Read Chokri Naga JAMES 1 Bible Online

JAMES 1 - Chokri Naga bible

JAMES 1

¹Jihova mu Nepo Jisu Khrista cetao James-e kütsapu ta küta yebo kürikünako ce küsü.

²A züneko, medoküphi lüni süh küyice, ne la küve zo kütsü lüyite.

³Ne kümülü küveküshü medephi küsüyolü sügüsühe kütsü payo kütsü sheyite.

⁴Sügüsühe kütsüo po pü mhatho thi zhochü süte, sileo ne mhapühlüri tsomo tamo de vezhochü mu tsühlitsotato.

⁵Neko hümi mhashe dileo, pü po Jihova ce choyite, Pü u müdave mu panyo mo de kha kühopühri tsüyo, mu sü o püh pü tsüh zoto.

⁶Vele pü po mülükhro mu külüdosa mo de choyite, kükrelamole külüdokütsümi tükhra po hüpüh rükhürüji küzü dzüküzho rüchü bizo kütsü la.

⁷Thüma sikütsümi po Nepoo celü mhakühopühri ngoyi küto lü hite.

⁸Külüdo kütsümi pü chokolü bagüyi yomo.

⁹Kürünu lalü kütami po pü thi müzhoküsü lü u nüyite.

¹⁰Vele künemi po ri pü thi kürünu küsüce unüyite, kükrelamole pü ri nhabi de ratazoto kütsü la.

¹¹Nace thosü pü tüna thi küsüyolü nha chü rüwi vayo; pü püko rüra tayo, mu pü züve shütayo. Süsü bi künemi mhaphumhayi zü ri dita zoto.

¹²Dophilü sügüsühe küyimi thüjo küpümi zo, kükrelamole pü medophi küsüyolü thaküyi la Nepoo püh pükhrüyo kütsümi tsütole po phra kümüzü kürhü küde pirüh ngoyi zoto.

¹³Thüma kühopühri müdoküphi pü ce küvoce, “Jihova a müdophi bate,” si kütsü po hite, mhaküshü püh Jihova küdoyi limo mu pü mipühri müdophiyo mo kütsü la.

¹⁴Vele mi püh püh hi medeküphi pü ce küvoce pü tho pü münyü po pü müsüyi mu pü swükütsiyi küzhozo.

¹⁵Süsa, pü münyüko nünepüyi, de küphoma münu süyo, mu küphoma pethiküyi zü küsa münusüyo.

¹⁶Kükhrü a züneko, mipo u swüvahite.

¹⁷Yophrü küve khümü mhaphrü veyo thi kütsü khü müsoyolü kizo, mu tüyolü küve Poo celü vozo mu pümhakhri kümha rüderüleyo mo.

¹⁸Pü tho Pü müdülüno kütho dzülü u mühüsü, side u po pü mhatho she kürao thiyite.

¹⁹Kükhrü a züneko, hio sheyite, kühopühri rüni mütsosai, münü dzüpoyi, u lü rüda mhatahi.

²⁰Thüma lüdayolü Jihova matho paiyo kümo la.

²¹Süla neko müsa kümo mu rügürüzhü yerizüri kütako khavate, mu ne lü münü de ne ropü külayi ve küto dzülüpüh kümüzüo yiyite.

²²Vele kürüni lübi de u tho u swüva mole dzüo küthimi thiyite.

²³Thüma kühopühri dzü rüniyo ri dzü süo thi mu züyo kümomi khriphilü u zü peküsü bizo.

²⁴Pü tho pü pesü de ta rüde kütasa pü hü dipüh bisi lümo mhatayo kütsü la

²⁵Vele hepha küva vezhochü kütsü zhoo mühosü de mhüdemo baküyimi, rünisü mu lümota mo de thi muzüküyimi, pü mhatholü thüjopü zoto.

²⁶Nedolü hümi nani küvemi litsü lüyo ri, u ta kükhayi moleo pütho pü swü bate mu pü nani ri kümüchü zo.

²⁷Jihova mu u Poo mhüjü ce kümüsa mu rhokümo nani sü hihi, mürinumi mu samepüko müzhe küvaphi mu cejülü mhaküshü po u va mürho va kümomi zo.