Read Chokri Naga HENREWKO 11 Bible Online

HENREWKO 11 - Chokri Naga bible

HENREWKO 11

¹Tsühi meri kebao sü kemelü (ukra, utso kenezhü) ngokemo vele size tüzo ziti zhü.

²Kekrelamori utsüpumi sheri süo la mipo uko kevepo mu yikeshü ngoyi (Niepoo mhüjülü).

³Uko kemelü lü sekeyi cejüko Jihova jülü rhepü prari; süla kengo zhüko ngokemo zhülü thi pü pra mengosü.

⁴Kemelü lü Abel rütho khakesü Cain reshü ce vekuti thipü Jihova tsü, süola pü zhopo thüma kemezi ngoyi, Jihova püzho posü te; süla pü sata zori püju urethi tazo.

⁵Kemelü la Enoch kesa ngomo rhü süte, (püthi püphothi rede va); pü phu medita, kekrelamori Jihova püthi rede kevala; kekrelamori pü shüla keta mhüjü zhopo hio ba ketala, pü Jihova nü thiyi.

⁶Vele kemelü samode pünü thikeyi di, kekrelamori Jihova ce kevoko melü moze kesuo sü, pü mhakha kethothi pü phuyo kezhoko ketsüo zoti melü moze su.

⁷Noah sheri kemelü lü Jihova thedü jü khasü ketala ngomo zori mpe de melü shudü ta ru thipü pü cekro kelayi ketola, pü sülü cejüo mejo va, mu kemezi kalü kemelü lü ngoyi.

⁸Kemelülü Abraham cüpü thethi pü pra püpo kalü ngoyi ketola, jüzülü; mu pü tapra; pü dipüce voto sheri se bamo zo sheri.

⁹Kemelülü pü revü thethipü jüphrapü kemeta lü tavo, sekemo ramolü, pü Isaac mu Jacob ni züde jüfü celü hü; püzü de jüo pophra kemeta kalüo püzü kesa ngoyi ketola.

¹⁰Kekrelamori pü nadepü bodü kebapü phu vo, süo thi kesüo sü Jihova zo, zite.

¹¹Kemelülü Sarah sheri nuhü püyi, mu natsimi pü (nuranu) pü menusü pü kehüzho züta zo sheri, kekrelamori puce jüphra kesüo jüthozo to size melü tila.

¹²Süla pü kesamipü bi tazo sheri tüyo thenyü kobi phriphayi keho krode mu jü kezho poyo teshünyo phiphayi kehoko bi thüma püyo hü süri ta.

¹³Hiko metü kesami thite, jüphrapü kemetao ngoyi kemolü, vele kemecu lü süko ngo; mu süko hu tazo, mu melü tsapü tavo, mu uko zowe (zono) sekemo revü thi ketami mu resomi thi de cejülü revümi thita.

¹⁴Kekrelamori mha süko thi kelaceri uko rünapü phukezü po metsü metse süzo.

¹⁵Kethozo, mhace uko rünalü taprari ketao rekra ketho thita lize uko sala sülü vo tari pütü keve ukola bazo veli.

¹⁶Vele uko rüna veku tipü menyü tate, süosü trülü, sülano Jihova uko cüpü uko Rüo kethi menga tamo; pü nadepü kesüpü ukotsüsü.

¹⁷Abraham kemelü dojü kepelü Isaac pü reshü thi, mu pünu pupo khi reshü thi, mu pünu puleo khi reshü kethila Jüphra kesüo kalü ngoyi.

¹⁸Sülü mhapo kesü, “Isaac yo ntsa mehüto.”

¹⁹Jihova kesami zori phü merhüsü yive ziti kelü, pü sülü pühüpü ngoyi tazo.

²⁰Kemelü lü Isaac reliphri pü Jacob tsü mu, Esau sheri hisa vori ketoko la.

²¹Kemelülü Jacob sheri sata kezüce reliphri pü Joseph nuni tsüsü, püthü nürhü püde reshü thi tazo.

²²Kemelülü Joseph pü sülü Isreal nuneko taprata keto posü tazo, mu püroko la jü kha uko tsüsü.

²³Kemelüla Moses sheri menu keyice tekhri sü pü krüni püpü keva, kekrelamori nuo pütü shuzo tila, mu uni kedeo jü kha kesüo mpe mozo.

²⁴Kemelüla Moses sheri pü tetseko kevori ce (pethiprari) pü cüpü “Pharaoh nupü nuo” site mela vazo.

²⁵Pütü dopü kephomalü pünü thi kebaceri Jihova thümako zü kemezhe keto kadayi ta.

²⁶Egypt lü ceneko ceri Khrista la zhoshu veku ti lü ketala, kekrelamori pü zhokhro hisaco veshusü keto rho kuta.

²⁷Kemelüla pü Egypt khava tata, kedeo lüda sheri mpe mozode, kekrelamori pü sügüsüheyi, püngokemo pü ngo kebabi sü.

²⁸Pü kemelülü ta kepra lü thüza khi kegü vasü, size kemosa kemekapo nuranuko meka vaze kesula.

²⁹Kemelülü uko jükezho kemereo lü tavota, cejü kesolü keta thide, Egypt thümako sülü uko mehü khriva.

³⁰Kemelülü Jericho sazho retuta, zhothüna tametu kevo salü.

³¹Rahab thethüpü sheri kekreko züde kesa katamo, melükemoko zü, thenopü pünü saide pü rami ra kevoriko meso keyila.

³²I dipü posata? Gideon ju posaketo pütü bamote, Barak sheri, mu Samuel sajukepoo sheri; Samson, Jephthae, David hiko metü.

³³Hiko kede shuyeko menisü, kemezi khivori, jüphra kemeta ngoyi, losha tako kekhayi;

³⁴Meketo lüda kerü sheri va mhüsü, zecho yikeve sheri therayi, kethathi kemeza sheri thi meku meco sü, therimave thi kemetüsü, thipaheko rüna kekrelü kebako zü kezhevo.

³⁵Sa ketako pho merhüpü thenoko tsüsü, mu kekremiko mipo uko methimeni, uko khasüva keto mela; kekrelamori hisa laco rhüsa kesü veku tipü ngoyi keto menyü ketala.

³⁶Mu kekremi kropü mipo uko krünyü methimeni uko vü shusü, ile, süpi sheri uko phaliro kero khipü side thejü thita.

³⁷Mipo ketsüpü uko va (ukozhe), yisü süzhe lü uko rüthüsü, dophi kerüpü uko kedo, zecholü uko dokhri; uko tekoyi, tenyüyi khipü ta luce hice ru rehu vo, mhadi tsakhu, miko uko meshu, methimeni.

³⁸Thüma süko cejü hio ukola bayi shü kemo thitazo, uko cejü kesakolü rehu ru, cejütu koyo vota, khonu cekolü, cejü kececelü;

³⁹Hiko metü kemelü keve la mipo uko ju keve kepo mu thechu pü zo sheri jüphrapü kemetao ngoyi molu.

⁴⁰Jihova ukola mha veku tipü khapü utsü meta, sükopo uko sa mode ngoyi tamo ketola.