Read Chokri Naga EPHESUSMIKO 4 Bible Online

EPHESUSMIKO 4 - Chokri Naga bible

EPHESUSMIKO 4

¹Sülizo I Nyepoo dzü thi kütayo, nüko po u cüküyi kümha kümüsa külhülü lhüyino nüko hüsü züho.

²Thülürünu, mününu, ulücho mu kükhrü süh humihu khrühi ba zoyi.

³Ropü lü küzüh püh küthi mu küzühküve na u phapüh püh thi küva-ozüh süh tayite.

⁴Nüko cüpüh u sadzü püh na cü küyi kümha, thümo püh mu Ropüyi pühtazo.

⁵Nyepoo püh, kümülüyi püh dzüluyi püh.

⁶Mütüko Jihova u Po püh, pü mha mütüko mhu, mütüko züh ta mumütüko lü tate.

⁷Veli thüma mipüh püh kütsü Khrista müde küsü dü ngokümüzhe pühprüve.

⁸Süo na pühi kümha de po; püe müsolü kho küta ce thüma kükro tüpüh küdzü thive mu müthu mha lünyi küzapüh thümako prüve.

⁹Sülizo pü cedzü kürünulü tsü vade pü züh tüyolü kho küta co küdipüh-a?

¹⁰Püe kürünulü kide tü müsotholü vo küta-e mha mütülü püe swupüba kütayo zo.

¹¹Mu pütho humi po apostle thi, humi po sadzuküsemi thi, humi podzüyiküve zhopomithi, humi po pastor mu kümüthami thiyite.

¹²Side kümüsako küsüh püh yitholü süde Khrista moo thi müzho yiküto na.

¹³Uko mütü po kümülü lü mu u Jihova nuo mhase lü püh thide velotsü kütsü thüma püh thiyi de Khrista zho küve dü thiyi küto na.

¹⁴Side kümüthadzü tükhra kümha kütsüko, thüma kütsürü doko, küdove de miswü küdoyo küzho mharhüko po natsimi kümha de u swü püh licohico va kütsü thisa lhote.

¹⁵Veli Khristae u piyo thi küta züh de kükhrü süh küthoo püh pode mha mütü lü mümayi yo.

¹⁶Thümo pühyo zatho kükrekre küba mütü kükhü kürüh tüpü mu uküku ngotsoyi de uko mhatho u müsüh-o thitsü püh mo püh thiyi dekükhrü lü müma zhoyi yo.

¹⁷Süna Nyepoo zalü a küpo mu zhopo hio; nüko-e Judakümoko vokümüthu kümürü lüdoko süh tayo küzhoko kümha de lhü tasu.

¹⁸Püko mhase zühta, mhase kümo uko yo ta mu uko lükürüh na u Jihova kha küsü kürhüh lü uko khikho kre yite.

¹⁹Uko tho u khapüh kürütsü küthi müniko lü müvo mu uko mühomüniko sühde müsakümo mhatho mütü thi tayo.

²⁰Veli nüko Khrista dzu seyi mozo lume?

²¹Nüko pü se küyi ce Jisu yolü küba küthoo tho nüko müthapüh tate.

²²Süna nüko vo küta külhükügwü-o, u swükütse kütsü müniko na u thimüsu vayo küzho zhoko rhü vate.

²³Mu Ropü lü nüko lü yi thi küsayi.

²⁴Mu Ukümünupü-e thiküsü kümatho mu küthotülü müsakütsü kümhathüma küsao khi bayi.

²⁵Side kücedzü küpoko khava, thüma mütü u sühzanumi ce kütho-opoyi. Tükrenamoli uko thümo pühlü zatho kükrekre kütsüko zo tsüna.

²⁶Nüko nümo de küphoma thi vahi, nüko lü rüda de nace mülü vahi.

²⁷Thürü küsuo ba müra hi.

²⁸Rügoyo küzhoko po rügo sa mota de u be süh mha küveko thiyisidemhapüh kütsakhuko vaphi yi küto na.

²⁹Dzü küsu pühyi po n talü prahi, veli kürünyimi thi n ve süyo küzhongokümüzhe lü dzü küveko poyi.

³⁰Rhaküyi tüsozhoo na mohor vüyi küta kümha de Ukümünupü kümüsa Ropü-o nükümo thi vahi.

³¹Nüko yolü mha kükhuko lükhulüdami kürhekütsü dzüküsu küpo mu külhakütsüko kha vayi.

³²Sülizo u Jihova ri Khrista zalü nüko küjo va küva kümha de humihu ngomüzhe, thülümünü, küjo va küprü mu khreü küprüyi.