Read Chokri Naga HENREWKO 12 Bible Online

HENREWKO 12 - Chokri Naga bible

HENREWKO 12

¹Süla zhopo kemhü kezho umetupü kebabi uko metüpü ba, uko kemeshi süko khapü meta vakhe, kephoma ukeyhu ketako sheri khava side sügü sühe pü umhüjü laco ta kehu kezülü tasü khe.

²Ukemelü kha kesüo, thitso kesüo Jisu pe zoyi khe, pü kenü pü mhüjülü kebala Cross yo kethenga sheri hüyi tazo, mu Jihova bo püza laco kedebao yo bate.

³Kephomako püzho rele zü kepile tiko rele lüsü phite, molize ne sheri ne kelükolü meyhumezhe ta mu phesa tari sehomo.

⁴Neko kephoma metsu tilü nekoza mekrü ti ketso mizü ketü mozolu.

⁵Neko khipü natsimiko tarho kesübi po kesüko neko rekramote, Anu, Niepoo u methade u methi kesü lü kemejo va hite; mo pü neko lekhu kesüko sheri.

⁶Pü kekhrümi pü sümi methimeni de metha süyo, pü nu thi ketako sümi vüsü de züyi yo.

⁷Mhace pü neko methimeni süyo lize ne sügüsühe keyilü Jihova neko pü pü nuko thi bate; kekrelamori mi nune kethimiko uponeko sopü methide metha kemoba?

⁸Vele mhace neko methi meniyo mo lize, sülü neko ti methakemola, süsa neko tekhrünuko tazo, nuthonuko mote.

⁹Süsasheri uthi upho la uponeba, pü u thikemezi süyo, mu uko süko rho mu ukofüzüyo, siziyolize uko rüpü pü khrikhro ta lüzüzomome, side rhüyi zümome.

¹⁰Kekrelamori pütüdopü la zosheri ukhapü uko nü medolü süyo lize, vele süceri meveku, praku ukola, upo pü kemesa zhürhüthi pü phremi kethi ngoyi ketola.

¹¹Tsühi umethi u metha kesü unüphimo, vele ulüsu ulüthi rizo, sizosheri hisalaco kenü sezhü tato süko la kemezi dojü keyilü.

¹²N bo lolo metümo, nkhüba yoyo lulu metümo ketako thi kemetü yite, cho kerekrü süte.

¹³Nphe kevo chodeko thi kemezi yite, kemosa nphe reyho keta chode vajo vato, vele süko po sürho yite.

¹⁴Thüma metü zü kezüve yite, kemesa lac ova yite, sizi kemosa mipüri Niepoo ngoho.

¹⁵Mhape menu sürhü shuyite molize thüma kehopüri Jihova kekhrü tsomota ri ve, sizi kemosa kekhu nlü prü prari nthikemezhe vato, side mikekro thi merho vayo.

¹⁶Kemosa keregü kerezhü, mipothalice de kepomesu keva Esau libi, püticopüla pu pethizho zhuti ta.

¹⁷Kekrelamori pü süsalaco dipü bita sheri neko thori sebato, pü thejo kalü ngonyü sü zori pümelakeva, pü thelü redekeyi thethi (pütü) ngosamote, pü mhüjü mekri de phu zo sheri.

¹⁸Kekrelamori neko cejütu ni ketola süyo vomo, süoyo meto keba, mori kemhüketü sükebalü, zübüyi, mu khradelü.

¹⁹Thecü khu keba fü mori jüko füphra, füphra süko sekeba posamorive ukopo seba ketola.

²⁰Ukoce jükhakesü uko güyihota, mhace khonu zo sheri cejütuo nisü lize süo ketsü khi püzhekhri vato, mori sü utakeve pü zorhü vato.

²¹Süo kengo kemere thi ketola Moses sheri poti, “I mpe ri zote mu reshü renaritazo.”

²²Vele neko ta Sion cejütuyo vorite mu Jihova kehü rüna nadelü tülü keba Jerusalem lü, mu sülü Tüyochoyimiko phiphayikeho ba.

²³Methikehuo mu nurako kehuce Tülü thopü meta, Jihova thüma metüko sheco kethio, mu kemeziko rüpü mhathi meve tsü kesüko.

²⁴Mu Jisu metsulü thade jükho kesao thi kesüo, mu püza kegü kesüo, Abel ceri mha veku ti pokesüo.

²⁵Neko püfü pokesüko melavahite, kekrelamori mhace cejülü pokesü jüko zori therayi mota lize uko mhace tülü pokesü süko melava tisa dithedü uko therayi hoku tato.

²⁶Pü füphra cejü metü kenasüte, vele Pü füphra kesüjü poti, “Sütüce I cejü lebi kena sü mo tato vele Tü sheri sa kena sütato.”

²⁷Jühio posakesü, zasi thaka kesü kena kesü mhako thikeyi zhü süko khavato, mu rena kemoko khapü metato.

²⁸Sübi kede revü renayi kehozhü uko ngoyite, süla uko ngokemezhe khipüh bayi khe, sülü uko Jihova poyi keshü thi Pü rho Pü reshüsa mu kempe thitokhe.

²⁹Kekrelamori uko Jihova meketo püzotila.