Read Chokri Naga CORINTHMIKO KÜRAO 2 Bible Online

CORINTHMIKO KÜRAO 2 - Chokri Naga bible

CORINTHMIKO KÜRAO 2

¹I Ta nekoce kevorice, asazüjürako, mu alipü neko, I ketekhri kethi zhopo kethi mhase fülü po vorimo.

²Kekrelamori I mhakekrepüri setoli lüpü tamo Jisu Khrista lebi zo, mu pü cross sü

³I ta nekoce kevorice thathi mu meche de vori, pü reshü zode vori.

⁴Ajüpoko makro thechu mu mhase fü lümo, vele Rüpü thakalü mu pü kekulü.

⁵Süla neko kemelü po thüma mhaselü mori Jihova kekulü bayi ketola.

⁶Vele hako ketsü jü poyo vetsütso tiko dolü, vele cejülü ketsü jümo mori küzhomiko jü mo. Süko kemethu thita yo.

⁷Vele hako Jihova mhase khipoyo ketekhri tiko, mhase kevapü ketako, Jihova cejü bodü mhüjü khapü hako zapozale thi ketola.

⁸Süo cejülü kezho miko setamo, uko setayo lize uko zapozale Niepoo khipü cross (nphemedü süyo) gu valho.

⁹Vele thopü kemeta umhüpü ngo kemo, mori uni khipü reni kemomori thüma melülü lü kemo Jihova kesüpü metate pü khrüyo kezhoko la.

¹⁰Vele Jihova süko kehapü hako meka süte pü Rüpü lüno, kekrelamori Rüpü mhametüko phu tayo, ile, Jihova zhü kerelüko.

¹¹Kekrelamori thüma sopü thüma zhüko zori sebata, thüma rüpü kesezo kemosa? Thürüo zhüko sü thüma püri semo, vele Jihova Rüpü süko se.

¹²Tsüdo ngokeyi uko cejülü rüpü mo, vele Jihova Rüpü, ukopo uma thi mode Jihova khakesü mhako seyi ketola.

¹³Hako poketako thüma mhase pü metha keta jüko mo, vele Kemesa Rüpü metha ketako, rüpülü mhathoko khipü rüpülü zhüko zü kemede.

¹⁴Vele uthiupho kepü thüma Jihova Rüpü zhüko seyi yomo, süko kenyo (mhase kemo) zhüzo siyo, mori süko seri yiho, kekrelamori süko rüpülü mhakeve kesu se kekre yiyo tila.

¹⁵Vele rüpü thümako mhametü pe lü tayo, sizo sheri pütho zono mipüri mejo ta yomo.

¹⁶Kekrelamori sopü no Niepoo lüdoko sebata, side pücho thasü tome? Vele hako Khrista lüdo khipü tate.