Read Chokri Naga TIMOTHY KÜRAO 1 Bible Online

TIMOTHY KÜRAO 1 - Chokri Naga bible

TIMOTHY KÜRAO 1

¹U Kümünupüh ukülaküyio mu Jisu Khrista ukümüri küneo yolü chi mu küdaküyi Paul no thopüh

²Timothy kümülülü punu kütho thikütao ce küsü; ngokümüzhie, kükhrü mu lünüo u Kümünupüh yolü küvo.

³Ino Macedonia lü vode Ephesus lü kübace n pono thüma thüzho kümütha dzü mütha kükri kütiko püh müthahi no posü,

⁴Ukopo thüdzü küpo mu upotsaneko dzü küpoko rünyi hino posüh, kükrenamoli süko yolü Kümünupüh mhatho kümülülü thaküsüko moli küzüküsu, ulakükreküti püvo tayo kütila.

⁵Thüzho khaküsü külüyono kükhrü. U külü kümüsa lüno voyo mu utho ulü müzho kümolü lüno voyo.

⁶Thüma humi mha süko pon u küdode pozükümo uco küdiko potate.

⁷Uko no thüzho kümüthami thi nyisa eli uko no dipüh pobashi sede poyomo morei uko poküba kütho zo küti mülü yomo.

⁸U münu de thüzhoo süyi lize thüzhoo veti seba.

⁹U seküyi thüzho hi kümathomi na thisü mo eli thüzho zü kümomi mu thüzho kümütsuko, Ukümünupüh se kümoko küphomako, musakümoko, mizü züh kümoko, upo uzu küdokhriko mu thümumi, miküdokhrimi na zo.

¹⁰Kürügükürüzümi, u tho u zümi yo kethenga kethi, thüma zhü ketimi, mikhwü zu kümoko mi küswü, thüma kücejümi, medade rüswü ketiko miküdo kütami mu kümütha züh zü küthürü kütiko.

¹¹Kümüthazü püh umülü küva küvethoo u Kümünupüh dzüyiküve küthoo zü kürhü zo.

¹²Jisu Khrista a Nyepoo dzüküpo a kütsüla mu a küda püh apon yitho thi küyila pukümüza poyo.

¹³Ino vapüh Nyepoo tha mu mülade pu kümülümiko müthimünyi, mikhwü zümo vo zori puno ngokümüzhie püh a tsü kükrelamoli Ino mülümode semode thita kütala.

¹⁴Jisu Khrista yolü ngokümüzhe püh a kütsukülhu thisü, hihi Jisu Khrista yolü kümülü mu kükhrü lazo.

¹⁵Hicehi mülüyi küsü kümatho küzütho zü mu yiküsü züsü Jisu Khrista no küphomami külayi kütola cezülü vo, süko dolü Ino küphoumadoo.

¹⁶Eli puno ngukümüzhe püh a tsüsü, side küphomadoo a yolüno Jisu Khrista kükhrü küla kedi thapüh mülü küyimi müka de uko po küchothe külaküyi ngoyi kütola.

¹⁷Küchothe küdeo, puh küla küdio, Kümünupuh pon thürho zapozale mütü püh küyiyo thite.

¹⁸Anu Timothy Ino kümüthazü hihi sadzü popüh kümütayo npo müdziyi mu nkunhie thide kümürha non poyo.

¹⁹N kümülü rüderületa hide n lükütho püh thüma u kümülü dzüru rülükütako bita hite.

²⁰Thüma sünyisü Hymenaeus mu Alexander, Ino unyi khapüh Satan belüsüve side unyi po u Kümünupüh tha lata mo kütola.