Read Chokri Naga CORINTHMIKO KÜNAO 2 Bible Online

CORINTHMIKO KÜNAO 2 - Chokri Naga bible

CORINTHMIKO KÜNAO 2

¹I nieko lü thi müshü la mo kütola nieko cie vo mo küto müdoyi te

²I nieko lü thi müshüsü tsüsa sopüh alü tho müluyi veta, I ulü thimüshüküsüko zo kümosa?

³Süla I dzü thopüh nieko cie sü kükrelamole a küvo tüce a thipüh anüyi kütsü müsüh mako yolü alü thi müshü küva kümüprü la, I nieko mülükhro küba a künüo sü nieko mütü nü zo kütsüla.

⁴Süo I kümüzhie mu alü thi no amhüdzü mükri zono nieko lü thi müshü vamo vele I nieko khrüshüba kütsü nieko po sheyi küto la thosü.

⁵Vele humi ulü shütari süo alü thi müshüvamo vele küdopüh nieko mütü thi müshüve.

⁶Sümi makro u müjoküta tsüpi sazho khatsü sa mori ve,

⁷vele nie uko küjova mu ulü thomüluyi te, pü lüzhiepo püthi müshü tsüntsova mo kütola.

⁸Süla I nieko po sümi khrü kütsü tha uka lasü no choyo.

⁹Hihi lano I thopüh nieko ce küsü nieko mha mütülü dzüzü tühlü ba memasi tsü sheyikütola.

¹⁰Nieko mi kühopüh küjo ri vasü tayo Iri vasü vayo. I vatsü küva süo nieko lano Khrista mhüdzülü vatsü vayo.

¹¹Satan po uko yolü u mhopü thimokütola: kükrelamole uko pü doko shemo ba motsüla.

¹²I Troas lü Khrista dzüyiküve poto küvoce ri Niepoo yolü ciekha khri a tsüsü,

¹³vele a sazüo Titus ngoyi mo kütala a lü rüyiyi mota, süla ta Macedonia lü vote.

¹⁴Jihova müza, pü Khrista yolü ha süta pü kuküyi müshesüyo mu hayolü Püh sheküyi rüh küthünyü thüthi kühorapühri müshe süyo kütsü la.

¹⁵Süo ha Jihova mhüdzülü Khrista rüh küveo thite, külayi kütako mhüdzülü ri mu kataküzüko mhüdzülü ri:

¹⁶Kropüh la küsalü no küsalü küvocho mu kükreko la kürhülü no kürhülü küvocho. Mu somi si kütsü thiyi shüh-a?

¹⁷Hano thüma kükro Jihova dzü thimüshüh kütsü bimo: vele ha pü mhüdzülü müzi, mu Nyepoo mhüdzücie ha Khrista la dzü po yo.