Read Chokri Naga PETER KÜRAO 2 Bible Online

PETER KÜRAO 2 - Chokri Naga bible

PETER KÜRAO 2

¹Süla kedoda, kecürü kesu, mharhü lüniko, kethokemo zhopo, mu mhakemeho, mu kesu kepo lüniko khavate.

²Natsimi nuranu bi jü kethoko menyü uzune nojü kemenyü thite, side neko ma meveyi te.

³Mhace neko Niepoo ngo kemezhe kekhrü ne phizo ziti metha va lize.

⁴Rhüketa ketsü pü kevori thümako püyimu de pü mela kevao, vele Jihova pü kedayi ta, side püpo ketsü püma kerüo thito.

⁵Neko sheri rhürha keba ketsü kropü zo, khipü rüpü cepü kethi, thevo kemesa kro, khipü rüpülü rütho ketho, Jihova po khiyi keshü thiyi Jisu Khrista yolü.

⁶Süosü ketholesilü sheri thopü meta, Hihe, I Sion lü ketsü kemelepü kha meta, kedakeyi, püma kerü, mu pü melü keyimi uve kedi thita ho;

⁷Süla neko pü umakerü melüte, vele uko püjü zükemo kola, ketsü kefüko yi mute, süo pükülü ketsü kemeleo thite.

⁸Mu uphe kemeshü tsü, tsüpü tsüro umejo kevao jülü umejo (unümo) thi kevako, jüo zü mu ketala; ukopo sizi keto kesüpü kemeta la.

⁹Vele neko keda keyi nuhüko, kedemi ye thevoko shuye kemesapü, thüma uhü kekre kropü, nekopo thüma pü chu ketola cü keyi neko kezülü tazo sheri cüpü ungo zoti kevelü süyi ketala.

¹⁰Thajü vapü thüma kemo thita, vele tsühi Jihova thüma thite; hijü phikemezhe ngoyimo, vele tsühi phikemezhe ngoyi te.

¹¹A kekhrüko, anüko, I neko cechoyo, sekemo thüma bi (resomi) mu kemesa revü mi bi, mhakemeho kemenyü kolü ne kethü yite, ukerhüro zü therithi keta ukemetsuko.

¹²Ne jüpo jüliko kemathola; Gentilemiko dolü ketace, neko metsu mu neko khipü thüma kesu kethimi zi ketako, ukoyo neko la mhatho keve thiyi keve mi tari yive, mu uko mhatho keve ngo keyice Jihova khipü zapozale thi süto uko pe vori tice.

¹³Nethi kerenupü thüma zhorele kehopü khro ri süyi te Jihova lano; kedemi sheri mu keku kerekrü kori.

¹⁴Anghko sheri, uko mhakesu kethi miko la khapü metayo, sazho khasü keto, mhakeve kethiko chu sü ketola.

¹⁵Süosü Jihova medozo, neko mhakeve kethila kemelo mhasekemoko thipü kemekre vato.

¹⁶No nkekha kedimi ketabi, pütü süo khi mi keyhu kezhe moli, vele Jihova cetami thi ketabite.

¹⁷Thüma metü rhote, usazüjürako khrüte, Jihova mpe zote, kedeo rhote.

¹⁸Mi thekümiko ne niepomiko metü khriprü te; mhakeve kethimi, hümenu ketako lebi zomori nphemere ketako sheri meprü sa zote.

¹⁹Kekrelamori mha hiohi meza züzo tila, mhace thümapü kemezhe zümo zo sheri lüzhe hüpü ketami süo vezo.

²⁰Mhace nokekrei ketala mi n yo kuta (nthota) lize ne dipü kemeve ba, ne sügü sühe yite, vele mhace ne mhakeve thiyo lize süo la kemezhe zo sheri, sügü sühe yite, süosü Jihova khiyi keve zhüzo.

²¹Neko hibi cüyi tazo, kekrelamori Khrista sheri uko la kemezhe sü, thaka thi uka sü, side nekopo pü phecelü tayi ketola.

²²Pü phoma mozo mori pü talü sheri kejo kemo ngoyi mo.

²³Pü mipü meshu kesüce pü miyo kenyo tamo, pü kemezhe keyice pü miyo kethi kedü ti thitamo, vele khapü sheco kemezi kethio melü süve.

²⁴Pü ukephomako khipü püphoyo süyi, südüyo (cross yo) side ukephomako la sata zo sheri kemezilü rhü sala yi zoto, pü kevü kuko la uthi kesürho sü.

²⁵Kekrelamori neko tekonuko bita vajo keramotazo sheri, vele tsühi ta sala pükrolü vori sala te; side n kerhüro Bishop thite (kefüo).