Read Chokri Naga Galatiamiko 5 Bible Online

Galatiamiko 5 - Chokri Naga bible

Galatiamiko 5

¹Süla tha metüyi te, Khrista ne phrüsü kevasa, mu thejü rophalü lü sala hite.

²Hihe I Paul nekoce poba, mhace neko yirü tolize Khrista nekola kemeve bamo.

³Kekrelamori I yi kerü koce po keba, pü thezhoko metü thi keto thepo kepü mi thi te.

⁴Khrista nekola mhapüri kemo thite, neko thezholü nethi kemezi yita lize, neko ngokemezhelü retute.

⁵Kekrelamori uko Kemesa Rüpü yo kemezi kemeri meri ba kemelülü.

⁶Kekrelamori Jisu Khrista yolü yi kerü sü mhapüri zomo; mori yirü kemosheri mhapüri zo tamo, vele kekhrülü kemelü mhathi kesü.

⁷Neko tave shubate, sopü nekopo ketho jüzü kethilü neko kede süta?

⁸Neko kehi kemu thipü neko cüyi mo.

⁹Khre kedopü la pükro metü kra tayo.

¹⁰I Niepoo la neko yo akemeri ba, ne mhakekre lüta mo zotho, vele pü neko kebü kesüo sopü sheri sheco püyo kuto.

¹¹Mu asazüjürako mhace I yikerü metha ta lizo I dipüla mipo amethi zo tata? Süsa Cross nümo kethi thela thi tate.

¹²Uko tavo neko kebü kebako a kemenyü ukopo tapra ta lize veto.

¹³Kekrelamori, asazüjürako neko cüpü ukekha kedilü süve, nekopo nenü nemedo thita keto lamo, uthi upho medokolü, vele kekhrülü hunehu khrühi keti.

¹⁴Kekrelamori thezho metü jüpülü thitso sü, jü süosü lü, no nsüzanu khrüpü ntho nkekhrü bi süte.

¹⁵Mhace neko hunehu mece mu tati ba lize, menu yite, neko hunehu mezo tita mo ketola (thimesa keyi sü Rüpü lüzo, thezho lümo).

¹⁶I hio po, neko Rüpü tayite, mu ne thi nepho kemenyü thita hite.

¹⁷Kekrelamori uthi upho kemenyü sü Rüpü metsuyo, mu Rüpü nü sü uthi upho kemenyü metsu yo, mu uninü kekre; süla neko kemenyü thinyüsa vele thiyi ho tayo.

¹⁸Vele mhace Rüpülü keta neko, thezho lüta mote.

¹⁹Tsühi, uthi upho mhathoko mese bate, süko dipü (hikohi) kekhrükezü, kethenga mhatho, mesakemo, mha meho menyü.

²⁰Marhe kereshü kethenyü, kephi metsü, kelakre, kemedu (chüphri) lüda, kemehye, mishu kedo, kethera (vajo).

²¹Mi resa, kedokhri, kemezü, yoyi kemo, sübiti; I thajü nekoce posü ve, sübiti; thi ketako tüyo kedeba kalü thiyi hozo.

²²Vele Rüpü seko, kekhrü, kenü, thelü kerüyi, sügüsühe mecho, uzho menü keti, keve, kemelü.

²³Renunhe, ukethükerü, thezho kehopüri süko kemetsu bamo.

²⁴Khrista yo ketako uthi upho mu mhamenyü ketako khipü Cross yo guve.

²⁵Mhace u Rüpü hüta lize uko Rüpü lü chotayi tokhe.

²⁶Uko kemethu kemerü zapozaleko menyü tahi takhe; hunehu lüda kethi mu hunehu menyü zimo lekhe.