Read Chokri Naga PHILIPPIKO 1 Bible Online

PHILIPPIKO 1 - Chokri Naga bible

PHILIPPIKO 1

¹Khrista Jisu cetani Paul mo Timothy uni-e khapüh Philppi lü keba Khrista Jisu lü keta kemesako, pethimiko mu dikonko ce kesü:

²U Kemenupü u Poo mu Niepo Jisu Khrista celü kepari ngokemezhe mu thelü kemenüo po nieko züh ba keyio thiyite.

³I nieko rükra kesümetsüh Kemenupü meza bayo zo;

⁴I nieko la cho kesü metsüh a nüswüdie cho bayo zo;

⁵Dzüyikeve na thüra lü vo tsüketso a züh kebedu kekhrühi vo tsoküyi na nieko müza ve.

⁶Silizo nieko yo lü mhakeve thi swüdü kesüko thi zovo Jisu Khrista tüsozhonha thitsüh sü keto I mülüzo.

⁷Silizo nieko a melü lü baketina nieko ri hiko biyi keto I lüzüzo, kekrelamori I kedzükethi lü ri kesatha kesü, dzüyikeve na tha mütü kesülüri nieko ri azüh ngokemezhe kerhühzo ketina.

⁸Silizo I Jisu Khrista kekhrü sühdie nieko menyiphi bayo keti Kemenupü tho se ba.

⁹I nieko po thelüo lüri, mhase lüri nie kekhrü po kro mama keto la cho bayozo.

¹⁰Sidie nieko po kevethoo thiyiketo na, mesamezi mu jota mo zovo Khrista kevori tsoyi keto na.

¹¹Khrista kemathosheo püh nie kechu thiyidie mipo Kemenupü chu mu Püza po kemeleyite.

¹²A kezühko, hijü a yolü mhakehopühri thikesüko dzüyikeve khavakütao mole po mekrokuyi keto I nieko po süsü shensa.

¹³Kükrelamori Khrista na I kedzü thi leketi kedeo rifüko mu thüma kükremiko pori seyi kütona.

¹⁴Siketio mori Niepoo lüketa uzühmi kekroco a phayi keta na melükechüsayi die methimozo no Kemenupü dzüo po kehüsate.

¹⁵Thüma kropüh-e küthüro mo mizüh kümürha küto la Khrista popüh mi mütha, Vele thüma humi lüthilüdo küve süh Khrista zhopo thisü.

¹⁶Thüma kropüh-e apo dzüyikeve yopüh sünoo a kedayi keta se die a kekhrü na thisü

¹⁷Vele kro kekreo no a phazüh keta apo alü kemezhe tono, mo azüh kelürhüh nyi mo keta la Khrista zhopo thisü.

¹⁸Silizo dibia? Küthera zori mori tüthothi ri kehopühbiri Khrista dzu povazo süna I anü.

¹⁹Ye, I anüte, nieko kücho na mu Jisu Khrista Ropü kekhrühi lü a kelayi tazo.

²⁰I sari rhühri kehopühthi ri jo kemenga taho, mo thepuzo üno hidzübi tsüri a yolü Khrista po zale thizoto, süosü a kemerio zo.

²¹I rhühta ri Khrista na zo, Satato ri a la meveku tizo.

²²Deri I amo hio rhüh ba no mhakeve thiyi velizo; dipüh keda tosü I semo.

²³I süni dolü ba, I tata no vo Khrista züh batanyi, süo vekuzoto keti na.

²⁴Deri sitazori I rhüh keta no nieko na vevü.

²⁵Nieko po mesa bayiketo na mu nieko kemelü lü nienüyi keto na I nieko zühba zovo molizo kesü I lüyi.

²⁶Kükrelamori apo nieko züh küngoladie nieko po ala Khrista Jisu yolü nieko nüsayi keto na.

²⁷Nieko Khrista dzüyikeve na nie zhorüle pütüthi bazoyite, I nieko zühbari mori apo nieko ropü lü kezüh püh thi metü keba, lüpüh thi dzüyikeve kemelü lü hütüketi a po seketo na.

²⁸Nie kemetsümi po nie kedüvahi. Hiohi puko na keka zasi pühzo, deri nie na Kemenupü cekevo kelakeyi zasio zo.

²⁹Khrista zalü khapüh nieko tsükesüe nie po melüketo na lübi mo, deri nieko po ri Pü na kemezhe sü keto na.

³⁰Kükrelamori I thadzü a rhathi kevo nieko ngovate mu tsüri süsü kemha bazoketi nieko ri sekeba kemha nieko ri nie rhathiyi keto na.