Read Chokri Naga COLOSSAEKO 1 Bible Online

COLOSSAEKO 1 - Chokri Naga bible

COLOSSAEKO 1

¹Paul, Jisu Khrista la apostle kethi Jihova medolü, mu Timothy uko sazüo.

²Kemesako mu Khrista kemelü lü keta sazüjürakohi Colossae lü kebako ce kesü, ngokemezhe po neko züba keyi thite, Jihova ukopo mu uko Niepoo Jisu Khrista celü kevori.

³U kethezü kha Jihova uko Po mu uko Niepoo Jisu Khrista tsü sü yoho, neko la kecho thisü zi bayo.

⁴Hako Khrista Jisu celü ne kemelü se keyi, mu neko kemesako kekhrü khasü keba se keyico.

⁵Kekrelamori tülü nekola kemeri khapü kemeta, neko himhüjü seba keta jüyikeve kethojülü.

⁶Nekoce vorite, cejü metülü bi, mu use kene zhüyi keta, neko yo sheri sübi bate, neko süo se keyi yovi, sünha Jihova ngokemezhe ketholü seyite.

⁷Neko Epaphras, hako choyi mipü seba, pü neko la Khrista yitho melü keshü mipü,

⁸Pü Rüpü lü neko kekhrü kehalasü.

⁹Püco hiola hako sheri süo sekeyi tüsonha, nekola kechothi tümo bazo teho, mu mhase mhalü mu pü medolü ketsü mu rüpülü mhalü keyi khapü neko chu kesü menyü ba.

¹⁰Neko Niepoo medolü tayi keshü, mu mhatho keve use zhü chu keyi, mu Jihova celü mhase vekehü keyi.

¹¹Keku metülü uthi kemeco kesü, pü keku zapozale lü, sügüsühe mu kerülü tha keyi unüzode.

¹²Kethezü kha upo tsü kesü, uthipü ukopo kevelü kalü thi mu ngokeyimi thi kesü kemesako.

¹³Sopü kezülü usüphra sü sheri, sülü kekuo belü, side uthi kedepü pü nu pükhrüo kedebalü kesü.

¹⁴Neko pü zalü rhakeyi ngoyi te, kephoma vakeyi sheri.

¹⁵Pü ngoyo kemo Jihova hü thipü, khonuko nurao.

¹⁶Kekrelamori püyo mhametü thisü, tülü kelako, mu cejülü ketako, kengo zhüri ngokemo zhüri; kede ba kene mori mipi kekha ti sheri thezho kerekrüko, mori kekuko, püyo mha metü thiyi, pülazo.

¹⁷Pü mha metü mhüjü ta, mu püyo mha metü dü mu gu püba.

¹⁸Pü sü upio zo, kehü; shüdü theralü ta, kesa dolü rhüla kesü kerathoo, mhametüko pü keta seyi ve ketola.

¹⁹Kekrelamori pü po medosü püyo mha metü chupüta (kehü metü chu püta).

²⁰Mu Cross yo thüza khi vetho thisü, püyo mhametü zü kezüveyi, akepo, cejülü keta metü sheri mü tülü mha keta metü sheri.

²¹Mu neko, pütü huce ne melülü keretse mhathoko la püzü kemecu te, siri tsühi pü nekozü kezüve yite.

²²Pü thi püpho pü mesasü neko thi kemesa mu mejo va keho mu pümhüjülü po mesu vamo keto.

²³Mhace neko krokrü de kemelülü tasüyi lize, mu jüyikeve kemeri lü resarena tamo, neko sekeyi bi, zhopo thipü tükhro keta kehü metüce kesü, sülü I Paul athipü apo yitho mipü thite.

²⁴Somi I neko la kemezhe kesülü rechü ba sheri athi apho Khrista la methi kesü, sülü thayo sheri, süo sü kehuce zo.

²⁵Süla athipü yitho mipü thisü, Jihova mhatho keza kekre kesü nekola akhasü, Jihova füko thi tsosü ketola.

²⁶Mha ketekhri thi kehepü metülü mu nuhü metü lü kevapü kemeta, vele tsühi süo khipü kemesako mese mengo sü bate.

²⁷Jihova cesücene süko zapozale kethi ketekhri zhü khi Gentile miko mese sü bate, Khrista neko yo ketao, zapozale kemeri.

²⁸Hako zhopo kethi, thüma kehopü pori menuyino sü, mu thüma kehopü sheri methosü mhase ketsü dolini kethilü; side thüma kehopü sheri thipü vetsütso ti thi Khrista Jisu ce sü ketola.

²⁹Sü süla I sheri mhatho thi ba, unütha thi mhatho kethilü alü kushu zode süo thi tazo.