Read Chokri Naga THESSALONIAKO KÜRAO 4 Bible Online

THESSALONIAKO KÜRAO 4 - Chokri Naga bible

THESSALONIAKO KÜRAO 4

¹Süpi sheri, sazüjürako hako tarho sü züho Niepoo Jisu lano, ne hako celü ngokeyi neko thi kezüko mu Jihova nü kethikolü thite side ngomekro mama yi ketola.

²Kekrelamori hako nekopo thi mu züyi keto jü khakesü Jisu Niepoo lano.

³Süo therüo medozo tila, neko thi kemesa keyi, mu keregükerezhü lü ne kethü kerüyi.

⁴Neko kehopüsheri pümhabü thikemesa keyi seti mesü zo, thechu therholü.

⁵Keregü kerezhü kemeho, Gentile (Jewmi kemoko) Jihova se kemoko bi;

⁶Mipü pori kezükeye tade usazüjüra zhü rego keva pü ta kemo, kekrelamori Niepoo süko metü kethio zo, mu mejümera hako sheri nekoce po mese süve, mu zhopo thisüte.

⁷Kekrelamori Jihova ucüpü mesakemolü sümo vele kemesalü sü.

⁸Thüma humi süko rhomo lümo lize pü thüma rhokemo moli Jihova rhomote, pü Kemesa Rüpü sheri khapü uko tsü kesü süo.

⁹Vele sazüjüra, lü ta ketako, I tho kesü kha neko tsüzo morive, kekrelamori neko thozo sheri Jihova neko metha kesü hunehu kekhrü.

¹⁰Sübi neko usazüjürako Macedonia lü keba metükoyo thisü bate, vele hako nekoce reda yo, sazüjürako, neko thisa sü zote.

¹¹Neko kemekre kethi do seyite, netho ne mhatho thizote, nbe khi mhatho thite, hako nekopo thino po kesübi.

¹²Neko kejütholü tavo yite chozu kebako lano, mu neko mhapüri kedi thita hite.

¹³Vele I nekopo melo mhasemo ba nyümo, sazüjürako; züzü ketakola neko lüsu bazo hite, kemeri kedimiko bide.

¹⁴Kekrelamori mhace uko Jisu keva mu rhüla sü keta melü tayo lize, uko püzü zü ketako, Jisu lü ketako, Jihova püzü sala vori to.

¹⁵Kekrelamori hako Niepoo jü neko ce po süyo, uko rhü kebako mu meshopü kebako Niepoo lavori tice züzü ketako mhüjü süta hozo.

¹⁶Kekrelamori Niepoo pütho tülü sefü kiri zoto tila, tülü kehümi füphra, mu Jihova thecü kekhu, mu saketako Khrista celü tade, tasüri rato.

¹⁷Süsa uko meshopü rhü kebako kesade tüsüpü kemhülü khotato, tükhralü Niepoo zü kesüto, side Niepoo zü tasü tato.

¹⁸Sülano jü hiko khi hunehu lü thomelu zo bate.