Read Chokri Naga THESSALONIAKO KÜNAO 2 Bible Online

THESSALONIAKO KÜNAO 2 - Chokri Naga bible

THESSALONIAKO KÜNAO 2

¹Sülizo ha küzüko, U Nyepo Jisu Khrista la voküta mu uko vo pu mhüdzülü künguküto dzüh ha ne hüpü,

²nepo Nyepoo küvo tüsozho tsühi tali kütsü potolino nepo nelü kühoküro thi mhata moyi Ropüh mhase pü na moyi mi dzüna moyi ha chelü lüsi ngoyi no nüko lü kümüzhe mo küto thi süho.

³Mipo thüdo kühopüyi sü ne swühite: mi lata müra mu kakütao nuo thüma kürüzüo mi mhüngo thi vokümo lü süyilho.

⁴Süo u tho u khapü U Kümünupüh düthi moyi mipo u rüsayo küzho khüko ngomu mu putho u Kümünupüh müve thino u Kümünupüh kürüsüce lü bayito.

⁵I Thadzü nüko zü küba che mha sükosü pü nüko che poküsü nüko seyi mota me?

⁶Sülizo pu po putü tüche prakütona küdipü tsüdo pu kha ba sü nüko yi sebato.

⁷Mu kürüzüo kükuko mi müse müngo mo no tsüyi thi swüdü bate. Eli tsü pu khakübao mipo pu khi müra va mozosu.

⁸Süzüno süsalü kürüzü süo putho mi mhüngo thi prato; Eli Nyepo Jisu ta lü küpra pu thüsü pü süo müka vato, mu pu mi mhüngo thi vode kürüzü süo thi müdi vato.

⁹Satan pu hüküsü na kürüzü süo küku mu zasiko mu ungo mhatho küthosu,

¹⁰Mi swüyoküzho khüko sü de vo suta kütoko kütsito; süosü kükrenamoli dzüo züyi moküta la.

¹¹Tsütio uko po küchezü mülütakütona süosü na u Kümünupüh mi po kükritaküto kro po thisüto.

¹²Süzüno küthoo mülü moli küthokümo-o lü unü küta khüko müjo vato.

¹³Süyi Nyepoo khrüküpüh ha küzüko, Ropüh tho ne thi kümüsa yino nepo küthoo mülübüyi no u Kümünupüh süprülü noko küdapü külaküyi checho süpü taküta na ha no noko na u Kümünupüh swüsü tayizüte.

¹⁴Pu süosü na ha dzüyiküveo po noko thipü u Nyepo Jisu Khrista zale thiküto checho süyite.

¹⁵Süna ha küzüko thiswü thi thazoyi, mu noko tha dzü zoyi moyi ha lüsi lüno kümütha dzü se küyiko thi mu zütazoyi.

¹⁶Sülizo u Nyepo Jisu Khrista poyi mu u Kümünupüh u poo ngokümüzheo na ukhrü mu küchothe ulü tho mülu mu u sadzuh küve kha u küprüo poyi,

¹⁷Noko lü tho mülusü mu mhaküve küthi mu dzü lünyiko lü nelü thi kümüve sü küyio thiyite.