Read Chokri Naga TITUS 1 Bible Online

TITUS 1 - Chokri Naga bible

TITUS 1

¹Paul Jihova choyi kethio, mu Jisu Khrista yitholü apostel mipü, Jihova kemelü la kedakeyio, kethoo seyi ketabi kemesazholü hü keta mipü.

²Kechothe kerhü meri keta Jihova lano, medakemo, cejü shudü kemolü jü phrapü kemeta.

³Vele pütü züde jüo zhopo kethilü tha meka kesü, khapü amelükeva, Jihova uko kelakeyi ukopo thino ketsü kesü jülü.

⁴Titus cekesü, atho anu kemelü zholü; ngomezhe kesü kekhrü, phikemezhe, mu kezükeve, Jihova celü kevori, u Po, Niepo Jisu Khrista ukelakeyio.

⁵Mhaco hiola n Crete lü nkha meta, n po mha umedo thikenyüko ketso kemesapü pütü thisü ketola u pethi mehiko kedapü nade metükolü süyi keto süla I n kedasü.

⁶Kehopüri mejova kesumi, ucemi pü lebi timi, unune kekha kemelülü ketami, mha kebü kemo, mifü zü kemu thikemo.

⁷Bishop sü mipo mejoyi kesumi, Jihova yitholü, utho umedo thita kemomi, thelü reda mhamha ta kemomi hezo kranyü ba kemomi, mhakebü kemomi, mhamesa kemo meho menyü kemomi.

⁸Vele reso kekhrümi, thüma keveko kekhrümi, rhorhü, jütho, mesa, krokrü de mhakelü mi;

⁹Pü metha kesübi kemelü jü khi metü keyimi, size lize jüpo kenyüko sheri pü thezho kemesa khipü süko tahitarho mu uko shuyi mu jürenu yi veto.

¹⁰Kekrelamori kekhayi keho, kemethu kemerü po kenyü mu mishu ketse ketako, yikerü poketako sheri sübiti kekro tate.

¹¹Süko ta kekhava moze sü, uko cekro metü kebü pü tate, methazükemoko khi metha tate, mesakemo kemehola.

¹²Uko dolü saju kepo mipü poti, “Cretemiko, kecejümi kemedamiko zo, khonu kesuko, kemetsü mhati kenyümi,”

¹³Zhopo hio kengo kepo kethozo. Süla thüma hibiti kepoko kethi shusü ta mozesu, side uko po kemelü lü pütü thita ketola;

¹⁴Jew miko ketheju tiko po ketako yo menu hite, reni hite, mu thüma tho po keta thino züno po ketako, uko ketholü regü ta ketako.

¹⁵Kemesamila mha metü mesa, vele jü merho kevako melü mo ketako la mhapüri kemesa di; vele uko lüdo sheri ukelü sheri jü merho pü tate.

¹⁶Uko Jihova sele potayo, vele uko mhathoko lü süko mela tate, (Jihova sekemo thitate), uko keretse phikemero, mu mifü zü kemu, mu mhatho kevelü umelü revote.