Read Chokri Naga THESSALONIAKO KÜRAO 5 Bible Online

THESSALONIAKO KÜRAO 5 - Chokri Naga bible

THESSALONIAKO KÜRAO 5

¹Pütü kekrekre tilü, azüneko, I lesithopü nekoce sümo sheri ve.

²Kekrelamori Niepoo vori keto keregomi tüzülü vori ketobi neko semeve shuba.

³Kekrelamori uko kepo kezükeve mu krü kebaposü, uko rekri keka pü ukoce vori, thenomi nunu vathi bi, uko therüyi ho.

⁴Vele neko, sazüjürako, kezülü bamote, pütü süo keregomi bi tio po neko pi kuyi ta kemo.

⁵Neko kevelü nuneko, keheyo nuneko, uko tüzülü thümako mote mori kezülü keta mimo.

⁶Süla uko zü bata hi khe, kekremi bita hikhe, vele uko coba mu rhorhü pü bakhe.

⁷Kekrelamori zü kebami sü tüzülü zü bayo, mu mezü ketako sheri tüzülü mezü tayo.

⁸Vele uko, kehelü mako, rhorhü pü bakhe, kemelü mu kekhrü khipü ukhoroyo süyi, mu kelakeyi pira ukemeri kebao püyi;

⁹Kekrelamori Jihova ukedapü lekhulü süvamo, vele uko Niepo Jisu Khrista yo kelakeyi ngoyi.

¹⁰Pü ukola sasü ukotho coba sheri mori züzüta sheri uko püzü kesa hü keba mesüzo.

¹¹Süla neko kezüde hunehu lü thomelu ba zote, mu mipüpüthi meve, neko thi ba ketabi.

¹²Mu hako nekoce choyo, sazüjürako, neko zü mhatho thi kebako neko dolü kebako Niepoo lü neko pi kebako neko tarho sü züho.

¹³Kekhrülü uko kerekrü zote, ukomhathoko la; mu neko dolü kehüko kezüve bazote.

¹⁴Tsühi, hako neko tarhosü züho, sazüjürako, mikhrota kemuko (kekhayi keho) kedü süte, kethathimiko lü thomelu süte, umelü kediko khrühi süte, thüma metükoyo sügüsühe yite.

¹⁵Thüma kühopüyo sheri kesu kethiko mhakesu thiasala sü hite; vele mhekeve kethi meji yite, nekotho neko dolü sheri mu mi metüko yori.

¹⁶Pütü metülü nenü tate,

¹⁷Kecho kethi ne lata hi zote.

¹⁸Mhakehopülü sheri kethezü khasü zote, nekola hiohi Jisu Khrista la Jihova medo tazo.

¹⁹Rüpü themekü va hite;

²⁰Saju kepo mhapüri kemo thi va hite;

²¹Mhametü kevekesu pete, mha keveko züyi keto lübü zote.

²²Mha kesu kethilü kengoko metü ne kethü yito.

²³Jihova thozo nethi kemesa tsü kesü, mu I kechothi kesü neko thi upho, nekerhüro mu ne rüpü mejoyi kesu thi Niepo Jisu Khrista kevori ce sü ketola.

²⁴Neko cü keyio jüthozo, pü thisü zoto.

²⁵Sazüjürako hakola kecho thiba zote.

²⁶Sazüjüra kemesalü kemebo kesü khipü metüko kelu süzüho.

²⁷I neko po lesitho kesü hio phripü sazüjürako metüce süno neko kechü sü züho.

²⁸Niepo Jisu Khrista ngokemezhe po neko metü züba keyi thite. Amen.