tata?

²⁰Vele tsühi zatho kekro ba, siri umo püzo.

²¹Umhü ube ce I nsü mori ve siyi keyi di, mori upi uphe ce poti I nsa mori ve sizi ti po keyi di.

²²Mole, umoyo süpi kezü ba, mele phi kemo kethathiko sheri sü moze suku.

²³Umoyo melephi kemo zathoko, ukelüce usüko khimo kesu kekroba phiyo, mu uyo krokrü pü keta zathoko süko mhakekro züveti kemele ba.

²⁴Uyo krokrü pü kebako u sümori veta zi sheri, vele Jihova süko khi umoyo thü kesa sü, therho kha mekro pü kethathi zathoko tsü ku süte.

²⁵Umoyo kelakre ti bazü mozo, vele umoyo zatho kekrekre tiko mipü kekremipü tsakhu vaphi ti mesüzo.

²⁶Uko dolü humi thi bata lize zatho metü thi batayo, süo züde, mori zathopü therho ngo keyi la zatho metü unü rechü batayo.

²⁷Tsühi neko Khrista mo thite, mu zathoko mipü pü thi bate.

²⁸Mü Jihova humi khapü kehucelü sü meta, therao apostleko, kenao sajukepoko, süo kemethamiko, ungo mhatho kethiko, mithi kesürho ketiko, kekhrühiko, mikekha tiko, jü kekre po keyiko;

²⁹Uko metü apostle miko me? Uko metü saju kepo mi teme? Metü kemetha thime? Metü ungo mhatho kethimi teme?

³⁰Metüko mithi kesürho süme? Jü kekrekre mhaphrü metü pome? Metü jü süko co pome?

³¹Vele mhaphrü kevethoko menyü zo yi te, sizi ve rekri ti I tha neko ka süto.