Read Chokri Naga CORINTHMIKO KÜRAO 15 Bible Online

CORINTHMIKO KÜRAO 15 - Chokri Naga bible

CORINTHMIKO KÜRAO 15

¹Süpi sheri I jüyikeve poketa halapü neko ce süve, neko sheri süo ngopü tate, mu neko sülü thayi tazo.

²Neko sülü kelayite, mhace neko sase tayo lize I neko metha kesüko, sizi kermosa neko kemelü kemethu tazoto.

³Kekrelamori I melü keyi therace uko la Khrista sa keva ukephomako lano, ketholesilü thopü kemeta bi.

⁴Pü khi khrüva, mu zhosünha pü rhüla süta, ketholesilü thopü kemetabi.

⁵Pütavo Cephas mengosü, mu methakeyi mi kerikenako sheri;

⁶Süsalü ukromiko (sazüjürako) thüma kra püngu kezü sheri vapülü mengosü, kekrolaco tsüdo sheri rhü balu vele humi sate.

⁷Süsalü James mengosü, mu apostelmiko metü sheri mengosü.

⁸Mu thelalü a sheri mengosü, pütü kemo lü (tümolüpü) menu keyio.

⁹Kekrelamori apostlemiko dolü kenitho, I apostle mile ziti cüsümo, kekrelamori I Jihova kehu methi tayo tila.

¹⁰Vele Jihova kelakeyi kekhrü la I tha hibi tate; mu pü kekhrü süo kemechü thi tamo vele I kekremiko ceri mhatho thi mekro kutate, siri I no mori Jihova kekhrü ayo keta thozo.

¹¹Süla I sheri mu uko sheri hako zhopo thitayo mu neko melüyi.

¹²Mhace tsüdo Khrista kesalü rhüla sü keta uzhopo thita lize, neko dolü dipü bide rhüsalakesü bamo siti pota yola?

¹³Vele mhace kesami rhüla kesü di lize, size Khrista rhüla sü mote,

¹⁴Mhace Khrista rhüla sü mota lize, süsa uko zhopo kemechü kemerü tazo, mu neko kemelü sheri kemethu tazo.

¹⁵Ile, uko Jihova zhopo kethi kemedami ta zoto Jihova Khrista merhü sala sü mozo sheri uko Khrista merhü sala süte ziti zhopo thita ketala, sübi kesamiko rhülayi mote.

¹⁶Mhace kesami rhüla kesüdi ze süsa Khrista rhüla sü mote.

¹⁷Mu mhace Khrista rhüla sümo ta lize, nkemelü kemethu kemerü, neko ne kephoma lü bazolu.

¹⁸Süsa Khrista yolü tade zü ketakori kate.

¹⁹Mha ukerhülü lebi la ukemeri Khrista yo batisa, uko hesheherü phikemezhe kropü tazo.

²⁰Vele tsüdo ce Khrista rhüla sütazo, kesalü no, mu zükezülü rhüla kesü püse kera thoo.

²¹Kekrelamori thümala kesa vorita, mu kesalü rhüla keyi sheri vorita.

²²Adam la kesa vori, metüyo sübi Khrista lano kesalü rhüla keyi thümayo vorite.

²³Vele kehopü sheri utho uyo thezho püta: Khrista rase zhürao, süsalü Khrista yolü ketako pü sala vori tice.

²⁴Süsa thelao vorito, pü Jihova kede rüvü phu mesü kesüce, uko Poo, pü thezho mikekhapü ketako, keku mu kemeco metü nüda kevasa;

²⁵Kekrelamori püpo kede thita ketola, pü ngomumiko metü khapü püphekhro kedüva kemothe.

²⁶Ngomu thelathoo meka ketoo sü kesaozo.

²⁷Pü mha metü pü pü phekhro süve; vele mha metü kha pü khrosü vale po kebasü, pü lebi pü mesemengo sü, mha metü pü pükhro sü kevao tho.

²⁸Mhametü kha pü khro sü kevao sa pü Nuo ri kha pükhro süsü, side Jihova po mhametü lü püpo süta ketola.

²⁹Sizi kemosa uko dipü bi tata, saketako zalü jülopü keyiko, mhace kesami rhüla kesü dile zitaze? Dipüla uko kesami sülü jülopü ba?

³⁰Uko dipüla bavüdo metülü kebükerü ba zota?

³¹I neko rechü keba Khrista Jisu la I ngoyi keta hio kenyo ti I Niepoo la tüsonha sasü tayo.

³²Mhace thüma zholü I Ephesus lü khonukozü ketü kezhe keba, ala dipü kepra ba, mhace kesami rhüla kesü bamo zo lize? Uko mhati mu krazo bata khe, kekrelamori uko sodo sata teru.

³³Mipo ukedova hikhe; mhapo kekri kesüla uzhokeveko jümerho vayo;

³⁴Cosü kemezilü voyi khe, kephomathi hi, kekrelamori humi Jihova la thenga pü.

³⁵Vele humi kelüce, dipü bide kesamiko rhüla süta? Mu umo dipü hü bide vorita?

³⁶Nekemeloko, neko rase so kesüko sata mode süri yomo.

³⁷No so kesü uthi umo bi sosü, süo rase püzo, süo ata (teha) zori, mori ubete tsa kekre sheri.

³⁸Vele Jihova pütho pünü pümedolü uthi umo thisü, mu rase sheri utho umo ne.

³⁹Uthiko metü kemhamo, vele thüma thi kre, khonuko uthi kekre, fü (khu) sheri pü thikre, merasheri uthi kre.

⁴⁰Tülü kehümi ri uthi upho kekrekre phrüzo, vele tülü kehü zapozale kethipü mu cejülü kehü zapozale kekrepü.

⁴¹Nace zapozale kethi ba, mu khre sheri zapozale ba, thenyü zapozale kekre püba, thenyüko sheri zapozale kekrekre phrüzo.

⁴²Süla rhüla kesü kesamiko sheri sübi, cemu reta ketolü sosü, süo kece kere thi kemo lü rhü sü tato.

⁴³Thechu therho kedilü sosü, süo merhü pü zapozale lü sü; kethathilü sasü, suo phu mesüpü kekulü sü.

⁴⁴Uthi upho hülü zholü sosü, süo rüpü kehülü phu mesüyi; hülü zho uthi umo kehü ba, mu rüpü mo sheri ba.

⁴⁵Thopü kemeta, thüma kerao Adam, thipü ukerhüro kenepü thisü, mu Adam thelao thimerhü pü rüpü thisü.

⁴⁶Sisheri rüpü kehü süo theraomo vele hülü zho kehüo ra, süsalü rüpü kehüo vori.

⁴⁷Thüma kerao cejülü mu cejü bi, mu thüma kenao tülü vori, Niepoo zo.

⁴⁸Cejüo zhorele bi, cejülü vori, mu tülü kehüko tüyo zhorele thisü.

⁴⁹Mu uko cejülü kehü hübi, uko sheri tülü kehüko hü thipü to.

⁵⁰Tsühi, asazüjürako, I po keba, uthi umo khipü tülü kalü thiyi ho, Jihova kede ka yi yi ho; mori kamu dita keto (cemu reta keto) püvo cemu retayi keho kalü thiyi ho.

⁵¹Hihe, I mha ketekhri tipü neko mese süto, uko metü zü taho; vele uko metü rede tato.

⁵²Dopülü, umhü mhüphra kesü pülü, thecü kekhulü, thecü khusü ti tülü, kesamiko phu mesü pü ce mu retayi keholü sü vato, mu uko redetato.

⁵³Kekrelamori cemu reta keto hio thipü cemu retayi keholü süva moze kesula, mu sata keto zhühio thipü sata keho zhü thisü moze kesula.

⁵⁴Süla cemu reta keto zhüo thipü cemu reta keho thisü, sata ketozhü thipü sata keho mo thisü, sizi keyice thopü kemeta jü, thitso yito, “süo poti”, kesao kukeyi po kesao mezo yita.

⁵⁵O kesao ntha dipüce ba? O mhakhreo nokukeyi dipüce ba?

⁵⁶Kesa thasü kephoma mu kephoma keku sü thezho.

⁵⁷Vele Jihova meza pü uko Niepo Jisu yono keku khapü uko tsü sü kevala.

⁵⁸Süla azüneko akekhrüko, tha melü yite, rede releta kemo, Niepoo mhatholü ukhashu kesü, neko seba metse Niepoo la ne mhatho thi kesüko kemethu thita mo zo tila.