Read Chokri Naga EPHESUSMIKO 5 Bible Online

EPHESUSMIKO 5 - Chokri Naga bible

EPHESUSMIKO 5

¹Pü kükhrü nuneko thide u Jihova sadziko thi zoyi.

²Khristae uko kükhrü na pü tho pü khasü de uko na u Jihova ce mürhüh rotho, mharüh küthünyipü thi püh rüsu thi küva kümha de nükopü kükhrülü tayi.

³Veli nüko kümüsako thi küyi züh kürütsü küthi, müsakümoko mumhakümüho hiko po nüko dolü pra sahi.

⁴Mha küsukürhomori kümülo dzü küpo, moyi dzüthudzürü küyu uvazü kümoko pohi de küthüzü khasü ba zoyi.

⁵Mha hio nüko seba; thetheküyiko, müsakümo, mha kümüho thüma mu thürümarhe kürüsukoe u Jihova mu Khrista küdelü lüyi lho.

⁶Thüma pühyi po dzüthudzürükolü u swü küdovahi, kükrenamoli mhahiko na u Jihova lükhue dzüzüh thiyimo küta nuneko yolü voküta na

⁷Moyi süko zühde küdorhüh hi.

⁸Nüko vapüh küzüh lü ta veli tsüo Nyepoo na küvelü bate; süna küveo nuneko thide küve lü tayi.

⁹Kükrenamoli Ropü se-e mha mütü lü uzhove, matho mu kütho poyotsüna.

¹⁰Side u Jihova po yiyi küsü thiyi yo.

¹¹Mu küzühlü küta u mhatho se vüyiyo kümoko zühde kükrotho hidesüko müjo süyi.

¹²Püko kümükhreü lü thiyo küzho mhatho sükoe poyi münga zo.

¹³Veli mha kühopühyi thatha zühyi kütako mhatho küveo lü ngomülemülu yiyo, kükrenamoli kühopühyi ngo mülemülu küyi khüko küveo na zo kütsü na.

¹⁴Süna püe pode; züh kübako coyiküsa lü to süyi mu Khristae püküvekhapüh nüko prüto.

¹⁵Kümülomi kümha mode mhaküsemi thide mütse phrü de tayi.

¹⁶Pü tüsozhoko vemo kütana pütü-o rhayi.

¹⁷Mhasekümomi kümha hide mhaküsemi thi u Jihova müdoko seyite.

¹⁸Mu hezo krade müzüh hi, sülü küyekütsü küba na; veli Ropü püh uküswu thiyi.

¹⁹Chele, küthotsale, mu ropü tsaleko thipüh humihu rüthi, ne mülü lükünü tsale thi mu küle püh Nyepoo ce süyi.

²⁰U Nyepoo Jisu Khrista zalü küthüdzü khapüh u Jihova u Poo prü süh bayi.

²¹U Jihova Khrita küshülü humihu khrikhro bayi.

²²Mi cemineko Nyepoo celü küta kümha ne nopüneko khrikhro bayi.

²³Kükrenamoli mi nopüne-e u cemi piyo, Khristae kühu piyo mu pümoyo külaküyi ri thisa.

²⁴Kühu-e Khrista khrikhro küta kümha mi cemineko ri mha mütülü nenopüneko dzü zühyi.

²⁵Khrista ri kühu khrü de pü pho kha küsü kümha mi nopuneko ri necemineko khrüyi.

²⁶Side dzüo püh dzü kümha khrüküva bide müsa mu rhorao bayi kütona.

²⁷Kürhodamo, thükudi, müsa mu the kümo kühu küdzüve püh thide pütho yiyi küsü thiyi küto na.

²⁸Side mi nopuneko utho upho kümha de u cemineko khrüyi pücemine khrüyo küzhoko utho u khrü kübazo.

²⁹Thüma mipühyi pü tho püthi ngomütsü mode Nyepoo pü kühuküthükü kümha de pü vathi mu thükü tarho tayi.

³⁰Kükrenamoli uko pü mo, püthi mu pü ro lü zatho kükrekre tsüko zo.

³¹Mha hio na thümae pü po pü zu kha vade pü cemine züh püh thitato mu püni thipüh thi tato.

³²Mha hihi kümükhreü kümüva dzü küzho pühveli a küpo-e Khrista mu pükühu dzu küpozo.

³³Süna mi nopuneko ne cemine khrüpüh n tho n kükhrü kümhayi mu mi nopüneko yi ne nopune khrikhro ta küto pe türü zoyi.