Read Chokri Naga PETER KÜRAO 4 Bible Online

PETER KÜRAO 4 - Chokri Naga bible

PETER KÜRAO 4

¹Khrista uthi upho khi ukola kemezhe kesübi, uko sheri sübi umelü kerede keyi mesü, kekrelamori püthipüpho lü kemezhe kesüla kephoma thi mote.

²Püthipüpho kemenyülü hü, mecho samo te, thüma kemenyükolü, vele Jihova medolü tate.

³Neko thajü vo keta kehütülü Gentile (Judakemoko) kelü medo bi hüvori, mhakemeho kemenyü, reyomenyü, hezo krakeye, kezhe kemeli tehütehü thi, mu phikemero therü marhe kereshü kothi.

⁴Uko kelüce neko uko zü kemekro mo ketala neko lüpü uhü kekre kropü thite mu mhakesu popü neko tha, mu neko keyeri keta bi potate.

⁵Kehopü sheri uju popü kesami mu kerhümi sheri sheco thi ketao mhüjülü sü rhü zoto.

⁶Kekrelamori mhace süola jüyikeve zhopo thipü kesami koceri süsa zo; thüma süko uthipholü hü ketako sheri sheco thi ketola, ukozholü, vele Jihova zholü hüyi te rüpülü.

⁷Vele pütü thela mhametükola vori umeno bate, neko süla rhorhü pü bayite, mu kecho thide fü mu la bate.

⁸Mhametüko pi sheri neko dolü mhakha mi ketsü lü netho thi bazote; kekhrü, mivaphi kesüla kephoma kekro hu kevo yito.

⁹Panyoparo mode hunehu meso bazote.

¹⁰Kehopü sheri mhaphrü ngophrü keyibi neko süo khipü hunehu la yitho thiyite, Jihova ngokemezhe kekrekre ti kekro khasüyo tio choyi keve mipü thite.

¹¹Mhace thümapü jüpo lize püpo Jihova la jüpo kevemi thide posüte, mhace humi yithothi lize Jihova pü keve didü khapüphrü sü sheri püpo sübi thisüte; side Jihova po Jisu Khrista yo zapozale thiyi te, püyo kechothe kechumu mipi kekha keyi püzhüzo, Amen.

¹²Akhrüko, ne dojü merüshü keto neketekhri ziti lüta hite, neko yo sekemo vori ketakolü.

¹³Vele rethu yite neko sheri Khrista mezheko keza ba ketako, Pü zapozale mesemengo vori ketoce nekonekenü rekrishu zo ketola.

¹⁴Mhace Khrista zalü ne meshuyo lize, ne kenüko thüma kropüzo, kekrelamori zapozale kethi rüpü Jihova celü vori nekoyo bate; uko lazono pü mha kesu side po, vele neko la pü zapozale kethi zhüzo.

¹⁵Vele neko mikedokhrimi thitamo, mori keregomi, mori kesu kethimi, mori mithipü mipo nekola mere meyhu mezhe ti thitamo.

¹⁶Sizo sheri mhace thüma mipü Khristaian mile side kemezhe yo lize püpo menga hite, vele püpo mha süo la Jihova zapozale thi süte.

¹⁷Kekrelamori kemejo sü therüo celü vori moze kesula, mu mhace ukoyo süo shudü to lize pütü thelalü Jihova jüyikeve züyo kemo koyo dipü bizo toshi?

¹⁸Mu mhace kemeziko mesesazo kelayi tolize dipüce mesakemoko kephomako ngota?

¹⁹Süla uko Jihova medola kemezhe bata lize uko kerhüro khapü pütsü pumelü sü mhakeve kethilü jütho mu kemelü keve pü uthi urhe kesü Jihova tsü sükhe.