Read Chokri Naga JAMES 5 Bible Online

JAMES 5 - Chokri Naga bible

JAMES 5

¹Mhaküneko, tsüh rünisüte, thüjüküzü ne ce voküzü la, kra müra süte.

²Ne ceneko celire züte, mu labühkho khümüneko tizüte,

³Ne suna mu rükathiko mhotshü züte. Mhotshü küzü süo ne mütsü küzü zhopo zo mu me kümha ne thi tiyi tato. Ne thülaco la cene künguyite.

⁴Hihe, no küthüdo de n yicümi zho tsümo küta uko zhoo tho shezüte mu yikürühmi she küsükhü shekho Krodeko Nepoo nyi tso bate.

⁵Ne cejü hilü hü küthügu mu unüunyü thi vate, ne netho ne thi mülüpüh ne zheva küto tüsozhoo khü bate.

⁶Ne kümathomi müjo de dokhrivate, sükoe ne müsüh thiyo mo.

⁷A züneko, Nepoo vo kümothe sügüsühe bazote, hihe, yitemi cejülü bete po veyi küto latürü kürao mu künuo khübayo.

⁸Ne ri sügüsüheyite, nelü krokrü bate, kükrelamole Nepoo küvo tüte.

⁹A züneko, huhu yo panyoparo hite, moleo ne müjotato. Hihe, copeo cekha ce thazo.

¹⁰A züneko, Nepoo za süh sadzüh dzü po küvoko kümüzhe küyilü ri sügüsühe küyi püh thaka thiyite.

¹¹Küthozo, sügüsühe küyimi thüjo küpümi zo kütsü uko lüyo. Ne ri Job sügüsühe küyi dzü she mu thülalü Nepoo mharhü ri ngovate. Nepoo mi phi udzürüzo mu mi ngomüzhe phiyo

¹²A züneko bahori ne tü ri mori cejü ri po rüswü hite, mori mhakükre ri po rüswü hite, Si kütsüh-o mole neko dzüthozo de ‘I’ leo ‘I’ mu ‘mo’ leo ‘mo’ site, moleo ne müjo tato.

¹³Ne dolü mipüh ne kümüzhe ba me? Sümi po kücho thiyite. Mipühne udzüvekrü ba me? Pü po kütshü tsale thiyite.

¹⁴Mipühne mhathi ba me? Pü po kühulü pethimi cüyi de uko po pü la chosüte mu Nepoo zalü tsühdzü püh künhüsüyi,

¹⁵Sileo mülü de choküsü la mhathi küzüo velayito mu Nepoo pü phü müsü süto, mu phoma vari küjo vatsü süto.

¹⁶Ne sührhoyi küto la ne küjokümoko hunehu ce phravavate, mu huhu la choyiyite, kümathomi kücho kuphi mu u kücho ngoyiyo.

¹⁷Elijah ri uko bi thümanumi zo ru, tüpo rühi tano pü nüthathi choküsü ce, cesüh mu tükhri swürüh cejülü türü sü mota.

¹⁸Süsa pü cho lasü mu tüyo türü khasü, side cejülü mhapo hüla paküyi zo.

¹⁹A züneko, neko dolü humi küthoo mürhü tata de humi pü züh lavo leo.

²⁰Sümi po sheyite, küjoküthio kükrikütsü cholü ta de pü zü lavo küyiyolü küsalü küphomao ropü külayito muküjokümo kükro whuyi tato.