Read Chokri Naga EPHESUSMIKO 1 Bible Online

EPHESUSMIKO 1 - Chokri Naga bible

EPHESUSMIKO 1

¹U Jihova müdolü Jisu Khrista yitho thi küta Paul-e thopüh Jisu Khrista yolü jütho küba Ephesus lü kümüsako ce küsü.

²u Jihova u Po mu Nyepoo Jisu Khrista celü ngokümüzhe mu küzühküveo po neko züh bayi.

³Khrista tüyolü küvo Ropü thüjoko püh uko prü küsüo Nyepoo Jisu Khrista ne Po po thüjo küpü-o thiyi.

⁴Uko po pü kükhrülü kümüsa mu kürho dakümo thiyi kütona cedzü mejuküyi mhüdzü uko küdaküyi kümha.

⁵Pütho pünü pü müdo kümhade Jisu Khrista yolü uko thükü püh pü nu nuthonu thiyi küto na küsühtü püh mütate.

⁶Pü ngokümüzhe zapozale küthi-o swüyikütona uko khapüh pü kükhrüko thiyite.

⁷Püza yolü mu pü ngokümüzhe küzholü uko rhaküyi mu u küphoma vaküyi ngoyite.

⁸Side uko po thüdo küve mhase mu küsekülü lü mhaneyi u küswu külhü thiyi.

⁹Püthopünü pü müdo mu rhüpüh küta kümha uko po pü müdo kümükhrükümüvako seyite.

¹⁰Side pütü chiepüh kütako tsü küyice tüyo kütako mu cedzülü kütako mütü po Khrista yolü küzüh püh thiyi küto na.

¹¹Pü müdzümüra rhüpüh küta pü mhase mu pü müdolü mha mütü thiyiyo küzho kümha uko po thüka gwüyite.

¹²Side uko Khrista mülü ra küyi kopo pü zapozale küthiyo swüyi kütona.

¹³Nüko püküthodzüo mu külaküyi dzüyiküveo seküyice pü mülüyite. Pü mülüküyi na popühküta Kümüsa Ropü mohor ri vüyite.

¹⁴U rhaküyi püh khriküva ceneko ngoyi de pü zapozale küthiyo swüyi kümothe, püe kalü-o na lhetü thive.

¹⁵Süna I ri nüko Nyepoo Jisu kümülüko mu kümüsako mütü khrü kütsü se küyice.

¹⁶A küchokolü nüko zapo mu mütü mode küthüzü khasü süh bayo zo.

¹⁷Sübide u Jihova Nyepoo Jisu Khrista zapozale Poo po thüdoküve Ropü mu mi seyiyo kümo se küyi pü mhase püh nüko prü küto na.

¹⁸Nüko mhase mhüyo po mhürho yide; pü ucü küyi kümüri mu kümüsako gwüyi küto zapozale küthi ceneko seyi küto na.

¹⁹Mu mülüküyiko yolü pü küku kümüre thizo kütsü thiküsü seyi kütona.

²⁰Pü küku mhatho Khrista yolü thi küsü, küsalü pü phu mürhüh sü mu pü po vo tüyo thüthilü pü zaco ba küta.

²¹Püza poküzhoko yi, kükukoyi, kümütükoyi mu mi kükhayoküzhoko, tsüdo külhü lübi zomode thasa vokütoko ceyi thüza mütü mhu kürükrü-o thive.

²²Mu püe mhamütü püh püphekhrosü vade püpo Kühu mütü piyothite.

²³Kühu süo pümozo, püe süyo swüpü mu mhamütülü püe bayo.