Read Chokri Naga CORINTHMIKO KÜRAO 14 Bible Online

CORINTHMIKO KÜRAO 14 - Chokri Naga bible

CORINTHMIKO KÜRAO 14

¹Mhakha miketsü kekhrü hu zote, mu rüpü mhaphrü menyü sayi zote, vele saju kepo neko phuyi te.

²Sekemo jü po keba thüma ce po bamo vele, siri pü rüpülü ketekhri ti jüpo ba.

³Vele saju kepo thüma ce poba püthi meve sü ketola, tarho kesü mu thelü tho melu kesü.

⁴Sekemo fü po keba pütho püthi meve ba, vele saju po kebao kehu thi meve keto la poba.

⁵I neko metüpo sekemo jüpo nyüzo süo ceri saju poti veku; kekrelamori pü saju kepoo jü sekemo kepoo ce zhoku tila, püco po kemese sü kemosa, mu kehu thi mevesü.

⁶Tsühi, azüneko, mhace I jüse kemo po de I neko ce vori, nekoce püco vacho sü kemo sa nekola dipü kemeve ba, mori mhase mori saju kepo mori zü keta thezhoko khi vori molize?

⁷Kerhü kediko zori ufüseyo, leli mori harp libüko, uko fü thi kemetse sü mo lize, dipü bide thefü seyi ta süo lelime mori harp libü sheri?

⁸Mhace thecü khu kemetse sümo lize sopü therila keredeyi veta?

⁹Sübi neko sekemojü popü mipo seyi keve thisü molize, dipü poba sheri seyi tome? Kekrelamori no popü tükhralü sü bate.

¹⁰Jükekro, thefü kekro cejü ba, süko püri uco kedi kethi bamo.

¹¹Süla I püco mhace semo lize, I po kebao mhüjülü mhase kemomizo, mu mhapo kebao sheri amhüjülü mhase kemomi zo.

¹²Neko sübi rüpü mhaphrükola neko lü keni thiba zosheri, kehuce thi meveyi keto ve rekriti phuzo yite.

¹³Se kemojü kepoo sheri püco vachopü mice süyi ketola kecho thiyi te.

¹⁴Mhace I se kemojü kepomi pü lize a rüpü kechothi ba, vele akese kelülü ala kemeve ngoyi mo.

¹⁵Süsa dipü bi tata? I rüpülü kecho thito mu akese kelü lü sheri, I rüpülü tsale thito, mu amhase lü sheri I tsale thito.

¹⁶Kemosa no rüpülü kethezü khasü süce thethilü kebako nkepo semo lize dipü bide “Amen” zisü ta, no kemeza kha kesü semo talize?

¹⁷No kethezü khameve shusü zori, vele kekremiko thimevesü mote.

¹⁸I a Jihova meza, I neko metüko ceri sekemo jü po mekro ku ba yoti la.

¹⁹Siri kehucelü jüco püngu akeselü popü mi metha kesü no jü nyekeri sekemo jülü kepo ce veku.

²⁰Asazüjürako ne mhakeselü natsimi thita hite; vele mithimesu tilü neko natsimi thite, vele mhaselü ne pethimi thite.

²¹Thezho lesilü thopü kemeta, thüma jükekre kepoko umü kekre ketiko I thüma hikoce jüpo süto, sizosheri uko afü renyiyi ho, Niepoo posüte.

²²Süla jü kekrekepo zasi püzo, kemelü milamo, vele melü kemokola, vele saju kepojü kemelü lü ta kemoko khrühi yomo, vele kemelü miko la.

²³Mhace kehukro metü tavo thethi pülü kemekroyi, de metü semo meyilüjüpo ta, mu sülü melü kemomi, mhase kemoko vori, uko nyo bate siti pota mo tome?

²⁴Vele mhace metüko shaju pota, mita ukodolü vori melü kemo mori mhasekemomi, pü kelüce metüko pü mejo bata lizu mhalü tato.

²⁵Mhahiko kemekhrü pü melülü thi kesü, mu püzü nekü tsü Jihova reshü tato, mu Jihova neko züta kethozo sizi tato.

²⁶Dipü biti thiti mesü ta, azüneko? Neko tavo kengu keyice neko metü tsale ba, hülüzho koba, umeyilüjü ba, kehala kesüla, mu ucokepo ba; mha metü thi meve kesülü thite.

²⁷Mhace humi sekemo jü poyo lize, mikena mori kekrotholü misü züde kebadolü mipüpo ufü kela kesü (uco kepo) thite.

²⁸Vele uco kepo bamota lize püpo kehucelü kemekre thita te, pütho pü rethi mu pü Rüo zü kerethi batate.

²⁹Saju kepo mikena mori misü pote, mu kekremiko po pütüme moshi lü süte.

³⁰Mhace mhahu kehala prari ta lize, pükhüce kebako kerao po kemekre thi batate.

³¹Neko mi püpü de saju metüko poyi ve, side metüpo seyi ketola, mu metüpo thelü tho kemelu thisü ketola.

³²Saju kepo rüpüko saju kepomiko füzüyo.

³³Kekrelamori Jihova kebükerüti kekuomo, vele kezü keve, kemesamiko kehuce metülü.

³⁴Thenomiko po kemekre thiba tate kehucelü, ukopo jüpo mori ve, vele uko jüzülü bayi te zisü, thezholü sheri popü metazo.

³⁵Mhace uko mhahu seba lize, uko unopu neko ce mhaketso yite, celüno; kekrelamori thenomi kehucelü mhakepo kethenga püzo.

³⁶Neko yo Jihova jü dipü voriba? Mori süo nlebi prari me?

³⁷Mhace thüma humi utho ulüpü saju kepomi lezi, mori rüpü thüma le zi, püpo semu lü yite, I thopü neko ce kesü Niepoo apo thosü no ace kha kesü jüzo.

³⁸Vele mhasekemomi po mhasemo zo bate.

³⁹Sübi, asazüjürako saju kepo menyü sai zote, mu sekemo jü kepo sheri khalidü va hite.

⁴⁰Mhametü kezüvelü mu pütüpüzholü thiyi te.