Read Chokri Naga COLOSSAEKO 2 Bible Online

COLOSSAEKO 2 - Chokri Naga bible

COLOSSAEKO 2

¹Kekrelamori I nekopo sekenyü sü I dithedü alü kethetü basheri, neko la mu Laodicea lü kebako la mu athi apho zü kesü kemoko la.

²Uko melüko thomelu sü keto, kekrelamori kekhrü uzo kerhüpü kebala, mu kesekelü chupü keta ceneko, ketekhri ti Jihova medolü, mu u Po mu Khrista yolü.

³Püyo kevapü keta cene metü ketsü mu kesekelü mhase.

⁴I hio poba, kemosa humi mikeshüjü pü vori neko kedo tari seho tila,

⁵Kekrelamori athi apho neko zü bamo, siri rüpülü I neko züba, neko zhoko anüba mu pe bazo, mu neko Khrista kemelü ketho thizo keba.

⁶Neko Khrista Jisu Niepoo ngoyi ketabi sübi de tayi te püyo.

⁷Püyo ne mekrayi mu mayite mu kemelü memayite, neko metha kesü bi, thezü (kemeza) krophi keti kha kesü.

⁸Menuyite, thüma kehopü pori utho ukelü mhase kemethu kemerü pü neko shu ketse mu nejü mesu vamo ketola, thüma zhoreleko, cejülü natsimi mhase, mu Khrista lü kemo zhüko.

⁹Kekrelamori püyo Jihova pi hüchu püba, püthi püpho kenezhü.

¹⁰Mu neko püla tsü mu tsozo, püpiyo thezho metü mu keku sheri.

¹¹Mü pülü neko sheri yirüpü tate, yikerü süo thebe pü thikemo, uthi upho kephomako khikeva, Khrista yo uthi upho yirü keyi.

¹²Jülo kepü usa khrü keva, Therü thi kesü mhatholü püzü to süri keta, süo kesalü püphu merhü kesü.

¹³Neko kephomalü satate, netimepho yirü kemolü, pü nezü rhüla süte, ne vajo keta metüko vapü netsü sü.

¹⁴Thokemeta uzho ureleko umetsu ketako metü vave, uzü ketherü keta zhüko, mu chodelü chokhako khidü ve, cross yo gu kevala.

¹⁵Thezho kemeleko, kekuko thi medive, pü süko mele melu mese mengo sü süopi kuyi te.

¹⁶Süla mipüpori ne ketico la nelü mejo va hite, kekra (hezo) lari, mori tüsozho kemesa lari, mori tekhri kesa lari, mori Sabbath zhola sheri.

¹⁷Vori keto sükhri biti püzo, süko, vele upho kene sü Khrista zo.

¹⁸Mipüpori neko shu ketse va hite, dopü ce lebila zhokhro tüyo choyimi kereshü, tsapha talü mha hiko ngokemolü talüta, uthi upho mhülü kengopo uthi kerekrü kemethulü süyi.

¹⁹Pü piyo mori ukerü metüko phapü ketao ukerhüjü khi metü metsü kesü, pha mu ro kesapü, Jihova celü ma rekri kehe prari.

²⁰Neko Khrista yolü cejülü kereyi zhoko khi mesa va, mhaceno, sizi dipüla, cejülü kehüzho zü bata, neko thezho kekhiko khro sala lü tatome.

²¹Ni hite, jü hite, ti metha hite, abelü khihite; sitiko.

²²Süko sü ketako suta zoto, thümazhorele mu jü khapü kemeta kola?

²³Utho ukelülü reshü ketha medethi, (mipokengolü) renumetsade ukehülü, uthi upho rele lümo, uthi upho menyükolü ukekha keyi di.