Read Chokri Naga CORINTHMIKO KÜRAO 13 Bible Online

CORINTHMIKO KÜRAO 13 - Chokri Naga bible

CORINTHMIKO KÜRAO 13

¹I thüma mu tüyo jüyimiko jülüni poyi zo sheri, kekhrü (mivaphiti) bamo lize I bavü kevü fü bizo, mori bazho kekhrüti bizo.

²I saju kepo mhaphrü bazo sheri, mu kemekhrü zhüko se mu lüyi zo sheri mu mhase metü bazo sheri, mu I kemelü metü bazo sheri, side cejütuko thi retuyi tazo sheri, vele mi vaphi ti kekhrü bamo lize I sü mhapüri mo.

³Amha azhü kengupü kedimi vathi sü, mu upho pü melü thüsü, vele mivaphiti kekhrü bamo lize süko ala kepra kemeve di.

⁴Kekhrü (mivaphi tisü) ba mecho sügü sühe keyi, miyo tsülive, kekhrü süo mha meho ta yomo, kekhrü süo ko kemeha khobü ta yomo, utho uchuti, ulü kerekrü ri yomo.

⁵Seli ngokemo do thi tayomo, pütho püzhozhülü tamo, pü nümo mhamha ta yomo, mha kesu lü ta yomo.

⁶Kesu kerho kolü rechü tayo mo, vele kethokolü unü rethu tayo.

⁷Mha metükolü hepü tayo, mha metü melüyo, mha metü lüpü kemeri bayo, metülü sügü sühe yiyo.

⁸Miva phi ti kekhrü thathi ta yomo, vele saju kepo bazo sheri uko thathi tato; jü lüni kepo bazo sheri süko latato, mhase bazo sheri di tato.

⁹Kekrelamori uko zapü lebi kesezo mu saju sheri zapü lebi poyo,

¹⁰Vele vetsütsoti kevori ce süce vetsütso kemoo tatato.

¹¹I natsi kebace I natsimi bide jüpo I mhalü ti natsimi kelü bide mhalü, vele I pethi ta thüma thiyi ketasa, I natsimi bi ketako metü khave.

¹²Kekrelamo u tsühi khriva pülü mha ngokemetsemode ngo kebazo, vele pünha mhotsu kezüngoto, tsühi I zapü lebi seba vele pünha I sekebako metü seyi tato.

¹³Tsühi kemelü, kemeri mu kekhrü hi süko kezüba, vele metüko dolü kezhotho (kemeletho) sü kekhrü.