Read Chokri Naga THESSALONIAKO KÜNAO 3 Bible Online

THESSALONIAKO KÜNAO 3 - Chokri Naga bible

THESSALONIAKO KÜNAO 3

¹Tsüsa ha küzüko, Nyepoo dzüo po nüko dolü thiyoküzho kümhai kükreko dolü yi thi sazo voyi mu thürho pühyi.

²Tsü ha poyi thüma mha lükümo mu küruzhümi belü yi ta prayi küto na nüko hana cho sayite: thüma mütüko kumülümi zo morü.

³Süyi Nyepoo sü küdzüthoo zo; pu na thi kümütükusü mu kürüzü belü noko külasüto.

⁴Süzo ha noko che mha poküsüko nüko süko thiyi mu tsüsayi, thito ikütsü nüko dzüh zoe ha Nyepoo mülü bayo zo.

⁵Süzo Nyepoo po noko lü rükhüpü u Kümünupüh chelü küpra kükhrüo mu Khrista chelü küpra sügüsühe küzhoo lü voküyi thite.

⁶Süzo ha küzüko, ha noko po ne küzümia kühopüyi kühulü tayo kümo mu ne ha chelü kümütha dzü se küyiko züyo kümomi zü kümokro mo küto u Nyepo Jisu Khrista zalü ha dzü kha nüko che süho.

⁷Noko ha doreyi dzü zotsü netho zoyi se bate rü; kükrenamoli ha thadzü nüko dolü küba cheyi miyi zü mo de lhü mozo kütsü na.

⁸Süzomoli ha süchesü mipü belü yi püma thi mo de mha yiketsü moli ha noko mipü lüyi thi kütsakhunyi kümona thathava yi küswüyi mhathi kümüzhe rükharüli zo.

⁹Süosü ha va yiküti putü mo mu süzino moli ha tho thakapü thisü noko ka sünyi kütsü zo

¹⁰Sizomoli ha noko zü küba cheyi thüma kühopüyi mhathi kümütsü mi, pu po pu lüvayi ti hi süzi ha noko che dzü khasüyo.

¹¹I dzü hio küpo kükrenamoli ha noko dolü humi u tho u mhatho püyi thi mo no mi küyhu kho mu ki no mire lüyi tayo mokütsü se kütsü nazo.

¹²Süna ha thüma süzi kütsümi po rüba no utho uva krati tano kütsü Nyepo Jisu Khrista za sü dzü khasü mu tarho sasü züho.

¹³Eli a küzüko, nüko zoe mhakam kühopüyi thi lizo velikütsüko thi ne süsi tahi.

¹⁴Tsüo thüma kühopüyi lüsi ha yolü thoküsü hadzü züyokümomi, nüko thüma sümi sepü bayi; süzü pu po müngayi küto na neko puzü kümükroyihi.

¹⁵Süzoyi pu khapü ne ngomumi kümha zotahi no ne küzümi kümha no pu tahitarho ta zoyi.

¹⁶Süzo thülü thi kümünüyoküzho Nyepo po kühopüyi, kühopülüyi putho nune süo khapü miprü taküyio thiyite.

¹⁷I Paul tho ne külüküsü a tho a be pü thosü ho; hiyohi a lüsi khoko lü a chelü zoli kütsü zasi pü zo; I hizi de thoyo.

¹⁸U Nyepo Jisu Khrista chelü küpra ngokümüzheo po noko mütüko zü baküyio thiyite.