Read Chokri Naga CORINTHMIKO KÜRAO 16 Bible Online

CORINTHMIKO KÜRAO 16 - Chokri Naga bible

CORINTHMIKO KÜRAO 16

¹Tsüdoce I kemesakola mhakhrüpü tsüsü keto I Galatia koce thino posü kehuce kolü, neko süo thisü te.

²Deobado zho theranha neko mhakha kesüko püvo kengu meta vate, Jihova neko po mha kepra kemeve thi keyibi I tavori tice süko püvo kengu bata mo ketola.

³Mu I tavori tice neko sopü neko medolü neko lesitho kesü khipü apo ketsüsü keto la, neko mephromevode kha Jerusalem lü kesü.

⁴Mu mhace I tavota lize, uko zü kesa votato.

⁵Tsühi I Mecedonia chozü tavori to, mu sülü ta neko ce vori to.

⁶Mu I tüsü tüco neko celü batato, I keho thi sheri arevü cholü neko azü vori te.

⁷I chodelü tsühi neko zü kesü mota, vele pütü dopü neko celü thothü süto, ziti melü ba, mhace Niepoo pü medo to lize.

⁸Vele I Ephesus lü Pentecost vori kemothe thothü bata to.

⁹Kekrelamori moze kesu pü cekha kezho pü khripü atsü metate; mu sülü kemetsumiko kekroba.

¹⁰Tsühi mhace Timothy vori lize, püpo methi mpe hide neko zübata te; kekrelamori pü sheri amhatho bi mhathi tazo tila.

¹¹Süla mipüpori pü khapü mhatho kemo thiva hite, vele püpo krokrü de bayi te, side püpo ta ace vorite, I püzü kesünyü keba pü usazüjürami zo tila.

¹²Usazüo Apollos la I püpo ta neko ce vorinyü shuba, usazüjürako züde; vele pü medolü lize tha südo ce püta vori hole zi bate, vele pütü püla pütü mu thiyi kevece vori toshe.

¹³Neko fü mu laba zote, kemelü lü tha metü pü bate thepumi thipü bate, metü meco yite;

¹⁴Ne mhametülü kekhrü lü mhathi bazote.

¹⁵I nekoce choyo, sazüjürako, neko Stephanas cekro ju seba tho, Achoia mhatho se zhürathoko, mu uko kemesako yitholü uko nüphayi keho thi tazo.

¹⁶Neko sheri sübi ti thite, mu kehopü sheri hako zü mhathi ketako yo; kekhrühi kesüko.

¹⁷Staphanas, Fortunatos mu Achaicus hiko kevori la anüshuzo; kekrelamori neko celü tsakhu kebako uko khasü neko tsüsü ketala.

¹⁸Uko a rüpü thi merhüsü mu nekothi kesürhü kesüla, süla neko sübi thisü bazote, süko bi tiko yo.

¹⁹Asialü kehuko neko kelu süzüho; Aquila mu Priscilla ni sheri kelushu süho Niepoo zalü, unicelü kehu kebako metü.

²⁰Uko sazüjürako metü neko kelu süzüho; neko kemesa kemebo keti zholü hunehu mebo süte;

²¹I Paul atho abe pü ne kelu süho.

²²Mhace thüma kehopü sheri Niepoo khrü kemomi püpo Anathema Maranatha thi tate.

²³Ngokemezhe kekhrü uko Niepoo Jisu Khrista po neko zü ba keyio thite.

²⁴A kekhrü po neko yo ba yite, Jisu Khrista zalü. Amen.