Read Chokri Naga CORINTHMIKO KÜRAO 6 Bible Online

CORINTHMIKO KÜRAO 6 - Chokri Naga bible

CORINTHMIKO KÜRAO 6

¹Neko dolü humiyo kenyo ta lize, jünyoo khipü matho kemoko mhüjülü vo, kemesa miko mhüjülü mori.

²Kemesako cejüo jünyo keti keto neko semo zome? Mhace neko cejüo sheco thito lize neko dolü mhakenikosheco thiyi hozome?

³Uko tüyo choyi miko sheco thi keto neko seba moteme? Sizilize cejü hilü kehükola u dipü thiti mesü ba?

⁴Mhace neko tsüdo kehüko la sheco thi to lize kehulü keniko la mhalü ti mesü mome.

⁵A kepo neko la thenga. Neko dolü mhakese mipüri di teme? Mote, neko sazü jüra dolü sheco kethi bamozo teme?

⁶Vele njürao püsazüozüde jünyo celü vo, süo kemelümi kemopü.

⁷Tsüdo neko dolü kekrishu bate, neko neko hunehu züde thezho kekhi jünyo celü kenyo bate. Dipüla neko humi süo khiyi mota? Neko dipü thide kekri ketako khisü mota?

⁸Mote, neko kekri bate, vajo tate, süko nesazü jürako zo (uthi upho thi kemesa keyi, ukhrü kemesa keva).

⁹Mezi kemoko Jihova kede kalü ngoyi ho, siti neko semo zome? Mipo neko kedova hite, kerezhü miko, mori therü marhe kereshüko, mori thethenu miko, mori hüketheno ketako, mori mihino kethiko, mori thepumi züde mhakesu kethiko sheri.

¹⁰Mori keregomi sheri, mhakemehoko, kemezü miko, kezhe kenyüko, mizhü süti ketako, Jihova kede kalü thiyi ho.

¹¹Neko dolü humi süko bi tate, vele neko khrü kemesa kevakote, vele neko Niepoo Jisu zalü thi kematho kesüko, mu Kemesa Rüpü uko Rüo zalü.

¹²Mhametüko ala thüzho tsozo, vele thezho metü vetsomo, mha metülü ala thezho ba, vele akhipü thezho khro süho.

¹³Ketico sü uvade lazo, mu uvade sü ketico la; vele Jihova süni kenani meka vato. Tsühi uthi upho kekhrü kezü zo keto lamote, vele Niepoo zhüte. Mu Niepoo sü uthi upho late.

¹⁴Mu Jihova Niepoo phu süte sübi uko sheri phu merhü sü tato, pü kekulü.

¹⁵Neko semome? Uthi upho sü Niepoo zapüzo. Sizisüze uthi upho khipü thethenu mipü zhü thiva tome? Shütozo. (Jihova khave).

¹⁶Dipüla neko semota? Mipü püthi püpho khipü thethenumi tsüva lize unithipü thi tato.

¹⁷Vele mipü ukhapü Niepoo tsü kevasa uni rüpü zhürhü thite.

¹⁸Keregü kerezhülü tatate, Kephoma kehopü sheri uthi upho chozu laco thi, vele keregü kerezhü thi kesüo kephoma thipü püthi püpho metsu süte.

¹⁹Dipüta? Neko semo zome, nethi nepho sü Kemesa Rüpü nelü kebao reshüce? Neko lü Jihova ba mu netho nezhü moketa?

²⁰Kekrelamori mhapü neko khriyi ketala, süla nephopü Jihova la zapozale thi süte, mu ne rüpü sheri süo sü Jihova zhüzo tila.