Read Chokri Naga CORINTHMIKO KÜNAO 4 Bible Online

CORINTHMIKO KÜNAO 4 - Chokri Naga bible

CORINTHMIKO KÜNAO 4

¹Ha ngokümüzhie ngoyi mu yitho hio ngokütsüla ha chomüza tayo mo.

²Si kütsüo mole ha kümükhrü kümüvako khave, küdove tsü cholü mo, mori kücejü lü Niepoo dzüko khimo vele küthoo zhopo thi mu mipo sülü ha lüdo ri sheyi küve thi tayo.

³Mhanuü süo küvata tsüsa kata kütoko mhüdzülü zo

⁴Cedzü hio ropüko süko thülü mhüo thi mücie ve, zale küthi Khrista dzüyiküve Nyepoo Jihova rhü thi küpüo po uko vamve mo kütola.

⁵Ha hatho ha zhopo thiyo mo vele Khrista u Nyepoo zhopo thiyo mo ha pü cieta zo.

⁶Süo Jihova “küveo po küzüo va mveyite” si küsüo Khrista zülü ha mülü vamve sü.

⁷Vele cienyie hio rünyo püh küthi büh yolü ta, süo ve lotsü kütsü kükuo Jihova yo mu hayo bamo kütsü thasü kütola.

⁸Lucohico ha dzü kümüzhie yo, süla halü thathi tamo; halü dzü kühokürü thisü yo, vele hathipüh ha vedi vamo.

⁹Ha müthimünyi, vele ha khava mo; hatsahavü, vele ha müka vamo;

¹⁰Utü mütülü Khrista süh sü püh tayo, süo mipo hayo Khrista kürhü kübao sheyi kütola.

¹¹Ha rhüküba hio Khrista la mipo püh küsa choco süsüyo, süo thimüshü vayiküve mo hio lü Khrista yo kürhü küba tha mika sü kütola.

¹²Sino küsao hayo mhathiyo vele kürhüo nieyo mha thiyo.

¹³Uko kümülülü u ropü kürhüte thadzü thopüh kümüta “I mülü süla I po” hari sü mülü süla poyo.

¹⁴Nyepoo Jisu thi mürhü küsüo Khrista yo hari thimürhüyito hapüh nie sa uko züpüh voto.

¹⁵Mha hiko mütü nieko la zo, süo ngokümüzhie po kükremi tso mükro mama küyi zü Nyepoo zale chuh küchü mamayi kütola.

¹⁶Süla halü thathi yomo si kütsüo mole ha chozou mao thi katazü zori thülü mao tüsonha küsa mama züzo.

¹⁷Kümüzhie za kütsüo hi pütü dopüh la küchothe zalethi küto müshio thipüh müdeyi kündi thi tazüe,

¹⁸Kükrelamole hano küngoko whuzü mo vele ngokümoko whuzüe: küngoko sü pütü dopüh lazo vele ngokümoko küchothe zhü.