Read Chokri Naga CORINTHMIKO KÜRAO 4 Bible Online

CORINTHMIKO KÜRAO 4 - Chokri Naga bible

CORINTHMIKO KÜRAO 4

¹Thüma kehopüpori habi de ukehülü mipo melüyi kesümi thitate, Khristaa yitho mipü tibi, Jihova mhatho sekemo ungo kethi yitholü michotha kethimipü tila.

²Sülebi mori michotha kethimi kemelü kevemi ziti mipo ngoti mesü.

³Vele ala zono neko sheco kethi sü mhakedopü zo, mori thüma kekrepo thi sheri, sizizo, I atho asheco thimo.

⁴Kekrelamori I athozono mhapüri sebamo, sizosheri I hice athi kematho bamozo, vele asheco-o sü Niepoo zo.

⁵Süla pütü mhüjü mhapüri sheco thi hite, Niepoo vori kemothe, pü kezülü resürevapü ketako metü hala sü ketola; umelülü mharhü ketako metü kehala süto: mu süce thüma kehopü sheri Jihova chuto.

⁶Mhahikola, azüneko, I mhakhi kedepü azalü mu Apollos zalü süvato, neko lano; side nekopo haniyo mhaseyi ketola, thüma lü kerekrüpü thopü kemeta pi sümo ketola, mu neko humi utho ulükerekrü kuta mo ketola.

⁷Kekrelamori sopü nthipü mice rekrüku süta? No no bakemo pü dipü la bale ziba? Tsühi no ngoyi ta lize dipüla nthi kerekrü zapozale thibata? No ngoyi kemo pübi bateme?

⁸Tsühi neko chupü bate, mu neko mhane bate, neko kedemi thi bate hako samode, mu akemenyü nekopo kede thita nyü kethozo, side hako sheri neko züde kedethita ketola.

⁹Kekrelamori akelüce Jihova ha apostle miko ketsü kenutho thisü tetho ziba, dokhri va ketola ketsü kesüko; cejüo po hako pe bate, tüyo choyimi mhüjülü mu thüma mhüjülü sheri.

¹⁰Hako kenyomi thite Khrista lano, vele Khrista lano neko mhakesemi (ketsümi); ha kethathimi, neko keku miko thibate; neko therho kepümi, vele hako mipo thalice ketami thite.

¹¹Tsü bavüdo hilü ketso hani kenani therimeri bazo mu fümene di süsa miko hani meshu mu hani keba thethiridi.

¹²Tsühi ketso sheri hako therimeri tazo, mu fübemene methu ketami thitazo, mu meshu, mu hakeba thethi sheri bamo.

¹³Mhatho thizoba, hatho habe khipü, hameshu zo sheri hako jopü sümi tsü thazo, ha methi kesüko la ha kemezhe ti püyi.

¹⁴I mhahiko thopü neko kengasü keto lamo, vele aneko nekopo nekerepü seba ketola, akekhrü miko.

¹⁵Kekrelamori nekotho Khrista yolü kemetha nye keripü batazo sheri, siri nekopo kethi thüma kekro bamo, kekrelamori I Jisu Khrista jüyikevelü neko menu kesüla

¹⁶Süla I nekoce choyo neko asakemejimi thi yite.

¹⁷Mhahiola I Timotheus ketsüpü nekoce süzüho, pü kematho anu zo Niepoo celü, pü azho areleko khipüvo neko po arekrayi ketola, Khrista yolü, I kehorapü zori kehucekolü mimetha ketako.

¹⁸Tsücehi humi ukhipü kerekrü kemeko bate I nekoce tavori hoketa lüde,

¹⁹Vele I rekri vapülü nekoce vori tato, mhace Niepoo medo lize, uko kemeko jüpo keba füko seyito, vele keku kene jü.

²⁰Kekrelamori Jihova kede kethisü jüo zomori keku lüto.

²¹Neko kedipü biba? I sürü khipü nekoce vori tome, mori kekhrü khipü vorita, mu rüpülü menünu tilü ta?