Read Chokri Naga CORINTHMIKO KÜNAO 8 Bible Online

CORINTHMIKO KÜNAO 8 - Chokri Naga bible

CORINTHMIKO KÜNAO 8

¹Küzüko ha niepo Jihova ngokümüzhie püh Macedonia kühuko lü küsü sheyi nsa;

²Uko kümüzhie püh rükhurüyi küzü lüri unü phayi ho küba mu thükre po uko cienyie huyi ta küzü lüri uko cieco mphrü zono mha khasü.

³I uko zhopo thito uko thiyiküve mu thiyiküve mhori unü sai zono ulücü lü khasü.

⁴Kümüsako phikümüzhie mhatho hi thibü toleno hace mülo zo,

⁵Mu hio ha müri küba bimo, vele uko ukha Nyepoo tsü müra va no Jihova müdolü kha hatsü sü.

⁶Süla ha Titus hidzü thi swüdüküyi bi nieko cie kümphrü mhatho hio thitsü sü moyo küshü pü hüsü.

⁷Süla nie mha kühopühlüri ve--kümülüri, küpolüri, mhashelüri, nierha küthilüri, mu hakhrü kütsülüri--sübi mphrü kütsü mhatho hilü ri thi mve sü te.

⁸I thüzho bizo no niece po bamo vele nie thülükütho thino mi khrüyokütsü thasüküto la.

⁹Nieko u Nyepoo Jisu Khrista ngokümüzhie mhathoo she bate, pü mhanye zori nieko la mha küdimi thite, sino nieko po mha künyemi thite.

¹⁰Mu hilü I nieko tarhosü nsa, süo nieko humi nzisa thi swüdüküyi zo mono mhahu thi nsa,

¹¹Küba mhatho süo ri thitsüyite, siyi tsüsa nie thi nsa kübako ri thitsüyi to.

¹²Thi nsa kütsüo ba kütsüsa, püyolü kübao sü yiyi ve, püyolü ba kümoo mono.

¹³A küpoo no nieko po kümüzhie mu kükremi po rüyi kütoo mo.

¹⁴Vele kütüyi kütola tsü nie cienyie püh uko küdi vaphisü mu uko cienyie püh nieko küdi vaphi süzino kütüyi küto la.

¹⁵Süsü thopüh kümüta “kükro künguküyio ri rükriyi mo mu kütsa künguküyio ri müdo tamo.”

¹⁶Vele Jihova müza, pü Titus lü thipüh alü bi nieko phi ulüni küyila.

¹⁷Pü ha lüdo ri yiyi zo, vele pütho nieko ce vori küto ulüni shuta zo.

¹⁸Kühu mütülü dzüyiküve mütha kütsü la mi püsheyo tsü a sazüo ri sa püzü kütsü sü zü.

¹⁹Sü lübimo vele kühuko püpo hazü rüvü no ngokümüzhie mhatho hio thi zhochümo Nyepoo za thikümüle kütola küdasü.

²⁰Süo mphrüno khaküsü mhatho hio lü mipo ha lü müjo mokütola.

²¹Ha külü Nyepoo mhüdzülü lübi mono thüma mhüdzülüri mütsümüziyi kütola.

²²Süsa ha zümi püh püh uni sa kütsü sü zü, ha va kükro pü dojü kütsü lü mha kükrolü pülüküni thizo tsü ngoyi, pü tsüno nieko yo pü kümüri nyietü kütala ulünyi pfü sa taho.

²³Titus zotsü ha besüh mi mu nieko choyi mizo, mu uzüni ri kühu choyimi, Khista zaleo lano.

²⁴Süla mhütsu zono kühuo mhüdzülü nie kükhrüo mu ha niela thürho püyo küzho thasü te.